الماتى قالاسى قوعامدىق دەنساۋلىق ساقتاۋ باسقارماسىنىڭ مالىمەتىنشە، اپتاپ ىستىق كەزەڭىندە قالادا شۇعىل مەديسينالىق كومەككە جۇگىنۋشىلەر سانى كوبەيگەن، - دەپ حابارلايدى alnews.
دارىگەرلەردىڭ ايتۋىنشا، جوعارى تەمپەراتۋرا اسىرەسە قارت ادامدار، بالالار، جۇكتى ايەلدەر جانە سوزىلمالى اۋرۋى بار ناۋقاستار ءۇشىن اسا ءقاۋىپتى.
الماتى قالالىق جەدەل مەديسينالىق جاردەم قىزمەتى ديرەكتورىنىڭ مىندەتىن اتقارۋشى ورىنباسارى ازامات قۇرمانبەكوۆتىڭ ايتۋىنشا، ىستىق كۇندەرى جۇرەك-قان تامىرلارى جۇيەسىنە تۇسەتىن جۇكتەمە ايتارلىقتاي ارتادى. اۋا تەمپەراتۋراسىنىڭ جوعارى بولۋى قان قىسىمىنىڭ كۇرت كوتەرىلۋىنە، جۇرەك ىرعاعىنىڭ بۇزىلۋىنا، ەنتىگۋگە، سونداي-اق ميوكارد ينفاركتى مەن ينسۋلت ءقاۋپىنىڭ ارتۋىنا سەبەپ بولۋى مۇمكىن.
تەك شىلدە ايىنىڭ العاشقى ەكى اپتاسىندا جەدەل جاردەم قىزمەتىنە 33،6 مىڭنان استام شاقىرتۋ تۇسكەن. ونىڭ ىشىندە شامامەن 1،5 مىڭى ارتەريالىق قىسىمنىڭ جوعارىلاۋىنا بايلانىستى بولسا، تاعى 300-دەن استامى جۇرەك-قان تامىرلارى اۋرۋلارىنا، سونىڭ ىشىندە جۇرەكتىڭ يشەميالىق اۋرۋى مەن جەدەل ميوكارد ينفاركتىنە قاتىستى بولعان. بۇدان بولەك، مي قان اينالىمىنىڭ جەدەل بۇزىلىسىنا ۇشىراعان 50-گە جۋىق ناۋقاس شۇعىل تۇردە قالالىق اۋرۋحانالارعا جەتكىزىلگەن.
الدىڭعى كەزەڭمەن سالىستىرعاندا، كۇن ءوتۋ سالدارىنان جەدەل جاردەم شاقىرۋدى قاجەت ەتكەن جاعدايلار ەكى ەسە كوبەيگەن.
باسقارما ماماندارىنىڭ ايتۋىنشا، اپتاپ ىستىق اعزانىڭ سۋسىزدانۋ ءقاۋپىن، تاعامنان ۋلانۋ، ىشەك ينفەكسيالارىنىڭ تارالۋ ىقتيمالدىعىن ارتتىرىپ، ماۋسىمدىق اللەرگيا بەلگىلەرىن كۇشەيتەدى. سوندىقتان سوزىلمالى اۋرۋى بار ازاماتتارعا دەنساۋلىعىنا ەرەكشە كوڭىل ءبولۋ كەرەك. ولار دارىگەردىڭ نۇسقاۋلارىن قاتاڭ ساقتاپ، دارى-دارمەكتەرىن ۋاقىتىلى قابىلداپ، قان قىسىمى مەن قانداعى قانت دەڭگەيىن تۇراقتى باقىلاپ، قىزىپ كەتۋدەن ساقتانىپ، جوسپارلى مەديسينالىق تەكسەرۋدى وتكىزىپ الماۋى قاجەت.
الماتى قالاسىنىڭ ەمحانالارى سوزىلمالى اۋرۋى بار ناۋقاستاردى ديسپانسەرلىك باقىلاۋدى جالعاستىرىپ، ولاردى قاجەتتى دارى-دارمەكپەن قامتاماسىز ەتىپ، دەنساۋلىق جاعدايىنا تۇراقتى مونيتورينگ جۇرگىزۋدە. ەگەر ادامنىڭ جاعدايى ناشارلاسا، اسقىنۋدى كۇتپەي، ۋاقىتىلى ۋچاسكەلىك دارىگەرگە قارالعان ءجون.
دارىگەرلەر مۇمكىندىگىنشە ساعات 11:00-دەن 17:00-گە دەيىن كۇننىڭ تىكەلەي ساۋلەسىندە جۇرمەۋگە، تابيعي ماتادان تىگىلگەن جەڭىل كيىم، باس كيىم جانە كۇننەن قورعايتىن كوزىلدىرىك كيۋگە كەڭەس بەرەدى.
سونداي-اق، سۇيىقتىقتى جەتكىلىكتى مولشەردە ءىشۋ وتە ماڭىزدى. مەديسينالىق قارسى كورسەتىلىم بولماسا، ەرەسەكتەرگە تاۋلىگىنە كەمىندە 2 ليتر سۋ ءىشۋ ۇسىنىلادى. سونىمەن قاتار الكوگولدى ىشىمدىكتەردى، ءتاتتى گازدالعان سۋسىنداردى جانە كوفەنى شامادان تىس تۇتىنۋدى شەكتەۋ قاجەت.
ەگەر ادامنىڭ باسى قاتتى اۋىرىپ، باسى اينالسا، السىزدىك، جۇرەك اينۋ، سانانىڭ شاتاسۋى، دەنە قىزۋىنىڭ كوتەرىلۋى نەمەسە ەسىنەن تانۋ بەلگىلەرى بايقالسا، ونى دەرەۋ سالقىن جەرگە اپارىپ، دەنەسىن سالقىنداتۋ شارالارىن جاساپ، از-ازدان سۋ بەرىپ، جەدەل مەديسينالىق جاردەم شاقىرۋ قاجەت.
الماتى قالاسى قوعامدىق دەنساۋلىق ساقتاۋ باسقارماسى قاراپايىم ساقتىق شارالارىن ساقتاۋ جانە ۋاقىتىلى مەديسينالىق كومەككە جۇگىنۋ اپتاپ ىستىق كەزىندە دەنساۋلىققا تونەتىن قاۋىپ-قاتەردى ازايتۋعا كومەكتەسەتىنىن ەسكە سالادى.
