الماتىدا قالا اكىمدىگىنىڭ قولداۋىمەن مۋزىكا جانە كرەاتيۆتى يندۋستريانى دامىتۋعا ارنالعان جاڭا كوپفۋنكسيونالدى Almaty Studios كەڭىستىگى اشىلادى، - دەپ حابارلايدى alnews.
جوبانىڭ باستاماشىسى – مۋزىكانت، كومپوزيتور، A’STUDIO توبىنىڭ جەتەكشىسى بايعالي سەركەبايەۆ. بۇل تۋرالى الماتى قالاسى تۋريزم باسقارماسىنىڭ وكىلدەرى ايتتى.
مۇندا مۋزىكا ۇيرەنۋگە، دايىندىق وتكىزۋگە، مۋزىكالىق شىعارمالاردى جازۋعا، ءتۇسىرىلىم مەن كونسەرت ۇيىمداستىرۋعا جاعداي جاسالادى. كەڭىستىك ونەر جولىن ەندى باستاعان مۋزىكانتتارعا دا، كاسىبي ورىنداۋشىلارعا دا ارنالعان.
قالانىڭ تاۋلى بولىگىندە، وزەن جاعاسىندا ورنالاسقان كەشەندە دىبىس جازۋ ستۋدياسى، دايىندىق زالى، وقۋ سىنىپتارى، ءتۇسىرىلىم پاۆيلونى جانە 100 ادامعا ارنالعان شاعىن كونسەرت زالى بار. مۇندا شەبەردىڭ دارىستەرىن، شىعارماشىلىق كەزدەسۋلەر مەن جاڭا مۋزىكالىق جوبالاردىڭ تانىستىرىلىمدارىن وتكىزۋ دە جوسپارلانعان.
«مەن ءۇشىن Almaty Studios جاس جانە تاجىريبەلى مۋزىكانتتار كەزدەسىپ، ءوزارا تاجىريبە الماساتىن، پىكىرلەس ادامداردى تاباتىن جانە شىعارماشىلىق يدەياسىن جۇزەگە اسىراتىن ورتاعا اينالعانى ماڭىزدى»، – دەدى بايعالي سەركەبايەۆ.
جوبا ۇيىمداستىرۋشىلارىنىڭ ايتۋىنشا، كەشەن جەرگىلىكتى مۋزىكانتتاردىڭ شىعارماشىلىق جۇمىسىنا جانە بىرلەسكەن جوبالاردى ىسكە اسىرۋعا پايدالانىلماق. سونىمەن قاتار مۇندا مادەني جانە وقيعالىق ءتۋريزمدى دامىتۋعا باعىتتالعان ءىس-شارالار وتكىزۋ كوزدەلگەن.
