3 تامىز الماتى قالاسىندا دۇنيەجۇزىلىك جاستار كۇنىنە ارنالعان ALMA LOVE 2026 قالالىق جاستار فەستيۆالى اياسىندا Jas Vibe مەرەكەلىك اكسياسى باستاۋ الدى، - دەپ حابارلايدى alnews.
جوبا 12 تامىزعا دەيىن جالعاسىپ، قالا تۇرعىندارىنا مەرەكەلىك كوڭىل كۇي سىيلاۋعا جانە فەستيۆالدىڭ قورىتىندى ءىس-شارالارىنا شاقىرۋعا باعىتتالعان.
ون كۇن بويى الماتى كوشەلەرىندە ارنايى برەندتەلگەن اۆتوبۋس قاتىناپ، قالا ماسكوتتارى مەن «جاس الماتى» بەلسەندىلەرى تۇرعىنداردى كەلە جاتقان مەرەكەمەن قۇتتىقتاپ، ءتۇرلى ينتەراكتيۆتەر ۇيىمداستىرادى، كوتەرىڭكى كوڭىل كۇي سىيلاپ، بارشا الماتىلىقتاردى 12 تامىز كۇنى وتەتىن فەستيۆالدىڭ قورىتىندى كونسەرتىنە شاقىرادى.
اكسيا بارىسىندا ينتەراكتيۆتەر مەن ويىندارعا بەلسەندى قاتىسقان تۇرعىندارعا ALMA LOVE 2026 فەستيۆالىنىڭ قورىتىندى كونسەرتىنە ارنالعان فان-ايماققا شاقىرۋ بيلەتى تابىستالادى.
جوبا جاستاردىڭ قوعامدىق بەلسەندىلىگىن ارتتىرۋعا، قالالىق بىرلىك پەن دوستىق رۋحىن قالىپتاستىرۋعا، سونداي-اق جاستار مادەنيەتىن دامىتۋعا باعىتتالعان.
«وسىنداي مەرەكەلىك جوبالاردىڭ قالانىڭ ءار اۋدانىندا ءوتىپ جاتقانى وتە قۋانتادى. بۇل ادامداردى بىرىكتىرەدى، جاقسى كوڭىل كۇي سىيلايدى جانە جاستاردىڭ باستامالارىنا قىزىعۋشىلىقتى ارتتىرادى. مىندەتتى تۇردە فەستيۆالدىڭ قورىتىندى كونسەرتىنە قاتىسامىن»، - دەپ اتاپ ءوتتى اكسياعا قاتىسقان الماتى قالاسىنىڭ جاس تۇرعانى.
ALMA LOVE 2026 فەستيۆالى الماتى قالاسى اكىمدىگىنىڭ قولداۋىمەن ۇيىمداستىرىلىپ، دۇنيەجۇزىلىك جاستار كۇنىنە وراي مادەني، سپورتتىق، ءبىلىم بەرۋ، ەكولوگيالىق جانە الەۋمەتتىك باعىتتاعى ونداعان ءىس-شارانى بىرىكتىرەدى.
