بۇگىن الماتىنىڭ جەتىسۋ اۋدانىنداعى «Adem» ساۋدا ورتالىعىندا قالالىق كىتاپحانالاردىڭ كىتاپ بەرۋ پۋنكتى اشىلدى، - دەپ حابارلايدى alnews.
جوبا مەملەكەت باسشىسى قاسىم-جومارت توقايەۆتىڭ «وقيتىن ۇلت» جوباسى اياسىندا قالا اكىمى دارحان ساتىبالدىنىڭ تاپسىرماسىمەن جۇزەگە اسىرىلىپ وتىر. جوبانىڭ نەگىزگى ماقساتى – قالا تۇرعىندارى ءۇشىن كىتاپتىڭ قولجەتىمدىلىگىن ارتتىرۋ، كىتاپ وقۋعا قىزىعۋشىلىق قالىپتاستىرۋ جانە وقۋ مادەنيەتىن دامىتۋ.
ءىس-شاراعا بەلگىلى جازۋشى نۇرداۋلەت اقىش، اقىن باقىت بەدەلحان، ايتىسكەر اقىن سەرىك قالي، اقىن مۇراتحان شوقان، جەتىسۋ اۋدانى اكىمىنىڭ ورىنباسارى جاناسىل سابىر ۇلى، مادەنيەت سالاسىنىڭ وكىلدەرى مەن قالا تۇرعىندارى قاتىستى.
جاڭا نىساندى جەتىسۋ اۋدانى اكىمىنىڭ ورىنباسارى جاناسىل سابىر ۇلى مەن جازۋشى نۇرداۋلەت اقىش سالتاناتتى تۇردە اشتى. باستامانى قولداعان قالامگەرلەر كىتاپتارىن سىيعا تارتىپ، جاڭا كىتاپ بەرۋ پۋنكتىنىڭ قورىن قۇندى تۋىندىلارمەن تولىقتىردى.
الماتى كىتاپحانالارىنىڭ №14 فيليالىنىڭ مەڭگەرۋشىسى زارينا ايدوس قىزى بۇل باستامانىڭ تۇرعىندار ءۇشىن كىتاپحانا قىزمەتىنىڭ قولجەتىمدىلىگىن ارتتىرۋداعى ءرولىن اتاپ ءوتتى.
«جاڭا كىتاپ بەرۋ پۋنكتىنىڭ اشىلۋى – قولجەتىمدى كىتاپحانا ورتاسىن دامىتۋداعى ماڭىزدى قادام. مۇنداي كەڭىستىكتەر كىتاپحانا قىزمەتىنىڭ ءداستۇرلى فورمات اياسىنان شىعىپ، قالا تۇرعىندارىنىڭ كۇندەلىكتى ءومىرىنىڭ ءبىر بولىگىنە اينالۋىنا مۇمكىندىك بەرەدى. جاڭا پۋنكت كىتاپ وقۋعا قىزىعۋشىلىقتى ارتتىرۋعا، وقۋ مادەنيەتىن دامىتۋعا جانە «وقيتىن ۇلت» قالىپتاستىرۋعا ىقپال ەتىپ، تۇرعىندار ءجيى كەلەتىن ورىنداردىڭ بىرىنە اينالادى دەپ سەنەمىن»، – دەدى زارينا ايدوس قىزى.
كىتاپ بەرۋ پۋنكتىنىڭ اشىلۋىن ساۋدا ورتالىعىنىڭ كاسىپكەرلەرى دە وڭ باعالادى. كاسىپكەر زالينانىڭ ايتۋىنشا، مۇنداي باستاما كىتاپتى تۇرعىنداردىڭ كۇندەلىكتى ءومىرىنىڭ ءبىر بولىگىنە اينالدىرۋعا مۇمكىندىك بەرەدى.
«ءبىز ءۇشىن ءدال وسى ساۋدا ورتالىعىندا كىتاپ بەرۋ پۋنكتىنىڭ اشىلۋى جاعىمدى جاڭالىق بولدى. كۇندەلىكتى تىرشىلىكتە كىتاپحاناعا ارنايى بارىپ، كىتاپ الۋعا ءاردايىم مۇمكىندىك بولا بەرمەيدى. ەندى جۇمىس ورنىنان الىسقا بارماي-اق، بوس ۋاقىتتا وسىندا كەلىپ، قاجەتتى كىتاپتى الۋعا بولادى. مەنىڭ ويىمشا، بۇل وسىندا جۇمىس ىستەيتىن كاسىپكەرلەر مەن قىزمەتكەرلەر ءۇشىن عانا ەمەس، ساۋدا ورتالىعىنا كەلۋشىلەر ءۇشىن دە جاقسى مۇمكىندىك. كىتاپتاردىڭ قولجەتىمدى بولا ءتۇسىپ، وسىنداي ورىنداردا ۇسىنىلعانى قۋانتادى»، – دەدى ول.
«Adem» ساۋدا ورتالىعىنىڭ كاسىپكەرلەرى مەن كەلۋشىلەرى العاشقى كۇندەردەن-اق «وقيتىن ۇلت» يدەياسىن جۇزەگە اسىرۋعا باعىتتالعان باستامانى قولداپ، وعان ۇلكەن قىزىعۋشىلىق تانىتىپ وتىر. بۇگىندە اتالعان كىتاپ بەرۋ پۋنكتىنىڭ قورىندا 2 000-نان استام كىتاپ بار. الداعى ۋاقىتتا تۇرعىنداردى كەڭىنەن قامتۋ جانە قالا تۇرعىندارى ءۇشىن كىتاپتىڭ قولجەتىمدىلىگىن ارتتىرۋ ماقساتىندا قالانىڭ وزگە اۋداندارىنداعى ساۋدا ورتالىقتارىندا دا كىتاپ بەرۋ پۋنكتتەرىن اشۋ جوسپارلانىپ وتىر.
جاڭا كىتاپ بەرۋ پۋنكتى سەيسەنبىدەن جەكسەنبىگە دەيىن ساعات 09:00-دەن 18:00-گە دەيىن جۇمىس ىستەيدى. جەتىسۋ اۋدانىنىڭ تۇرعىندارى مەن «Adem» ساۋدا ورتالىعىنا كەلۋشىلەردىڭ بارلىعىن جاڭا كىتاپ بەرۋ پۋنكتىنە كەلىپ، كوڭىلىنەن شىعاتىن كىتاپتى تاڭداپ، جاڭا تۋىندىلارمەن تانىسۋعا شاقىرامىز!
ايتا كەتەيىك، بۇگىندە الماتىدا بارلىعى 39 كىتاپحانا جۇمىس ىستەيدى. ونىڭ 30-ى – قالا كىتاپحاناسى، 7-ەۋى تاۋلىك بويى جۇمىس ىستەيدى. سونىمەن قاتار قالاداعى ادام كوپ جينالاتىن ورىنداردا وزىنە-وزى قىزمەت كورسەتەتىن 32 دەربەس كىتاپحانا ورنالاسقان.
