26-31 تامىز ارالىعىندا الماتىداعى بالۋان شولاق اتىنداعى سپورت سارايىندا قالا اكىمدىگىنىڭ قولداۋىمەن FIBA ازيا كۋبوگى – 2029 ءتۋرنيرىنىڭ الدىن الا ىرىكتەۋ كەزەڭى ءبىرىنشى راۋندىنىڭ ۆ توبىنداعى ماچتارى وتەدى، - دەپ حابارلايدى alnews.
قازاقستان 2029 جىلعى تۋرنيرگە قاتىسۋشىلاردى انىقتايتىن جاڭارتىلعان ىرىكتەۋ جۇيەسىنىڭ باستاپقى كەزەڭىندەگى ويىنداردى العاش رەت قابىلداپ وتىر. بۇل تۋرالى قالالىق سپورت باسقارماسىنىڭ وكىلدەرى ايتتى.
الماتى وسى راۋندتىڭ ماچتارى وتەتىن ورتالىق ازياداعى جالعىز قالا بولماق. ءدال وسى كەزەڭنىڭ ماچتارى دۋبايدا (ءباا)، سەرەمباندا (مالايزيا) جانە ۇلان-باتىردا (موڭعوليا) دا ۇيىمداستىرىلادى. الدىن الا ىرىكتەۋدىڭ ءبىرىنشى راۋندىنا ءتورت توپقا بولىنگەن 18 ۇلتتىق قۇراما قاتىسادى.
الماتىدا قازاقستان قۇراماسى پالەستينا، شري-لانكا، مالديۆ ارالدارى جانە قىرعىزستان كوماندالارىمەن كەزدەسەدى. تۋرنير اينالمالى جۇيە بويىنشا ءوتىپ، توپتاعى ۇزدىك ءۇش قۇراما الدىن الا ىرىكتەۋدىڭ ەكىنشى راۋندىنا جولداما الادى.
بۇل تۋرنير قازاقستان قۇراماسىنا توپتىق كەزەڭدەگى بارلىق كەزدەسۋىن ءوز الاڭىندا، جانكۇيەرلەرىنىڭ قولداۋىمەن وتكىزۋگە مۇمكىندىك بەرەدى.
ەكىنشى راۋندتىڭ قورىتىندىسى بويىنشا FIBA ازيا كۋبوگى – 2029 ءتۋرنيرىنىڭ ىرىكتەۋ كەزەڭىندە جارىستى جالعاستىراتىن كوماندالار انىقتالادى. بۇل كەزەڭدە ولارعا 2025 جىلى جيددادا وتكەن تۋرنيرگە قاتىسقان 16 قۇراما قوسىلادى.
قازاقستان قۇراماسى 1992 جىلدان بەرى قۇرلىقتىق دەڭگەيدەگى جارىستارعا قاتىسىپ كەلەدى. كوماندانىڭ ۇزدىك ناتيجەسى – 2007 جىلعى ازيا چەمپيوناتىنداعى ءتورتىنشى ورىن. سول جارىستا قازاقستاندىقتار جارتىلاي فينالعا دەيىن جەتتى. الدىڭعى ىرىكتەۋ كەزەڭىندە ۇلتتىق قۇراما ءۇندىستان مەن كاتاردى جەڭگەنىمەن، 2025 جىلعى ازيا كۋبوگىنىڭ فينالدىق كەزەڭىنە شىعا المادى.
الماتىدا الدىن الا ىرىكتەۋ ماچتارىنىڭ ءوتۋى قالانىڭ حالىقارالىق باسكەتبول باعىتىنداعى باستامالارىنىڭ جالعاسى بولماق. بۇعان دەيىن الماتىدا ورتالىق ازيا باسكەتبول قاۋىمداستىعى ۇيلەستىرۋ كەڭەسىنىڭ وتىرىسى وتكەن، ال قازاقستان وكىلدەرى FIBA Asia قۇرىلىمدارىنىڭ جۇمىسىنا قاتىسىپ كەلەدى.
تۋرنير جاس سپورتشىلار مەن ستۋدەنتتەرگە حالىقارالىق دەڭگەيدەگى باسكەتبول باسەكەسىن تىكەلەي تاماشالاۋعا مۇمكىندىك بەرەدى. ەلىمىزدە التى ءوڭىردىڭ جاس باسكەتبولشىلارىن قامتيتىن NBA Kazakhstan باعدارلاماسى، سونداي-اق ۇلتتىق ستۋدەنتتىك باسكەتبول ليگاسى جۇمىس ىستەيدى، دەپ ءتۇسىندىردى الماتى قالاسىنىڭ سپورت باسقارماسىنىڭ وكىلدەرى.
