2026 جىلى 15 قىركۇيەك پەن 25 قازان ارالىعىندا الماتىدا كەمىرگىشتەرگە قارسى كۇزگى جاپپاي دارىلەۋ جۇرگىزىلەدى، - دەپ حابارلايدى alnews.
كەمىرگىشتەر مەكەندەيتىن اشىق اۋماقتاردا جالپى كولەمى 47 مىڭ گەكتاردان اساتىن قوعامدىق پايدالانۋداعى جەرلەر دارىلەنەدى. بۇل تۋرالى قالالىق كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنىڭ وكىلدەرى حابارلادى.
كۇزگى كەزەڭ اياسىندا ماماندار جاسىل ايماقتاردى، اشىق بيوتوپتاردى، كەمىرگىشتەردىڭ ىندەرىن، ارىق جەلىلەرىن، وزەندەر مەن سۋ ايدىندارىنىڭ جاعالاۋلارىن، سونداي-اق قوعامدىق كولىك ايالدامالارىنىڭ اۋماقتارىن دارىلەيدى. جەكە سەكتور تۇرعىندارىنا ارنايى جەم تەگىن تاراتىلادى. جەممەن بىرگە ونى ءقاۋىپسىز ءارى دۇرىس قولدانۋ ءتارتىبى ءتۇسىندىرىلىپ، ءتيىستى نۇسقاۋلىق بەرىلەدى.
قازاقستان رەسپۋبليكاسىنىڭ «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنىڭ 107-بابىنا سايكەس، جەكە جانە زاڭدى تۇلعالار دەزينفەكسيا، دەزينسەكسيا جانە دەراتيزاسيا جۇمىستارىن ءوز قاراجاتى ەسەبىنەن جۇرگىزۋگە مىندەتتى.
سول سەبەپتى جەكە اۋماقتار، جەر ۋچاسكەلەرى، عيماراتتار مەن قۇرىلىستاردى دارىلەۋ جۇمىستارىن ولاردىڭ يەسى جۇرگىزەدى. كوپپاتەرلى تۇرعىن ۇيلەردىڭ جەرتولەلەرى، شاتىرلارى، باسپالداق الاڭدارى مەن اۋلا اۋماقتارىمەن قاتار، ورتاق مۇلىكتەگى دەراتيزاسيا جۇمىستارى پيك نەمەسە ميب قاراجاتى ەسەبىنەن جۇزەگە اسىرىلادى. سونداي-اق، بۇل جۇمىستارعا ءۇي-جايلاردىڭ يەلەرى مەن جالعا الۋشىلارى جاۋاپتى.
دارىلەۋ جۇمىستارىنىڭ تيىمدىلىگىن ارتتىرۋ ماقساتىندا زاڭدى تۇلعالارعا، پيك، ميب جانە باسقا دا جاۋاپتى ۇيىمدارعا قاراماعىنداعى عيماراتتار، اۋماقتار مەن قوقىس كونتەينەرلەرى ورنالاسقان الاڭداردا دەراتيزاسيا جۇمىستارىن قالالىق ىس-شارالارمەن بىرگە جۇرگىزۋ ۇسىنىلادى.
