الماتىدا جالپى قۇنى 2،7 ترلن تەڭگەدەن اساتىن 170 ينۆەستيسيالىق جوبا جۇزەگە اسىرىلىپ جاتىر، - دەپ حابارلايدى alnews.
ولاردى ىسكە اسىرۋ اياسىندا 32 مىڭعا جۋىق جۇمىس ورنىن اشۋ كوزدەلگەن. بۇل تۋرالى قالالىق كاسىپكەرلىك جانە ينۆەستيسيالار باسقارماسىنىڭ وكىلدەرى ايتتى.
2026 جىلدىڭ توعىز ايىنىڭ قورىتىندىسى بويىنشا نەگىزگى كاپيتالعا سالىنعان ينۆەستيسيا كولەمى 1،69 ترلن تەڭگە بولدى. ينۆەستيسيانىڭ باسىم بولىگى جىلجىمايتىن مۇلىك، كولىك جانە قويمالاۋ، سونداي-اق اقپارات جانە بايلانىس سالالارىنا باعىتتالدى.
Almaty Innovation & Financial Zone (AIFZ) ارنايى ەكونوميكالىق ايماعىن دامىتۋ جەكە باعىتتاردىڭ ءبىرى بولىپ قالا بەرەدى. ءقازىر ونىڭ اۋماعىندا 2،3 مىڭعا جۋىق جۇمىس ورنىن اشۋدى كوزدەيتىن 31 جوبا جۇزەگە اسىرىلىپ جاتىر.
2026 جىلى ارنايى ەكونوميكالىق ايماقتا التى جوبانى ىسكە قوسۋ جوسپارلانعان. بيىل ايماقتىڭ اتاۋى Almaty Innovation & Financial Zone بولىپ وزگەرتىلىپ، ونىڭ جۇمىس ىستەۋ مەرزىمى 2049 جىلى 31 جەلتوقسانعا دەيىن ۇزارتىلدى.
سونىمەن قاتار قالادا شاعىن جانە ورتا كاسىپكەرلىكتى قولداۋ جۇمىستارى جالعاسىپ جاتىر. بيىل وسى ماقساتقا 41،2 ملرد تەڭگە قاراستىرىلعان. ونىڭ 26 ملرد تەڭگەسى جەرگىلىكتى بيۋدجەتتەن، ال 15،2 ملرد تەڭگەسى رەسپۋبليكالىق بيۋدجەتتەن ءبولىندى.
بۇل قاراجات 452 بيزنەس-جوبانى قولداۋعا باعىتتالعان.
باسقارما وكىلدەرىنىڭ مالىمەتىنشە، الماتىدا 368 مىڭ شاعىن جانە ورتا كاسىپكەرلىك سۋبەكتىسى جۇمىس ىستەيدى. ولار وندىرگەن ءونىم كولەمى 5،1 ترلن تەڭگەدەن استى.
شاعىن جانە ورتا بيزنەستىڭ قالانىڭ جالپى وڭىرلىك ونىمىندەگى ۇلەسى 52،1% بولادى. 2026 جىلدىڭ ءبىرىنشى توقسانىنىڭ دەرەكتەرى بويىنشا وسى سالادا 828،1 مىڭ ادام جۇمىسپەن قامتىلعان.
