الماتىنىڭ ناۋرىزباي اۋدانىنداعى اسقاروۆ كوشەسى، 33/2 مەكەنجايىندا ورنالاسقان سۋ قۇبىرى نىسانىن قايتا جاڭعىرتۋ جۇمىستارى اياقتالدى، - دەپ حابارلايدى alnews.
نىسان ناۋرىزباي جانە بوستاندىق اۋداندارىنىڭ شامامەن 15 مىڭ تۇرعىنىن سۋمەن قامتاماسىز ەتەدى. بۇل تۋرالى الماتى قالاسى ەنەرگەتيكا جانە سۋمەن جابدىقتاۋ باسقارماسىنىڭ وكىلدەرى ايتتى.
جۇمىس بارىسىندا ەكىنشى كوتەرىلىمدەگى جاڭا سورعى ستانسياسى سالىنىپ، وعان بەس سورعى ورناتىلدى. ونىڭ ۇشەۋى تۇراقتى جۇمىس ىستەسە، ەكەۋى رەزەرۆتە بولادى. سونىمەن قاتار جالپى سىيىمدىلىعى 2 مىڭ تەكشە مەتر بولاتىن ەكى تازا سۋ رەزەرۆۋارى جاڭعىرتىلىپ، ينجەنەرلىك جەلىلەر جاڭارتىلدى. سونداي-اق، زاماناۋي اۆتوماتتى باقىلاۋ جۇيەسى ورناتىلدى.
بۇدان بولەك، ترانسفورماتور قوسالقى ستانسياسى ورنالاسقان قىزمەتتىك عيمارات قايتا جاڭعىرتىلىپ، جاڭا باقىلاۋ-وتكىزۋ پۋنكتى سالىندى. ەلەكترمەن جابدىقتاۋ، سىرتقى جارىقتاندىرۋ جانە قاۋىپسىزدىك جۇيەلەرى دە جاڭارتىلدى.
نىسان پايدالانۋعا بەرىلدى. باسقارمانىڭ مالىمەتىنشە، جۇرگىزىلگەن جاڭعىرتۋ جۇمىستارى سۋ قۇبىرى جەلىسىندەگى قىسىمدى تۇراقتى ۇستاپ تۇرۋعا، اسىرەسە سۋ تۇتىنۋ كولەمى ارتاتىن ۋاقىتتا، سونداي-اق سۋ بەرۋدەگى ىركىلىستەردىڭ الدىن الۋعا مۇمكىندىك بەرەدى.
