الماتىداعى 38 قالالىق ەمحانادا مەرزىمى وتكەن دارى-دارمەكتەردى جيناۋعا ارنالعان ارنايى كونتەينەرلەر ورناتىلعان. بىلتىر جازدان بەرى ءبىر جىل ىشىندە تۇرعىندار وسى كونتەينەرلەرگە 1 200 كەلىگە جۋىق دارى-دارمەك قالدىعىن تاپسىردى. جينالعان قالدىقتار ءقاۋىپسىز جولمەن جويۋعا جىبەرىلدى. بۇل تۋرالى «Eco Almaty» ج ش س ماماندارى ايتتى.
جوبانى ECO Network ەكولوگيالىق قاۋىمداستىعى STADA فارماسيەۆتيكالىق كومپانياسىمەن بىرلەسىپ جۇزەگە اسىرىپ كەلەدى. ورناتىلعان كونتەينەرلەردىڭ ارقاسىندا تۇرعىندار جارامدىلىق مەرزىمى وتكەن دارى-دارمەكتەردى تۇرمىستىق قوقىستان بولەك جيناۋعا تاپسىرادى.
دارى-دارمەك جيناۋ پۋنكتتەرىنىڭ جۇمىسىن باعالاۋعا Satbayev University ستۋدەنتتەرى قاتىستى. ەرىكتىلەر 34 ەمحانانى ارالاپ، تۇرعىنداردىڭ جوبا تۋرالى حاباردار بولۋىن جانە مەديسينا قىزمەتكەرلەرىنىڭ باستاماعا قاتىسۋ بەلسەندىلىگىن باعالادى. تەكسەرىلگەن ەمحانالاردىڭ 70%-دان استامى جوعارى ناتيجە كورسەتتى.
ەسكە سالايىق، شىلدە ايىندا دارى-دارمەك جيناۋ بويىنشا №1 قالالىق ەمحانا كوش باستاپ، 79،5 كەلى قالدىق جينادى. ۇزدىك بەستىككە №23 ەمحانا – 71،45 كەلى، №4 ەمحانا – 70،2 كەلى، №17 ەمحانا – 66،6 كەلى جانە №12 ەمحانا – 65،6 كەلى كورسەتكىشپەن ەندى.
مەرزىمى وتكەن دارىلەردى بولەك جيناۋ قورشاعان ورتانىڭ لاستانۋ ءقاۋپىن ازايتۋعا كومەكتەسەدى. تۇرمىستىق قوقىسقا تاستالعان نەمەسە كارىز جۇيەسىنە توگىلگەن دارىلىك زاتتار توپىراق پەن سۋعا ءتۇسۋى مۇمكىن. ۇيىمداستىرۋشىلاردىڭ ايتۋىنشا، ارنايى كونتەينەرلەر مۇنداي قالدىقتاردى بولەك جيناپ، ءقاۋىپسىز جولمەن جويۋعا جىبەرۋگە مۇمكىندىك بەرەدى.
