الماتىدا 1 قىركۇيەككە دەيىن 15 ماگيسترالدىق كوشەدە ورتاشا جوندەۋ اياقتالدى، - دەپ حابارلايدى alnews.
الماتىدا بيىل جالپى ۇزىندىعى 250 شاقىرىم بولاتىن 340 كوشەنى ورتاشا جوندەۋمەن قامتۋ جوسپارلانعان. سونىڭ ناتيجەسىندە جاقسى جانە قاناعاتتانارلىق جاعدايداعى جولدىڭ ۇلەسى 95%-عا دەيىن جەتكىزىلەدى.
جول ينفراقۇرىلىمىن دامىتۋ باسقارماسى وكىلدەرىنىڭ مالىمەتىنشە، 1 قىركۇيەككە دەيىن جالپى ۇزىندىعى 32 شاقىرىم بولاتىن 15 ماگيسترالدىق كوشەنىڭ ۋچاسكەلەرىندە جوندەۋ اياقتالدى. ولار – زەنكوۆ، جاماقايەۆ، جەتىسۋ، شەمياكين، مامبەتوۆ، رىسقۇلبەكوۆ، جانقوجا باتىر، ەسكەندىروۆ، اقان سەرى، ماناس، عابدۋللين، جاندوسوۆ، ورتالىق، ۇشكەمپىروۆ كوشەلەرى مەن قۇلجا تاسجولىنىڭ ۋچاسكەلەرى.
جۇبانوۆ، وتەگەن باتىر كوشەلەرىنىڭ، سونداي-اق التىنسارين جانە اباي داڭعىلدارىنىڭ اۋماقتارىندا اسفالتبەتون جابىنىنىڭ تومەنگى قاباتى توسەلدى. الداعى دەمالىس كۇندەرى تىعىز قيىرشىق تاس-ماستيكالىق اسفالتبەتون قوسپاسىنان جابىننىڭ جوعارعى قاباتى توسەلەدى. ودان كەيىن جول تاڭباسى سىزىلادى.
ورتاشا جوندەۋ اياسىندا توسەم جول بويىندا بۇكىل ەنى بويىنشا جاڭارتىلىپ، جۇرگىنشى جولى مەن ارىق ناۋالارىنىڭ بۇلىنگەن ۋچاسكەلەرى جوندەلەدى.
اۋداندىق ماڭىزى بار كوشەلەرگە ەرەكشە نازار اۋدارىلىپ وتىر. بيىل الاتاۋ اۋدانىندا 99 كوشە، اۋەزوۆ اۋدانىندا – 16، ناۋرىزباي اۋدانىندا – 19، بوستاندىق اۋدانىندا – 39، تۇركسىب اۋدانىندا – 21، جەتىسۋ اۋدانىندا – 44، مەدەۋ اۋدانىندا – 78 جانە المالى اۋدانىندا 1 كوشە ورتاشا جوندەۋدەن وتەدى. بۇگىندە جۇمىستار 70%-عا ورىندالدى، 31 قازانعا دەيىن تولىق اياقتاۋ جوسپارلانعان.
سونىمەن قاتار جول ينفراقۇرىلىمىن دامىتۋ باسقارماسى بيىل اقجار، بورالداي جانە راحات-مادەنيەت شاعىناۋداندارىندا جالپى ۇزىندىعى 96 شاقىرىم بولاتىن جاڭا جولدىڭ قۇرىلىسىن جالعاستىرىپ وتىر. بۇگىندە جۇمىستاردىڭ 80%-دان استامى اياقتالدى.
