الماتىنىڭ باس جوسپارى تۋرالى اقپاراتتىڭ قولجەتىمدىلىگىن ارتتىرۋ جانە قالا تۇرعىندارىمەن تىكەلەي بايلانىس ورناتۋ ماقساتىندا «الماتىباسجوسپار» تۇرعىنداردىڭ ءوتىنىشىن قابىلدايتىن بايلانىس ورتالىعىن ىسكە قوستى، - دەپ حابارلايدى alnews.
جاڭا بايلانىس فورماتىنىڭ نەگىزگى مىندەتى – قالا تۇرعىندارىنا الماتىنىڭ دامۋى، باس جوسپاردىڭ نەگىزگى ەرەجەلەرى جانە ونىڭ ناقتى اۋماقتارعا ىقتيمال اسەرى تۋرالى تۇسىنىكتى ءارى سەنىمدى اقپارات ۇسىنۋ.
تۇرعىندار بايلانىس ورتالىعىنا تىكەلەي حابارلاسىپ، باس جوسپارعا قاتىستى سۇراق قويا الادى، ناقتى اۋماقتار بويىنشا اقپاراتتى ناقتىلاپ، جىلجىمايتىن مۇلىك پەن جەر تەلىمىنە قاتىستى قۇجاتتارعا بايلانىستى تۋىندايتىن ماسەلەلەر جونىندە تۇسىنىكتەمە الا الادى.
«باس جوسپار بۇكىل قالانىڭ دامۋىنا اسەر ەتەتىن كۇردەلى قالا قۇرىلىسى قۇجاتى ەكەنىن تۇسىنەمىز. تۇرعىندارمەن وتكەن كەزدەسۋلەردەن كەيىن كوپتەگەن الاڭداۋشىلىقتىڭ الماتىنىڭ دامۋىنا قارسىلىقتان ەمەس، باس جوسپاردا ناقتى نە قاراستىرىلعانى جانە ونىڭ بەلگىلى ءبىر اۋماققا قالاي اسەر ەتۋى مۇمكىن ەكەنى تۋرالى تۇسىنىكتى ءارى ناقتى اقپاراتتىڭ جەتكىلىكسىزدىگىنەن تۋىندايتىنىن بايقادىق»، – دەدى «الماتىباسجوسپار» باس ديرەكتورى اسحات سادۋوۆ.
ونىڭ ايتۋىنشا، الەۋمەتتىك جەلىلەردە باس جوسپار تۋرالى قالا قۇرىلىسى سالاسىندا كاسىبي ءبىلىمى جوق ادامدار تاراتاتىن اقپارات كوپ. سونىڭ سالدارىنان كۇردەلى ماسەلەلەر كەيدە تىم قاراپايىم تۇردە ءتۇسىندىرىلىپ نەمەسە اقپارات بۇرمالانىپ بەرىلەدى. بۇل تۇرعىنداردىڭ الاڭداۋشىلىعىن ودان ءارى كۇشەيتەدى.
«سوندىقتان ءار ادام رەسمي دەرەككوزدەن اقپارات الا الاتىن تىكەلەي ءارى قولجەتىمدى بايلانىس ارناسىن قۇرۋدى ماڭىزدى دەپ سانايمىز. سونىمەن قاتار ءار وتباسىنىڭ وزىندىك ناقتى جاعدايى بولۋى مۇمكىن ەكەنىن تۇسىنەمىز. سول سەبەپتى بايلانىس ورتالىعىندا جالپى تۇسىندىرمەلەرمەن قاتار، جەر ۋچاسكەلەرى مەن جىلجىمايتىن مۇلىككە قاتىستى قۇجاتتار بويىنشا جەكە كەڭەس تە بەرىلەدى. ءبىزدىڭ مىندەتىمىز – تۇرعىندارعا جاعدايىن تۇسىنۋگە، قولىنداعى قۇجاتتاردى انىقتاۋعا، قانداي ماسەلەلەر قوسىمشا راسىمدەۋدى نەمەسە ناقتىلاۋدى قاجەت ەتەتىنىن بىلۋگە جانە ولاردى شەشۋ ءۇشىن قايدا جۇگىنۋ كەرەكتىگىن تۇسىندىرۋگە كومەكتەسۋ»، – دەدى اسحات سادۋوۆ.
بايلانىس ورتالىعىنىڭ جۇمىسىمەن قاتار تۇرعىندارمەن ءتۇسىندىرۋ كەزدەسۋلەرى، جەكە كەڭەس جانە حالىقتىڭ باس جوسپار مەن ونىڭ جۇزەگە اسىرىلۋى تۋرالى حاباردارلىعىن ارتتىرۋعا باعىتتالعان وزگە دە ءىس-شارالار وتكىزىلەدى.
تۇرعىندارعا ىڭعايلى بولۋ ءۇشىن «الماتىباسجوسپاردىڭ» الەۋمەتتىك جەلىلەردەگى رەسمي پاراقشالارىندا سوڭعى اقپارات، تۇسىندىرمەلەر جانە ءجيى قويىلاتىن سۇراقتارعا جاۋاپتار جاريالانىپ وتىرادى.
بايلانىس ورتالىعى:
WhatsApp: +7 705 653 8357
Instagram: @almaty_genplan
TikTok: @almatygenplan
Threads: @almaty_genplan
«الماتىباسجوسپار» تۇرعىنداردى باس جوسپار تۋرالى اقپاراتتى رەسمي دەرەككوزدەردەن الۋعا جانە تۋىنداعان سۇراقتار بويىنشا تىكەلەي حابارلاسۋعا شاقىرادى. بۇل تۇسىنبەۋشىلىكتىڭ الدىن الۋعا، تارالىپ جاتقان اقپاراتتىڭ دۇرىستىعىن تەكسەرۋگە جانە ءاربىر ناقتى جاعدايعا قاراي تۇسىندىرمە الۋعا مۇمكىندىك بەرەدى.
