الماتى ۆولونتەرلەرى جاستار اراسىندا، ازاماتتاردىڭ قاۋىپسىزدىك سالاسىنداعى ءبىلىم دەڭگەيىن ارتتىرۋعا، جاۋاپكەرشىلىك قالىپتاستىرۋعا جانە قاتىسۋىن كەڭەيتۋگە باعىتتالعان تۇسىندىرمە جۇمىستارىن وتكىزۋدە. ءىس-شارا الماتى قالاسى جاستار ساياساتى باسقارماسى جانە قالالىق توتەنشە جاعدايلار دەپارتامەنتىنىڭ قولداۋىمەن ۇيىمداستىردى.
ءىس-شارالارعا ۆولونتەرلەر، جاستار ۇيىمدارىنىڭ بەلسەندىلەرى، قالاداعى كوللەدجدەر مەن جوعارى وقۋ ورىندارىنىڭ ستۋدەنتتەرى، سونداي-اق الماتى قالاسى توتەنشە جاعدايلار دەپارتامەنتىنىڭ قىزمەتكەرلەرى قاتىستى. باعدارلاما بارىسىندا ەۆاكۋاسيانىڭ ۇلگىلىك ەلەمەنتتەرى كورسەتىلدى، ءورت، جەر سىلكىنىسى جانە باسقا دا قاۋىپتەر كەزىندە العاشقى ارەكەت ەتۋ نۇسقاۋلىقتارى بەرىلدى، سونداي-اق زارداپ شەككەندەرگە العاشقى مەديسينالىق كومەك كورسەتۋ الگوريتمدەرى تالقىلاندى.
قاتىسۋشىلار قالا تۇرعىندارىن قوعامدىق قاۋىپسىزدىك شارالارىن ساقتاۋعا، تۇرمىستا جانە كوشەدە مۇقيات بولۋعا، ازاماتتىق جاۋاپكەرشىلىكتىڭ ماڭىزدىلىعىن تۇسىنۋگە جانە توتەنشە جاعدايلار تۋىنداعان كەزدە دەر كەزىندە ارەكەت ەتۋ قاجەتتىلىگىنە شاقىردى.
«مۇنداي جوبالار قاۋىپسىزدىك مادەنيەتىن قالىپتاستىرۋعا، پراكتيكالىق داعدىلاردى دامىتۋعا جانە حالىقتىڭ ىقتيمال تاۋەكەلدەر تۋرالى حاباردارلىعىن ارتتىرۋعا ىقپال ەتەدى»، - دەدى ءىس-شارا قاتىسۋشىسى، ۆولونتەر اسەم گازەز.
ۇيىمداستىرۋشىلاردىڭ ايتۋىنشا، جاستاردى تارتۋ توتەنشە جاعدايلاردىڭ الدىن الۋدا ماڭىزدى ءرول اتقارادى، ال وسىنداي اكسيالاردى جۇيەلى تۇردە وتكىزۋ قوعامنىڭ تەحنوگەندىك جانە تابيعي سيپاتتاعى قاۋىپتەرگە توزىمدىلىگىن ارتتىرادى.
