ۇلى جەڭىستىڭ 80 جىلدىعىنا وراي الماتى قالاسىندا «ارداگەرگە قۇرمەت» اتتى اۋقىمدى قايىرىمدىلىق اكسياسى ءوتتى، - دەپ حابارلايدى alnews.
اكسيا اياسىندا الماتى قالاسىنىڭ ەرىكتىلەرى سوعىس ارداگەرلەرىنە تۇرمىستىق جانە الەۋمەتتىك قولداۋ كورسەتىپ، ارداگەرلەرگە دەگەن شەكسىز قۇرمەت پەن ريزاشىلىعىن ءبىلدىردى.
ەرىكتىلەر ارداگەرلەردىڭ ۇيلەرىنە بارىپ، ازىق-تۇلىك پەن قاجەتتى زاتتاردى جەتكىزدى، سونداي-اق تۇرمىستىق شارۋالارعا كومەك كورسەتتى. بۇل اكسيا تەك اعا بۋىنعا دەگەن قامقورلىقتىڭ كورىنىسى عانا ەمەس، سونىمەن قاتار جاستار مەن ارداگەرلەر اراسىنداعى ۇرپاقتار ساباقتاستىعىن نىعايتۋ جولىنداعى ماڭىزدى قادام بولدى. اكسيا اياسىندا الماتى قالاسىندا تۇراتىن بارلىق 21 ۇوس ارداگەرىن قامتۋ جوسپارلانىپ وتىر.
«ءبىز ارداگەرلەرگە جاي عانا كومەك كورسەتىپ جاتقان جوقپىز. بۇل – ەرلىككە تاعزىم، تاريحقا قۇرمەت. ولاردىڭ ءاربىر ەستەلىگى – ءبىز ءۇشىن ءتىرى شەجىرە. وسىنداي كەزدەسۋلەر ارقىلى ءبىز شىنايى پاتريوتيزم مەن جاۋاپكەرشىلىك سەزىمىن ۇيرەنەمىز»، – دەپ ەرىكتى ءشامشى قۇدايبەرگەن اتاپ ءوتتى.
ەرىكتىلەر اتاپ وتكەندەي، بۇل ءبىر رەتتىك شارا ەمەس. ول – الماتىلىق جاستاردىڭ جۇيەلى تۇردە جۇزەگە اسىرىپ كەلە جاتقان تۇراقتى باستاماسىنىڭ قۇرامداس بولىگى. الماتى قالاسىنىڭ ەرىكتىلەرى مۇنداي قايىرىمدىلىق ءىس-شارالارىن ۇنەمى ۇيىمداستىرىپ وتىرادى. ماسەلەن، قىس مەزگىلىندە ولار ارداگەرلەر مەن زەينەتكەرلەردىڭ اۋلالارىن قاردان تازارتۋعا كومەكتەسىپ، كوممۋنالدىق قىزمەت وكىلدەرىنە ىستىق شاي تاراتۋ بويىنشا اكسيالار وتكىزەدى. بۇل باستامالار – جاستاردىڭ بەلسەندى ازاماتتىق ۇستانىمىنىڭ، قوعامداعى بىرلىكتىڭ جانە ادامدارعا دەگەن شىنايى جاناشىرلىقتىڭ ايقىن كورىنىسى.
