الماتى ۆولونتەرلەرى 100-دەن استام بالالار ءۇيىنىڭ تاربيەلەنۋشىلەرىنە ارناپ كينو كورسەتىلىم ۇيىمداستىردى
الماتى قالاسىندا اتا-انا قامقورلىعىنسىز قالعان بالالار ءۇشىن ەرەكشە ءارى اسەرلى شارا ءوتتى. الماتى قالاسى جاستار ساياساتى باسقارماسىنىڭ قولداۋىمەن جۇزەگە اسىرىلىپ جاتقان «الەۋمەتتىك شەبەرحانا» جوباسى اياسىندا 100-دەن استام تاربيەلەنۋشىگە ارناپ كينوعا بارۋ ۇيىمداستىرىلدى. بالالار وتاندىق تۋىندىنى كورىپ، شىنايى ەموسيالار مەن قۋانىشتى ساتتەرگە بولەندى.
جوبانىڭ ماقساتى – بالالارعا تەك سىيلىق ەمەس، ەڭ باستىسى – قامقورلىق پەن كوڭىل ءبولۋ ارقىلى جىلۋلىق سىيلاۋ، ولاردى قوعامنىڭ ءبىر بولشەگى ەكەنىن سەزىندىرۋ. ۆولونتەرلەر مۇنداي شارالاردىڭ ماڭىزدىلىعى ماتەريالدىق كومەكتەن كەم ەمەس ەكەنىن اتاپ وتەدى.
جوبانىڭ ەرىكتىسى شامشي قۇدايبەرگەن ءوز ويىمەن ءبولىستى:
«ءبىز ءۇشىن مۇنداي شارالار ماتەريالدىق كومەكتەن كەم ەمەس. بۇل – ەموسيا، بۇل – شىنايى كوڭىل ءبولۋ. بالالاردىڭ كۇلىپ، ءماز بولىپ، فيلمنەن كەيىن اسەرىمەن بولىسكەنىن كورۋ – ءبىزدىڭ باستى ماقساتىمىزدىڭ ورىندالعانىن بىلدىرەدى. ءار بالا — ماڭىزدى، جانە ءبىز سونى كورسەتكىمىز كەلەدى».
«الەۋمەتتىك شەبەرحانا» جوباسى الداعى ۋاقىتتا دا بالالار ءۇشىن ءتۇرلى يگى شارالاردى جالعاستىرا بەرمەك. الدا – تانىمدىق ەكسكۋرسيالار، شەبەرلىك ساباقتارى، اكتەرلەرمەن كەزدەسۋلەر جانە تاعى دا باسقا ءىس-شارالار جوسپارلانعان.
