الماتىدا جاستار تاۋلىكتىڭ كەز كەلگەن ۋاقىتىندا ءبىلىم الىپ، جوباسىمەن اينالىسىپ، كونتەنت جاساپ، پىكىرلەس جاندارمەن تانىسا الاتىن جاڭا كەڭىستىك پايدا بولادى، - دەپ حابارلايدى alnews.
بوستاندىق اۋدانىندا جاستارعا ارنالعان العاشقى تاۋلىك بويى جۇمىس ىستەيتىن كوميۋنيتي ورتالىق اشىلدى. بۇل قالالىق ينفراقۇرىلىمدى تاۋلىك بويى قولجەتىمدى ەتۋگە باعىتتالعان «ۇيىقتامايتىن قالا» تۇجىرىمداماسىن جۇزەگە اسىرۋ جولىنداعى ناقتى قادامداردىڭ ءبىرى.
بۇعان دەيىن قازاقستان پرەزيدەنتى قاسىم-جومارت توقايەۆ الماتىنى تاۋلىك بويى تىرشىلىگى توقتامايتىن قالا رەتىندە دامىتۋ مىندەتىن ايقىنداعان بولاتىن. مەملەكەت باسشىسى مەگاپوليستى تۇرعىندار، بيزنەس وكىلدەرى مەن جاستار ءۇشىن جاڭا مۇمكىندىكتەر ۇسىناتىن، تاۋلىك بويى جۇمىس ىستەيتىن تارتىمدى ورتالىق رەتىندە دامىتۋعا ەرەكشە نازار اۋداردى.
الماتى اكىمى دارحان ساتىبالدى زاماناۋي قالالىق ينفراقۇرىلىمدى دامىتۋعا، جاستار ءۇشىن قولايلى جاعداي جاساۋعا جانە ولاردىڭ ءوزىن-وزى جۇزەگە اسىرۋ مۇمكىندىكتەرىن كەڭەيتۋگە ايرىقشا كوڭىل ءبولىپ كەلەدى. قالا ساياساتىنىڭ باسىم باعىتتارىنىڭ ءبىرى جاستار جاڭا ءبىلىم الىپ، كاسىبي داعدىسىن دامىتىپ، باستامالارىن جۇزەگە اسىرىپ، پىكىرلەس جانداردى تابا الاتىن قولجەتىمدى قوعامدىق كەڭىستىكتەر قالىپتاستىرۋ. تاۋلىك بويى جۇمىس ىستەيتىن كوميۋنيتي ورتالىقتىڭ اشىلۋى وسى باعىتتاعى تاعى ءبىر ماڭىزدى قادام بولماق. بۇل جاستارعا مەگاپوليس مۇمكىندىكتەرىن تاۋلىكتىڭ كەز كەلگەن ۋاقىتىندا پايدالانۋعا جول اشادى.
«تاۋلىك بويى جۇمىس ىستەۋگە نەگىزدەلگەن جاڭا ءتاسىل ەندى جاستار ينفراقۇرىلىمىندا دا جالعاسىن تابۋدا. ويتكەنى قازىرگى ءومىر ىرعاعى الدەقاشان تاڭعى توعىزدان كەشكى التىعا دەيىنگى قالىپتى جۇمىس كەستەسىمەن شەكتەلمەيدى. ستۋدەنتتەر تۇندە ەمتيحانعا دايىندالادى، جاس كاسىپكەرلەر ساباقتان كەيىن ستارتاپ جوبالارىمەن اينالىسادى، ال شىعارماشىلىق ماماندىق يەلەرى كوبىنە شابىتتى ءتۇن ورتاسىنان كەيىن تابادى. جاڭا كوميۋنيتي ورتالىق ءدال وسىنداي جاستار ءۇشىن ۋاقىت يدەياسىن دامىتۋعا جانە جۇزەگە اسىرۋعا كەدەرگى بولمايتىن ورىنعا اينالۋعا ءتيىس»، – دەدى جاستار ساياساتى باسقارماسىنىڭ باسشىسى ازيز كاجدەنبەك.
ورتالىق روزىباكييەۆ كوشەسى، 247/7 مەكەنجايىندا ورنالاسقان. جالپى اۋماعى 450 شارشى مەتر بولاتىن ءۇش قاباتتا ءبىلىم بەرۋ، مانساپتىق دامۋ، سيفرلىق تەحنولوگيا، شىعارماشىلىق جانە قوعامدىق باعىتتار بىرىكتىرىلگەن. كەڭىستىكتىڭ باستى ەرەكشەلىكتەرىنىڭ ءبىرى يدەيادان باستاپ ونى ءىس جۇزىندە جۇزەگە اسىرۋعا دەيىنگى بارلىق كەزەڭنەن ءبىر جەردە وتۋگە مۇمكىندىك بولۋىندا.
مىسالى، بولاشاق ماماندىعىن ءالى تاڭداماعان جاستار كاسىبي باعدار بويىنشا كەڭەس الا الادى. ال جۇمىس ىزدەپ جۇرگەندەرگە تۇيىندەمە ازىرلەۋگە، سۇحباتتاسۋعا دايىندالۋعا جانە بوس جۇمىس ورىندارىن تابۋعا كومەكتەسەدى. قالالىق مانساپ ورتالىعىندا جۇمىس بەرۋشىلەرمەن تىكەلەي بايلانىس ورناتۋعا مۇمكىندىك قاراستىرىلعان. اشىلۋ راسىمىنە قاتىسقان سەرىكتەستەر قاتارىندا HeadHunter، Alatau City Bank، JETI Group، Attractor School جانە باسقا دا ۇيىمدار بار.
تەحنولوگيالارعا قىزىعاتىن جاستار ءۇشىن Game Dev Zone ايماعى جۇمىس ىستەيدى. مۇندا كومپيۋتەرلىك ويىندار ازىرلەۋ، باعدارلامالاۋ، ۆيرتۋالدى كەڭىستىكتەر قۇرۋ جانە سيفرلىق ديزاين باعىتتارىمەن تانىسۋعا بولادى. الداعى ۋاقىتتا بۇل الاڭدا تاجىريبەلىك ساباقتار، حاكاتوندار مەن كوماندالىق جوبالار ۇيىمداستىرۋ جوسپارلانىپ وتىر.
شىعارماشىلىق يندۋستريالارعا دا ەرەكشە كوڭىل بولىنگەن. ورتالىقتا پودكاست جازۋعا ارنالعان ستۋديا مەن Media Room جابدىقتالعان. مۇندا جاستار سۇحبات جازىپ، بەينەروليكتەر ءتۇسىرىپ، الەۋمەتتىك جەلىلەرگە ارنالعان ماتەريالدار ازىرلەپ، جەكە برەندىن دامىتىپ، كاسىبي پورتفوليوسىن قالىپتاستىرا الادى.
تاعى ءبىر ماڭىزدى باعىت – پسيحولوگيالىق قولداۋ. جاستار ماماننان جەكە كەڭەس الىپ، وزدەرىن تولعاندىراتىن ماسەلەلەردى، ءوزىن-وزى تانۋ مەن كاسىبي دامۋ باعىتىنداعى ماسەلەلەردى تالقىلاي الادى.
ورتالىقتا اشىق دارىستەر مەن پىكىرتالاستار وتكىزۋگە ارنالعان امفيتەاتر، ساباق وقىپ، بىرلەسىپ جۇمىس ىستەۋگە ارنالعان كوۆوركينگ جانە بەيرەسمي كەزدەسۋلەرگە، اڭگىمەلەسۋگە، جاڭا جوبالاردى تالقىلاۋعا ارنالعان Kitchen Room كەڭىستىگى دە بار.
ۇيىمداستىرۋشىلاردىڭ جوسپارىنا سايكەس، اتالعان باعىتتاردىڭ بارلىعى ءبىرتۇتاس جۇيە رەتىندە جۇمىس ىستەۋگە ءتيىس. وسىلايشا، جاستار ءبىر جەردە ءبىلىم الىپ، كومانداسىن قۇرىپ، قاجەتتى داعدى مەڭگەرىپ، جۇمىسقا ورنالاسۋ نەمەسە جەكە كاسىبىن باستاۋ جولىنداعى العاشقى قادامىن جاساي الادى.
«جاستارعا ارنالعان تاۋلىك بويى جۇمىس ىستەيتىن كەڭىستىكتىڭ اشىلۋى الماتىنى دامىتۋداعى اۋقىمدى كوزقاراستى كورسەتەدى. «ۇيىقتامايتىن قالا» تۇجىرىمداماسى مەگاپوليستىڭ ءومىر ءسۇرۋ ىرعاعى ءارتۇرلى تۇرعىندار ءۇشىن قولجەتىمدى ءارى جايلى بولۋىن كوزدەيدى. ءبىلىم الۋ، جۇمىس ىستەۋ جانە ءوزىن-وزى جۇزەگە اسىرۋ مۇمكىندىكتەرى تەك تاۋلىك ۋاقىتىنا تاۋەلدى بولماۋعا ءتيىس. بۇل رەتتە جاڭا ورتالىقتىڭ باستى مىندەتى – جاستارعا كەزدەسۋگە نەمەسە ءبىلىم الۋعا ارنالعان ورىن ۇسىنۋ عانا ەمەس، جاڭا باستامالاردىڭ، كاسىبي مۇمكىندىكتەر مەن بىرلەسكەن جوبالاردىڭ پايدا بولۋىنا جاعداي جاساۋ»، – دەدى ازيز كاجدەنبەك.
كوپتەگەن ۋنيۆەرسيتەت، كوللەدج، ءبىلىم بەرۋ جانە شىعارماشىلىق ۇيىم شوعىرلانعان الماتىدا مۇنداي فورمات ستۋدەنتتەر، ەڭبەك جولىن ەندى باستاعان ماماندار، كاسىپكەرلەر مەن كرەاتيۆتى يندۋستريا وكىلدەرى ءۇشىن سۇرانىسقا يە الاڭعا اينالۋى مۇمكىن. نەگىزگى يدەيا قاراپايىم: ەگەر جاستىڭ ءبىلىم الۋعا، جاڭا دۇنيە جاساۋعا جانە دامۋعا دەگەن ىنتاسى بولسا، ءتىپتى، جارىم تۇندە دە قالا وعان وسىنداي مۇمكىندىك ۇسىنۋعا ءتيىس.
