2026 جىلى 10 ماۋسىمدا الماتىدا تۇركيا رەسپۋبليكاسىنان كەلگەن جاستار دەلەگاسياسىن قارسى الۋ شاراسى ءوتتى. ساپار «الماتى – تۇركى مەملەكەتتەر استاناسى-2025» جوباسى اياسىندا ۇيىمداستىرىلىپ، جاستار اراسىنداعى حالىقارالىق ىنتىماقتاستىقتى دامىتۋعا جانە تاجىريبە الماسۋعا باعىتتالدى، - دەپ حاباردايدى alnews.
باعدارلامانىڭ العاشقى كۇنى دەلەگاسيا مۇشەلەرى الماتىداعى جاستار ساياساتىن ىسكە اسىرۋ تاجىريبەسىمەن تانىستى. قوناقتارعا الەمدىك تاجىربيەدەن الىنعان جانە جاستاردى قولداۋعا باعىتتالعان زاماناۋي كوميۋنيتي ورتالىقتاردىڭ ءبىرى اۋەزوۆ اۋدانى كوميۋنيتي ورتالىعىنىڭ جۇمىسى كورسەتىلدى.
قالانىڭ بارلىق اۋدانىندا ورنالاسقان كوميۋنيتي ورتالىقتاردا الماتىلىق جاستار تەگىن ءبىلىم بەرۋ كۋرستارىنا، شەبەردىڭ ساباقتارىنا، كاسىپكەرلىك پەن مەدياساۋاتتىلىق بويىنشا ترەنينگتەرگە قاتىسىپ، ەرىكتىلىك جوبالارعا، ەكولوگيالىق اكسيالارعا، مادەني جانە سپورتتىق ءىس-شارالارعا بەلسەنە ارالاسادى. مۇندا جاستاردىڭ soft skills داعدىسىن دامىتۋعا، باستامالارىن قولداۋعا جانە الەۋمەتتىك ماڭىزى بار جوبالارعا تارتۋعا ەرەكشە كوڭىل بولىنەدى.
«الماتى قالاسى تۇركى الەمى جاستارىن بىرىكتىرەتىن ماڭىزدى حالىقارالىق الاڭعا اينالۋدا. تۇركيا رەسپۋبليكاسىنان كەلگەن جاستار دەلەگاسياسىنىڭ ساپارى ءوزارا تاجىريبە الماسۋعا، جاڭا جوبالاردى دامىتۋعا جانە جاستار ۇيىمدارى اراسىنداعى سەرىكتەستىكتى نىعايتۋعا مۇمكىندىك بەرەدى. ءبىز تۇركى مەملەكەتتەرى جاستارىنىڭ باستامالارىن قولداۋعا، ولاردىڭ الەۋەتىن اشۋعا جانە حالىقارالىق ىنتىماقتاستىقتى ودان ءارى كەڭەيتۋگە ءاردايىم دايىنبىز»، – دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.
حالىقارالىق جاستار باعدارلاماسى الداعى كۇندەرى ءبىلىم بەرۋ، مادەني جانە قوعامدىق ىس-شارالارمەن جالعاسادى.
ەستەرىڭىزگە سالا كەتەيىك، الماتى قالاسى 2025 جىلى العاش رەت «تۇركى الەمىنىڭ جاستار استاناسى» مارتەبەسىنە يە بولدى. وسى مارتەبە اياسىندا قالادا حالىقارالىق جاستار الماسۋلارى، فورۋمدار، مادەني جانە ءبىلىم بەرۋ جوبالارى جۇزەگە اسىرىلىپ كەلەدى. ال بيىل «Kazakhstan-Turkey Psychosocial Support Project» فورۋمى ءوتىپ، رەسمي تۇردە 14 ماۋسىم كۇنى تۇركى مەملەكەتتەر ۇيىمىنىڭ جاڭا استاناسى انىقتالىپ، كىلت تابىستالادى.
