الماتىدا «Eco Almaty» ءجشس-نىڭ اقپاراتتىق قولداۋىمەن جۇزەگە اسىرىلىپ جاتقان «ەكو-تراك» جوباسى جۇمىسىن جالعاستىرىپ كەلەدى، - دەپ حابارلايدى alnews.
جوبا قالا تۇرعىندارى اراسىندا ەكولوگيالىق مادەنيەتتى قالىپتاستىرۋعا جانە قالدىقتى بولەك جيناۋ تاجىريبەسىن كەڭىنەن ناسيحاتتاۋعا باعىتتالعان.
كەزەكتى اۋلا ەكواكسياسى Mountain Drive تۇرعىن ءۇي كەشەنىندە ءوتتى. بۇل كەشەننىڭ تۇرعىندارى ECO Network جانە «ەكو-حاب» جوبالارىنىڭ نەگىزىن قالاۋشى ەۆگەنيي مۋحامەدجانوۆ ۇيىمداستىرعان ەكولوگيالىق باستاما اياسىندا جەڭىمپاز اتانعان بولاتىن.
بيىل 16 مامىردا «گۇلدەر» تۇرعىن ءۇي كەشەنىندە وتكەن العاشقى كوشپەلى ءىس-شارادان كەيىن الماتىلىقتارعا اۋلاسىنىڭ مەكەنجايىن كورسەتىپ، ءوتىنىم قالدىرۋ ۇسىنىلعان ەدى. ەڭ كوپ ءوتىنىم ءدال Mountain Drive تۇرعىندارىنان تۇسكەندىكتەن، «ەكو-تراك» وسى تۇرعىن ءۇي كەشەنىنە باردى.
اكسيا بارىسىندا تۇرعىندارعا ءموبيلدى ەكولوگيالىق الاڭ قىزمەت كورسەتتى. قاتىسۋشىلار بولەك جينالعان قالدىقتارىن قايتا وڭدەۋگە تاپسىرىپ، ەكولوگيالىق تاقىرىپتاعى ينتەراكتيۆتى ءىس-شارالارعا قاتىستى. سونداي-اق، ولار پلاستيك قاقپاقتاردى ۇساقتاۋعا ارنالعان ۆەلوشرەدەرلەردى پايدالانۋ مۇمكىندىگىنە يە بولدى.
ەكواكسياعا شامامەن 150 تۇرعىن قاتىستى. سونىڭ ناتيجەسىندە قايتا وڭدەۋگە 1200-دەن استام پلاستيك قاقپاق جينالدى. سونىمەن قاتار قاتىسۋشىلار 10 كگ ماكۋلاتۋرا، 5 كگ پلاستيك، 3 كگ پوليەتيلەن جانە 1 كگ شىنى بوتەلكە تاپسىردى.
«ەكو-تراك» – الماتىداعى قالدىقتاردى بولەك قابىلداۋدى اعارتۋشىلىق جانە ينتەراكتيۆتى باعدارلامامەن ۇشتاستىراتىن العاشقى كوشپەلى ەكولوگيالىق زەرتحانا. مۇنداي فورمات تۇرعىنداردى قالدىقتارمەن جاۋاپكەرشىلىكپەن جۇمىس ىستەۋ قاعيدالارىمەن تانىستىرىپ، ءارتۇرلى جاستاعى ازاماتتاردى ەكولوگيالىق باستامالارعا تارتۋعا مۇمكىندىك بەرەدى.
وسىنداي جوبالاردى جۇزەگە اسىرۋ قالدىقتاردى بولەك جيناۋ مادەنيەتىن دامىتۋعا، قالا تۇرعىندارىنىڭ ەكولوگيالىق جاۋاپكەرشىلىگىن ارتتىرۋعا جانە الماتىدا قالدىقتاردى تۇراقتى باسقارۋ جۇيەسىنىڭ دامۋىنا ىقپال ەتەدى.
