قالا قىتايدان كەلەتىن ىسكەرلىك ساپارلار سانىن ارتتىرۋعا، حالىقارالىق كەزدەسۋلەر مەن كونفەرەنسيالاردى الماتىدا ۇيىمداستىرۋعا باسىمدىق بەرىپ وتىر، - دەپ حابارلايدى alnews.
وسى باعىتتاعى جۇمىستاردىڭ ءبىرى الماتىنىڭ 3-5 قاراشا ارالىعىندا بەيجىڭدە وتكەن China International MICE Exchange (CIMX Beijing 2026) حالىقارالىق كورمەسىنە قاتىسۋى. حالىقارالىق الاڭدا Visit Almaty وكىلدەرى قىتايلىق تۋروپەراتورلارعا، ىسكەرلىك ءىس-شارالار مەن كورپوراتيۆتىك ساپارلاردى ۇيىمداستىرۋشىلارعا قالانىڭ تۋريستىك مۇمكىندىكتەرىن تانىستىردى.
جۇڭگو الماتى ءۇشىن تۋريستىك الەۋەتى جوعارى نارىقتاردىڭ ءبىرى سانالادى. 2025 جىلدىڭ قورىتىندىسى بويىنشا قالاعا قحر-دان 136 419 تۋريست كەلگەن. بۇل الدىڭعى جىلمەن سالىستىرعاندا 37،6%-عا كوپ. تۋريستەر سانىنىڭ وسۋىنە الماتى مەن قىتايدىڭ ءتورت ءىرى قالاسى – بەيجىڭ، شانحاي، گۋانچجوۋ جانە ءۇرىمجى اراسىنداعى تىكەلەي اۋە قاتىناسى دا سەپتىگىن تيگىزىپ وتىر.
الماتىعا كەلەتىن تۋريستەردىڭ كوبەيۋىمەن بىرگە قالادا حالىقارالىق كونفەرەنسيالار، كورپوراتيۆتىك جيىندار مەن ىسكەرلىك كەزدەسۋلەر وتكىزۋ مۇمكىندىكتەرى دە كەڭەيىپ كەلەدى.
الماتىنىڭ تاعى ءبىر ارتىقشىلىعى – ىسكەرلىك ساپاردى دەمالىسپەن جانە ساياحاتپەن ۇشتاستىرۋعا بولادى. حالىقارالىق ءىس-شارالارعا كەلگەن قوناقتار جۇمىس كەزدەسۋدەن بوس ۋاقىتتا تاۋ كۋرورتتارىن ارالاپ، قالانىڭ مادەنيەتىمەن، ۇلتتىق تاعامدارىمەن جانە كورىكتى ورىندارىمەن تانىسا الادى.
كورمە اياسىندا Visit Almaty وكىلدەرى قىتايدىڭ تۋريستىك نارىعىنداعى وكىلدەرمەن بىرلەسكەن باعدارلامالاردى دامىتۋ، الماتىنى كورپوراتيۆتىك كليەنتتەر اراسىندا ىلگەرىلەتۋ جانە حالىقارالىق ءىس-شارالاردى ۇيىمداستىرۋ مۇمكىندىكتەرىن كەڭەيتۋ ماسەلەلەرى بويىنشا كەلىسسوزدەر جۇرگىزدى.
CIMX Beijing 2026 كورمەسىنە 41 ەل مەن وڭىردەن تۋريزم يندۋسترياسىنىڭ 3 000-نان استام وكىلى قاتىسىپ، تۋريستىك باعىتىن كاسىبي قاۋىمداستىققا تانىستىرۋعا مۇمكىندىك الدى.
بۇل جۇمىستار الماتىعا قىتايدان كەلەتىن تۋريستەر سانىن كوبەيتۋگە، ىسكەرلىك ساپارلار اياسىن كەڭەيتۋگە جانە قالانىڭ تۋريستىك الەۋەتىنە دەگەن قىزىعۋشىلىقتى ارتتىرۋعا ىقپال ەتەدى.
