الماتى قۇراماسى سۋردليمپيادالىق سپورت تۇرلەرىنەن قازاقستان رەسپۋبليكاسىنىڭ IV سپارتاكياداسىندا جالپىكوماندالىق ەسەپتە ءبىرىنشى ورىن الدى، - دەپ حابارلايدى alnews.
قالا سپورتشىلارى جارىستى 92 مەدالمەن اياقتادى: 29 التىن، 31 كۇمىس جانە 32 قولا. بۇل تۋرالى الماتى قالاسى سپورت باسقارماسىنىڭ وكىلدەرى حابارلادى.
رەسپۋبليكالىق سپارتاكيادا 10-25 تامىز ارالىعىندا الماتىدا، الماتى وبلىسىندا جانە ورالدا ءوتتى. جارىسقا ەلىمىزدىڭ 19 وڭىرىنەن 1500-دەن استام سپورتشى قاتىستى. سپورتتىڭ 10 تۇرىنەن 274 مەدال جيىنتىعى ساراپقا سالىندى.
سپارتاكيادا قورىتىندىسى بويىنشا الماتى قۇراماسى 228 ۇپاي جيناپ، جالپىكوماندالىق ەسەپتە جەڭىمپاز اتاندى. 186 ۇپايمەن جامبىل وبلىسى ەكىنشى ورىن السا، 155 ۇپاي جيناعان استانا ۇزدىك ۇشتىكتى تۇيىندەدى.
الماتىلىق سپورتشىلار ون سپورت ءتۇرىنىڭ توعىزىندا كوماندالىق جۇلدەگە يە بولدى. قالا قۇراماسى گرەك-ريم كۇرەسى، بادمينتون، شاحمات جانە جەڭىل اتلەتيكادان ءبىرىنشى ورىن الدى. ۇستەل تەننيسى، دزيۋدو جانە تاەكۆوندودان ەكىنشى، ال ەركىن كۇرەس پەن فۋتبولدان ءۇشىنشى ورىن يەلەندى.
الماتىلىق سپورتشىلار اسىرەسە، جەڭىل اتلەتيكادا جوعارى ناتيجە كورسەتتى. ءۇش جارىس كۇنىنىڭ قورىتىندىسى بويىنشا كوماندا 8 التىن، 9 كۇمىس جانە 4 قولا مەدال جەڭىپ الىپ، وسى سپورت تۇرىنەن جالپىكوماندالىق ەسەپتە ءبىرىنشى ورىنعا يە بولدى.
جالپى العاندا، الماتى سپورتشىلارىنىڭ ەنشىسىندە 92 مەدال بار. سپارتاكيادا ءتورت جىلدا ءبىر رەت وتكىزىلەدى جانە سۋردليمپيادالىق سپورتتى دامىتۋعا، ەستۋ قابىلەتى بۇزىلعان سپورتشىلاردىڭ شەبەرلىگىن ارتتىرۋعا، سونداي-اق ۇلتتىق قۇراما ساپىنا ۇزدىك سپورتشىلاردى ىرىكتەۋگە باعىتتالعان.
