الماتى قالاسىندا جاستار ساياساتى سالاسىنداعى مەملەكەتتىك جوبالاردىڭ ساپالى جۇزەگە اسۋىن قامتاماسىز ەتۋ ماقساتىندا ماڭىزدى كەزدەسۋ ءوتتى. الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك ۇكىمەتتىك ەمەس ۇيىمداردىڭ (ۇەۇ) وكىلدەرىمەن جانە جاستارعا ارنالعان جوبالاردى ۇيلەستىرىپ جۇرگەن ماماندارمەن جۇمىس بابىنداعى كەزدەسۋدە باس قوستى.
كەزدەسۋ بارىسىندا مەملەكەتتىك الەۋمەتتىك تاپسىرىس اياسىندا جۇزەگە اسىرىلىپ جاتقان جوبالاردىڭ مازمۇنى، ورىندالۋ بارىسى جانە ناتيجەلىلىك كورسەتكىشتەرى جان-جاقتى تالقىلاندى. باسقارما باسشىسى جاستارمەن جۇمىس ىستەۋدىڭ، ولاردىڭ الەۋەتىن دامىتۋ مەن قولداۋدىڭ اسا وزەكتى ەكەندىگىن اتاپ ءوتتى. ول ءوز سوزىندە:
«جاستارعا باعىتتالعان ءاربىر جوبانىڭ ارتىندا ناقتى ناتيجە، قوعامعا پايدالى وزگەرىس تۇرۋى كەرەك. ءبىزدىڭ مىندەتىمىز – وسى باستامالاردىڭ شىنايى جۇزەگە اسۋىن قامتاماسىز ەتۋ»، — دەپ اتاپ ءوتتى.
اشىق ديالوگ فورماتىندا وتكەن جيىن بارىسىندا جوبالاردىڭ ۋاقىتىلى ءارى ساپالى ورىندالۋى، قۇجاتتامالىق ەسەپتىلىك پەن كورسەتكىشتەردىڭ ءدال ورىندالۋى جايلى ناقتى مىندەتتەر قويىلدى. سونداي-اق، ءاربىر ۇەۇ-نىڭ قالا جاستارىنىڭ قاجەتتىلىكتەرىنە قانشالىقتى جاۋاپ بەرىپ وتىرعانى دا نازارعا الىندى.
كەزدەسۋدىڭ قورىتىندىسىندا تاراپتار بىرلەسكەن جۇمىس اياسىن كەڭەيتۋ، ءتيىمدى كەرى بايلانىس ورناتۋ جانە جوبالاردىڭ ساپاسىن ارتتىرۋ باعىتىندا كەلىسىمگە كەلدى. مۇنداي كەزدەسۋلەر جاستارمەن جۇمىس ىستەيتىن ۇيىمدار ءۇشىن تاجىريبە الماسۋعا، ءوزارا تۇسىنىستىك پەن سەرىكتەستىكتى نىعايتۋعا مۇمكىندىك بەرەدى.
جاستار ساياساتى باسقارماسى الداعى ۋاقىتتا دا اشىقتىق، تيىمدىلىك جانە سەرىكتەستىك پرينسيپتەرىن باسشىلىققا الا وتىرىپ، قالانىڭ جاستارىن قولداۋعا باعىتتالعان جوبالاردى جۇيەلى تۇردە ىسكە اسىرۋدى جالعاستىرماق.
