الماتى وڭتۇستىك كورەيانىڭ MBC (Munhwa Broadcasting Corporation) ۇلتتىق تەلەارناسىنداعى ميلليونداعان كورەرمەن تاماشالايتىن «I Live Alone» تانىمال شوۋىنىڭ جاڭا شىعارىلىمىندا كورسەتىلدى، - دەپ حابارلايدى alnews.
قازاقستانعا ارنالعان ءتۇسىرىلىم الماتى قالاسى تۋريزم باسقارماسىنىڭ قولداۋىمەن ۇيىمداستىرىلىپ، ارنايى شىعارىلىم 2026 جىلى 14 تامىزدا ەفيرگە شىقتى.
شىعارىلىمنىڭ باستى كەيىپكەرى – تانىمال وڭتۇستىككورەيالىق تەلەجۇرگىزۋشى ءارى كوميك، باعدارلامانىڭ جۇرگىزۋشىلەرىنىڭ ءبىرى چون حەن-مۋ (Jun Hyun-moo). الماتىعا ساپارى بارىسىندا ول حالىقارالىق اۋەجايدا، كوكتوبەدە، كوك بازاردا، ارباتتا جانە قايىڭدى كولىندە بولىپ، قالانىڭ تىنىس-تىرشىلىگىمەن تانىستى. وسىلايشا باعدارلامادا الماتىنىڭ قالالىق اتموسفەراسى، گاسترونومياسى، جەرگىلىكتى مادەنيەتى مەن تابيعي كورىكتى جەرلەرى كورسەتىلدى.
«I Live Alone» – وڭتۇستىك كورەياداعى ەڭ تانىمال ويىن-ساۋىق باعدارلامالارىنىڭ ءبىرى. چون حەن-مۋ سياقتى تانىمال تۇلعانىڭ قاتىسۋى شىعارىلىمعا دەگەن قىزىعۋشىلىقتى ودان ءارى ارتتىرا ءتۇستى. ونىڭ الەۋمەتتىك جەلىدەگى پاراقشالارىنا 800 مىڭنان استام ادام جازىلعان.
تەليەۆيزيالىق كورسەتىلىمنەن كەيىن باعدارلاما سيفرلىق پلاتفورمالاردا دا اۋديتوريا جيناۋدى جالعاستىردى. 3 ميلليونعا جۋىق وقىرمانى بار MBCء-دىڭ رەسمي YouTube-ارناسىندا جاريالانعان الماتىعا ساياحات تۋرالى بەينەجازبا ءقازىردىڭ وزىندە 500 مىڭنان استام قارالىم جينادى. كورەرمەندەر بەينەروليك استىندا قالا تۋرالى اسەرىن جازىپ، شىعارىلىمعا وڭ باعا بەرىپ جاتىر.
وڭتۇستىك كورەيا الماتى ءۇشىن مۇمكىندىگى جوعارى تۋريستىك نارىقتاردىڭ ءبىرى سانالادى. 2025 جىلدىڭ قورىتىندىسى بويىنشا قالامىزعا وسى ەلدەن 23 مىڭنان استام تۋريست كەلگەن. سونىمەن بىرگە الماتى كورەيالىق ساياحاتشىلاردى عانا ەمەس، حالىقارالىق كونتەنت تۇسىرۋگە قولايلى الاڭ رەتىندە جەرگىلىكتى مەديانى دا قىزىقتىرىپ وتىر. بۇعان دەيىن قالادا SBS ارناسىنىڭ تانىمال «مەنىڭ كىشكەنتاي بويداق جىگىتىم» شوۋىنىڭ ارنايى شىعارىلىمى تۇسىرىلسە، ەندى الماتى MBC ارناسىنداعى «I Live Alone» باعدارلاماسىندا كورسەتىلدى. بۇل الماتىنىڭ كورەيالىق اۋديتوريا اراسىندا تۋريستىك باعىت ءارى حالىقارالىق مەدياجوبالار ءۇشىن تارتىمدى الاڭ رەتىندەگى الەۋەتىن دە ايقىنداي تۇسەدى.
