الماتى ونكولوگيالىق ورتالىعىندا روبوتتاندىرىلعان ءدارىحانا كەشەنى مەن دارىلىك پرەپاراتتاردى جابىق، گەرمەتيكالىق جاعدايدا دايىنداۋ جۇيەسى ەنگىزىلدى، - دەپ حابارلايدى alnews.
بۇل تۋرالى قالالىق قوعامدىق دەنساۋلىق ساقتاۋ باسقارماسىنىڭ وكىلدەرى حابارلادى.
جاڭا تەحنولوگيا دارى-دارمەكپەن قامتاماسىز ەتۋدىڭ نەگىزگى كەزەڭدەرىن – پرەپاراتتاردى قابىلداپ، ساقتاۋدان باستاپ، ولاردى دايىنداۋ جانە ناۋقاسقا بەرۋگە دەيىنگى ۇدەرىستى اۆتوماتتاندىرادى.
جۇيەنىڭ باستى ەرەكشەلىگى – ءاربىر پرەپاراتتىڭ سيفرلىق باقىلاۋدا بولۋى. ارنايى كود ارقىلى دارىگە جەكە سايكەستەندىرۋ ءنومىرى بەرىلەدى، ال ونىمەن جاسالعان بارلىق ارەكەت جۇيەدە تىركەلەدى. وسىلايشا ماماندار پرەپاراتتىڭ ءدارىحانا كەشەنىنە تۇسكەن ساتىنەن باستاپ ناۋقاسقا بەرىلگەنگە دەيىنگى بۇكىل جولىن باقىلاپ وتىرا الادى.
بۇل ونكولوگيالىق قىزمەت ءۇشىن اسا ماڭىزدى. سەبەبى دارى-دارمەكپەن قامتاماسىز ەتۋدىڭ دالدىگى مەن قاۋىپسىزدىگى ەمدەۋ ساپاسىنا تىكەلەي اسەر ەتەدى.
ءقازىر الماتى ونكولوگيالىق ورتالىعىندا 38 مىڭنان استام ناۋقاس ەسەپتە تۇر. جىل سايىن 27 مىڭنان استام ادام مەديسينالىق كومەك الادى. سوڭعى سەگىز جىلدا ونكولوگيالىق اۋرۋلاردى ەمدەۋ بويىنشا كورسەتىلەتىن قىزمەت كولەمى 2،5 ەسەگە ارتقان.
سونىمەن قاتار بەس جىلدىق ءومىر ءسۇرۋ كورسەتكىشى 46%-دان 75%-عا دەيىن وسكەن.
«ەندى بۇل ناتيجەلەرگە تەحنولوگيالىق تۇرعىدان تاعى ءبىر ماڭىزدى قادام قوسىلىپ وتىر. روبوتتاندىرىلعان جۇيە ادام فاكتورىنان بولاتىن قاتەلىكتەردى بارىنشا ازايتىپ، دارى-دارمەكتىڭ قوزعالىسىن تولىق باقىلاۋعا مۇمكىندىك بەرەدى. ءىس جۇزىندە ورتالىقتا ءدارىنىڭ سيفرلىق جولى قالىپتاسىپ وتىر. بۇل جۇيەدە ونىڭ بىردە-بىر كەزەڭى باقىلاۋسىز قالمايدى»، – دەدى الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ.
بۇعان دەيىن الماتى ونكولوگيالىق ورتالىعىندا ونكولوگيالىق اۋرۋلاردى ەمدەۋ كەزىندە قولدانىلاتىن پرەپاراتتاردى اۆتوماتتى ءارى ءدال دايىنداۋعا ارنالعان روبوتتاندىرىلعان جابدىق ورناتىلعان بولاتىن.
جۇيە قاجەتتى دوزانى ءدال ساقتاۋعا، قاتەلەسۋ ءقاۋپىن ازايتۋعا جانە دارى-دارمەكتى دايىنداۋ ۇدەرىسىن باقىلاۋعا مۇمكىندىك بەرەدى.
ورتالىقتىڭ مالىمەتىنشە، روبوتتاندىرىلعان كەشەندەردى ەنگىزۋدەگى نەگىزگى ماقسات – ناۋقاستاردىڭ قاۋىپسىزدىگىن ارتتىرىپ، ەمدەۋ ساپاسىن ودان ءارى جاقسارتۋ.
