8 ماۋسىم كۇنى الماتىدا سيان قالاسىنىڭ (قحر) تۋريستىك الەۋەتىن تانىستىرۋعا ارنالعان «مىڭجىلدىق كونە استانا – چانانعا قوش كەلدىڭىزدەر» اتتى ءىس-شارا ءوتتى، - دەپ حابارلايدى alnews.
باسقوسۋ قازاقستان مەن قىتايدىڭ مەملەكەتتىك ورگاندارىنىڭ، تۋريستىك سالا جانە بيزنەس وكىلدەرىنىڭ باسىن قوستى.
تانىستىرىلىم بارىسىندا قاتىسۋشىلارعا سيان قالاسىنىڭ تۋريستىك باعىتتارى، مادەني مۇراسى مەن تۋريستىك الەۋەتى، سونداي-اق ەكى قالا اراسىنداعى تۋريزم سالاسىنداعى ىنتىماقتاستىقتى ودان ءارى دامىتۋ مۇمكىندىكتەرى تانىستىرىلدى. باعدارلاما اياسىندا مادەني ونەر قويىلىمدارى كورسەتىلىپ، ەكى ەلدىڭ تۋريستىك يندۋستريا وكىلدەرى اراسىندا B2B فورماتىنداعى كەزدەسۋ ۇيىمداستىرىلدى.
ءىس-شارانىڭ ماڭىزدى وقيعالارىنىڭ ءبىرى «جۇڭگو – ورتالىق ازيا» حالىقارالىق مادەني-تۋريستىك پويىزى بويىنشا تۇراقتى ىنتىماقتاستىق تۋرالى كەلىسىمگە قول قويۋ بولدى. قۇجاتقا سيان قالاسىنىڭ مادەنيەت جانە تۋريزم باسقارماسى باسشىسىنىڭ ورىنباسارى چجاو فەن مەن الماتى قالاسى تۋريزم باسقارماسى باسشىسىنىڭ ورىنباسارى اقمارال ەششانوۆا قول قويدى.
بۇل ءىس-شارا الماتى مەن سيان اراسىنداعى تۋريستىك، مادەني جانە گۋمانيتارلىق بايلانىستى نىعايتۋداعى كەزەكتى ماڭىزدى قادام بولدى. سونداي-اق، بۇل باستاما قازاقستان مەن جۇڭگو اراسىنداعى ءوزارا تۋريستەر سانىنىڭ ارتۋىنا ىقپال ەتەدى.
