الماتى مەن شانحاي ەرەكشە قاجەتتىلىگى بار ازاماتتارعا مەديسينالىق جانە الەۋمەتتىك وڭالتۋ، جۇمىسپەن قامتۋ جانە جان-جاقتى قولداۋ كورسەتۋ باعىتتارىنداعى تاجىريبە الماسۋدى كۇشەيتپەك، - دەپ حابارلايدى alnews.
وسى ماقساتتا الماتىعا شانحايدىڭ «يانچجي» وڭالتۋ اۋرۋحاناسى، جۇمىسپەن قامتۋعا جاردەمدەسۋ ورتالىعى جانە ەرەكشە قاجەتتىلىگى بار بالالارعا ارنالعان وڭالتۋ ورتالىعىنىڭ وكىلدەرى كەلدى.
جۇمىس ساپارى بارىسىندا دەلەگاسيا №4 قالالىق كلينيكالىق اۋرۋحانا جانىنداعى وڭىرلىك تراۆماتولوگيا جانە ورتوپەديا ورتالىعىنا بارىپ، تىرەك-قيمىل اپپاراتى اۋرۋلارى مەن جاراقاتتارى بار ناۋقاستارعا مەديسينالىق كومەك كورسەتۋ جانە وڭالتۋ تاسىلدەرىمەن تانىستى.
كەلەسى نىسان «مەيىرىم» وڭالتۋ ورتالىعى بولدى. وندا دەلەگاسيا بالالار مەن ولاردىڭ وتباسىلارىن كەشەندى وڭالتۋ جانە كۇندەلىكتى ومىردە قولداۋ تاجىريبەسىمەن تانىستى.
ىنتىماقتاستىقتىڭ تاعى ءبىر ماڭىزدى باعىتى – جۇمىسپەن قامتۋ. الماتى قالاسى ەڭبەك موبيلدىلىگى ورتالىعىندا قوناقتارعا كاسىبي باعدار بەرۋ، جۇمىسقا ورنالاسۋعا جاردەمدەسۋ جانە ازاماتتارعا قولداۋ كورسەتۋ تەتىكتەرى تانىستىرىلدى. اتاپ ايتقاندا، ادامنىڭ جۇمىس ورنىنا بەيىمدەلۋىنە كومەكتەسەتىن Job Coach ءتاسىلى تۋرالى اقپارات بەرىلدى.
جۇمىس ساپارىنىڭ قورىتىندىسى بويىنشا مەديسينالىق-الەۋمەتتىك مەكەمەلەردىڭ، ەرتە ارالاسۋ ورتالىعىنىڭ، قوعامدىق بىرلەستىكتەر مەن الماتىنىڭ ساراپشىلىق قاۋىمداستىعى وكىلدەرىنىڭ قاتىسۋىمەن كەڭەيتىلگەن كەزدەسۋ ءوتتى.
كەزدەسۋ بارىسىندا تاراپتار ىنتىماقتاستىق تۋرالى مەموراندۋم ازىرلەۋگە كەلىستى. قۇجات تاجىريبە الماسۋدى جولعا قويۋدى، بىرلەسكەن باستامالاردى جۇزەگە اسىرۋدى جانە الەۋمەتتىك وڭالتۋ سالاسىنداعى مامانداردىڭ بىلىكتىلىگىن ارتتىرۋدى كوزدەيدى.
سونىمەن قاتار الماتىداعى مەديسينالىق-الەۋمەتتىك مەكەمەلەر قىزمەتكەرلەرى ءۇشىن شانحايدىڭ «يانچجي» وڭالتۋ اۋرۋحاناسىندا تاعىلىمدامادان ءوتۋ مۇمكىندىگىن قاراستىرۋ جوسپارلانىپ وتىر. بىرلەسكەن سەمينارلار مەن پراكتيكالىق وقىتۋ باعدارلامالارىن وتكىزۋ دە كوزدەلگەن.
بۇل ىنتىماقتاستىق وڭالتۋدىڭ زاماناۋي تاسىلدەرىن تاجىريبەگە ەنگىزۋگە، مامانداردىڭ كاسىبي تاجىريبەسىن ارتتىرۋعا جانە مۇگەدەكتىگى بار ادامدار مەن ەرەكشە قاجەتتىلىگى بار بالالاردى تاربيەلەپ وتىرعان وتباسىلارعا كورسەتىلەتىن قىزمەتتەردىڭ ساپاسىن جاقسارتۋعا باعىتتالعان.
