الماتى مەن ءچۋنسيندى جاڭا تىكەلەي اۋە رەيسى بايلانىستىردى

23 قىركۇيەكتە FlyArystan الماتى – چۋنسين – الماتى باعىتى بويىنشا تىكەلەي اۋە رەيستەرىن ىسكە قوستى، - دەپ حابارلايدى alnews.

رەيستەر اپتاسىنا ەكى رەت ورىندالادى، ۇشۋ ۋاقىتى شامامەن بەس ساعات. FlyArystan وسى باعىتتا رەيس اشقان العاشقى قازاقستاندىق اۋە تاسىمالداۋشىسى بولدى. بۇل تۋرالى الماتى قالاسى تۋريزم باسقارماسىنىڭ وكىلدەرى حابارلادى.

باسقارمانىڭ مالىمەتىنشە، جۇڭگو الماتى ءۇشىن نەگىزگى تۋريستىك نارىقتاردىڭ ءبىرى بولىپ قالا بەرەدى. 2025 جىلى قالاعا قىتايدان 136،4 مىڭ تۋريست كەلگەن. بۇل الدىڭعى جىلمەن سالىستىرعاندا 37،6%-عا كوپ. كەلۋ ءتۋريزمى بويىنشا جۇڭگو رەسەيدەن كەيىن ەكىنشى ورىنعا شىقتى.

قازىرگى ۋاقىتتا الماتىدان بەيجىڭ، شانحاي، ءۇرىمشى، سيان، حانچجوۋ، گۋانچجوۋ، ينين، چەندۋ جانە سانيا قالالارىنا تىكەلەي رەيستەر ورىندالادى. چۋنسينگە جاڭا باعىتتىڭ اشىلۋى قىتايمەن تىكەلەي اۋە قاتىناسىنىڭ گەوگرافياسىن ودان ءارى كەڭەيتتى.

قىتايلىق ساياحاتشىلاردىڭ الماتىعا دەگەن قىزىعۋشىلىعى دا ارتىپ كەلەدى. Mastercard Tourism Insights مالىمەتتەرى بويىنشا ءبىر جىل ىشىندە قىتايدان الماتىعا اۋە بيلەتتەرىن ىزدەۋ سۇرانىستارىنىڭ سانى 30 ميلليوننان 56 ميلليونعا دەيىن وسكەن.

الماتى قالاسىنىڭ تۋريزم باسقارماسىندا اتاپ وتكەندەي، جاڭا باعىتتىڭ ىسكە قوسىلۋى تۋريستەر سانىن ارتتىرۋعا، سونداي-اق الماتى مەن جۇڭگو قالالارى اراسىنداعى ىسكەرلىك جانە مادەني بايلانىستى دامىتۋعا مۇمكىندىك بەرەدى.