27 قىركۇيەكتە Almaty Marathon جارىسىنىڭ مارە ايماعىندا قالدىقتاردى سۇرىپتاۋ، قايتا وڭدەۋ جانە رەسۋرستاردى جاۋاپكەرشىلىكپەن پايدالانۋ ماسەلەلەرىنە ارنالعان Eco Network ەكولوگيالىق ايماعى جۇمىس ىستەيدى. بۇل تۋرالى «Eco Almaty» ج ش س وكىلدەرى حابارلادى.
تاڭەرتەڭنەن ساعات 14:00-گە دەيىن مارافونعا قاتىسۋشىلار مەن قوناقتار ەكولوگيالىق ايماققا كەلىپ، الماتىداعى قالدىقتاردى بولەك جيناۋ ءتارتىبى تۋرالى اقپارات الا الادى. سونداي-اق قايتا وڭدەۋگە قايتالاما شيكىزاتتىڭ قانداي تۇرلەرى قابىلداناتىنىن بىلە الادى.
ءىس-شارا اياسىنداعى بەلسەندىلىكتەردىڭ ءبىرى پلاستيك قاقپاقتاردى قايتا وڭدەۋ ۇدەرىسىن كورسەتۋ. كەلۋشىلەرگە پايدالانىلعان پلاستيكتىڭ جينالىپ، سۇرىپتالعاننان باستاپ قايتا وڭدەلىپ، جاڭا بۇيىمدار وندىرىسىندە قولدانىلعانعا دەيىنگى جولى تانىستىرىلادى.
ەكولوگيالىق باستامالار مارافون تراسساسىندا دا جۇزەگە اسىرىلادى. سۋ تاراتۋ بەكەتتەرىندە ەرىكتىلەر پايدالانىلعان پلاستيك بوتەلكەلەر مەن ستاقانداردى جينايدى. مارافون اياقتالعاننان كەيىن جينالعان ماتەريالدار سۇرىپتالىپ، ولشەنىپ، ءارى قاراي قايتا وڭدەۋگە جىبەرىلەدى.
بالالار ءۇشىن دە ارنايى باعدارلاما قاراستىرىلعان. ەكولوگيالىق ايماقتا ەكو-كەڭەسشىلەر جۇمىس ىستەپ، ەكولوگيا، قالدىقتاردى سۇرىپتاۋ جانە قايتا وڭدەۋ تاقىرىپتارىنا ارنالعان بايقاۋلار مەن ۆيكتورينالار وتكىزەدى.
