الماتى جارتى جىلدا 1 ترلن تەڭگەدەن استام ينۆەستيسيا تارتتى

الماتى قازاقستانداعى ينۆەستيسيا تارتۋ بويىنشا ەڭ تارتىمدى وڭىرلەردىڭ ءبىرى رەتىندەگى مارتەبەسىن ساقتاپ كەلەدى. بۇعان قالانىڭ جوعارى كادرلىق الەۋەتى، دامىعان ينفراقۇرىلىمى، كەڭ تۇتىنۋ نارىعى جانە بيزنەس جۇرگىزۋگە قولايلى جاعداي ىقپال ەتىپ وتىر.
 
الماتى قالاسى كاسىپكەرلىك جانە ينۆەستيسيالار باسقارماسى وكىلدەرىنىڭ مالىمەتىنشە، 2026 جىلدىڭ قاڭتار-ماۋسىم ايلارىندا نەگىزگى كاپيتالعا سالىنعان ينۆەستيسيا كولەمى 1،021 ترلن تەڭگەگە جەتتى. ينۆەستيسيانىڭ ناقتى كولەم يندەكسى 104،6% بولىپ، مەگاپوليستەگى ينۆەستيسيالىق بەلسەندىلىكتىڭ تۇراقتى ءوسىمىن كورسەتتى.
 
ينۆەستيسيالاردىڭ نەگىزگى بولىگى ىشكى كاپيتال. ونىڭ كولەمى 870 ملرد تەڭگەگە جەتسە، سىرتقى ينۆەستيسيا 151،5 ملرد تەڭگە بولدى. سىرتقى ينۆەستيسيانىڭ ءوسىم قارقىنى 112،9%-عا جەتتى.
 
ەڭ كوپ قارجى جىلجىمايتىن مۇلىك، كولىك جانە قويمالاۋ، سيفرلىق تەحنولوگيالار مەن ەنەرگەتيكا سالالارىنا باعىتتالدى. اتاپ ايتقاندا، جىلجىمايتىن مۇلىك سەكتورىنا 299 ملرد تەڭگە، كولىك جانە قويمالاۋ سالاسىنا 172،6 ملرد تەڭگە، اقپارات جانە بايلانىس باعىتىنا 143،8 ملرد تەڭگە، ال ەنەرگەتيكا جوبالارىنا 93،9 ملرد تەڭگە ينۆەستيسيا سالىندى.
اسىرەسە، ينۆەستورلار ەڭ كوپ قىزىعۋشىلىق تانىتىپ وتىرعان سالالار قاتارىندا جىلجىمايتىن مۇلىك، لوگيستيكا، سيفرلىق ەكونوميكا جانە ەنەرگەتيكا بار. بيىل العاشقى جارتىجىلدىقتا جىلجىمايتىن مۇلىك سەكتورىنا 299 ملرد تەڭگە، كولىك جانە قويما سالاسىنا 172،6 ملرد تەڭگە (16،9%)، اقپارات جانە بايلانىس باعىتىنا 143،8 ملرد تەڭگە (14،1%) ينۆەستيسيا سالىندى.
 
سونىمەن قاتار ەلەكتر قۋاتىمەن، گازبەن، بۋمەن، ىستىق سۋمەن جابدىقتاۋ جانە اۋا باپتاۋ جۇيەلەرى جوبالارىنا 93،9 ملرد تەڭگە ينۆەستيسيا باعىتتالدى.
 
سونىمەن قاتار 2026 جىلدىڭ ءبىرىنشى توقسانىنىڭ قورىتىندىسى بويىنشا تارتىلعان تىكەلەي شەتەلدىك ينۆەستيسيا كولەمى 2،1 ملرد اقش دوللارىنا جەتتى. قازاقستان رەسپۋبليكاسى ۇلتتىق بانكىنىڭ دەرەكتەرىنە سايكەس، بۇل كورسەتكىش وتكەن جىلدىڭ وسى كەزەڭىمەن سالىستىرعاندا 32،1%-عا تومەندەگەن.
 
سوعان قاراماستان الماتى ينۆەستيسيالىق بەلسەندىلىكتىڭ جوعارى دەڭگەيىن ساقتاپ، ەلىمىزدەگى كاپيتال تارتۋدىڭ نەگىزگى ورتالىقتارىنىڭ ءبىرى بولىپ قالا بەرەدى. بيىل قالادا جالپى قۇنى 542،8 ملرد تەڭگە بولاتىن 35 ينۆەستيسيالىق جوبانى جۇزەگە اسىرۋ جوسپارلانعان.
 
جاڭا جوبالار جاڭا جۇمىس ورىندارىن اشۋعا، وندىرىستىك ينفراقۇرىلىمدى دامىتۋعا جانە مەگاپوليس ەكونوميكاسىن ودان ءارى ءارتاراپتاندىرۋعا ىقپال ەتەدى.
 
كاسىپكەرلىك جانە ينۆەستيسيالار باسقارماسى وكىلدەرىنىڭ مالىمەتىنشە، ينۆەستيسيالىق باستامالاردى ىسكە اسىرۋ الماتىنىڭ قازاقستاننىڭ ەڭ ءىرى ىسكەرلىك جانە ەكونوميكالىق ورتالىعى رەتىندەگى پوزيسياسىن ودان ءارى نىعايتىپ، وڭىرلىك جانە حالىقارالىق دەڭگەيدەگى باسەكەگە قابىلەتتىلىگىن ارتتىرۋعا مۇمكىندىك بەرەدى.