مەملەكەت باسشىسى قاسىم-جومارت توقايەۆتىڭ تاپسىرماسى بويىنشا الماتى يپپودرومى قالا مەنشىگىنە قايتارىلدى، - دەپ حابارلايدى alnews.
بۇدان بىلاي قالالىق يپپودروم تاريحي جانە سپورتتىق ماقساتتاعى ءبىرتۇتاس نىسان رەتىندە ساقتالادى. بۇل تۋرالى الماتى قالاسى سپورت باسقارماسىنىڭ وكىلدەرى مالىمدەدى.
الماتىنىڭ 2040 جىلعا دەيىنگى باس جوسپارىندا يپپودروم اۋماعى ءتيىستى فۋنكسيونالدىق ايماققا بەكىتىلگەن. ونى وزگەرتۋ جوسپاردا جوق. جەر تەلىمىنىڭ دە يپپودرومدى پايدالانۋ جانە وعان قىزمەت كورسەتۋگە ارنالعان نىسانالى ماقساتى ساقتالادى.
الداعى ۋاقىتتا يپپودرومدى كەشەندى دامىتۋ تۇجىرىمداماسى ازىرلەنەدى. ونىڭ سپورتتىق قىزمەتىن قالپىنا كەلتىرۋ، ينفراقۇرىلىمىن جاڭعىرتۋ، تريبۋنالارىن، ات قورالارىن، سپورت جولدارىن جانە ينجەنەرلىك جەلىلەرىن جاڭارتۋ جوسپارلانىپ وتىر.
تۇجىرىمدامانى ازىرلەۋ كەزىندە زاماناۋي سپورت ينفراقۇرىلىمىنا قويىلاتىن تالاپتار ەسكەرىلەدى. نىسان ءوزىنىڭ نەگىزگى ماقساتىن جانە قالالىق ءارى رەسپۋبليكالىق جارىستار وتكىزۋ مۇمكىندىگىن ساقتاۋعا ءتيىس.
قازىرگى ۋاقىتتا كەشەن قاتتى توزىپ كەتكەن، سوندىقتان ونى قالپىنا كەلتىرۋ جۇمىستارى كەزەڭ-كەزەڭىمەن جۇرگىزىلەدى.
الماتى يپپودرومى 1930 جىلى قۇرىلعان جانە قازاقستان مەن ورتالىق ازياداعى جىلقى شارۋاشىلىعى مەن ات سپورتىنا ارنالعان بايىرعى نىسانداردىڭ ءبىرى سانالادى. ونىڭ اۋماعى 39،1 گەكتار. تاريحي تۇرعىدان يپپودروم شامامەن 3 مىڭ كورەرمەنگە جانە 300-گە جۋىق جىلقى ۇستاۋعا ەسەپتەلگەن. كۇردەلى جوندەۋ جۇمىستارى 1965 جانە 1985 جىلدارى جۇرگىزىلگەن. 1990 جىلدارداعى جەكەشەلەندىرۋ ناتيجەسىندە يپپودروم مەملەكەتتىك مەنشىكتەن شىعارىلدى. 2001 جىلى «يپپودروم» اق بانكروت بولعاننان كەيىن مۇلىكتىك كەشەن جەكە قۇرىلىمدارعا ساتىلىپ كەتكەن ەدى. بۇل قوعام بەلسەندىلەرى، اتبەگىلەر مەن ات سپورتى جانكۇيەرلەرىنىڭ نارازىلىعىن تۋدىردى. يپپودرومدى قالالىق كوممۋنالدىق مەنشىككە قايتارۋ تۋرالى ماسەلە قوعام تاراپىنان ءالسىن-السىن قوزعالىپ ءجۇردى.
يپپودرومنىڭ كوممۋنالدىق مەنشىككە قايتۋى ونى كەزەڭ-كەزەڭىمەن قالپىنا كەلتىرۋگە جانە الماتىدا ات سپورتىن ودان ءارى دامىتۋ ءۇشىن نىساندى ساقتاپ قالۋعا مۇمكىندىك بەرەدى.
جالپى، يپپودرومدى قالالىق كوممۋنالدىق قىزمەتكە قايتارۋ پروسەسى ءبىرشاما ۇزاق ۋاقىتقا سوزىلىپ، تەك، بيىل عانا جۇزەگە استى.
