الماتى International Congress and Convention Association (ICCA) قاۋىمداستىعىنىڭ جىل سايىنعى رەيتينگىندە 10 ساتىعا جوعارى كوتەرىلدى. بۇل قالانىڭ كونگرەستەر، كونفەرەنسيالار جانە وزگە دە ىسكەرلىك ءىس-شارالاردى وتكىزۋگە قولايلى ورتالىق رەتىندەگى بەدەلى ارتىپ كەلە جاتقانىن كورسەتەدى.
ICCA – ىسكەرلىك تۋريزم يندۋسترياسىنداعى جەتەكشى حالىقارالىق كوممەرسيالىق ەمەس قاۋىمداستىقتاردىڭ ءبىرى. ونىڭ قۇرامىنا الەمنىڭ 100-گە جۋىق ەلىنەن 1 100-دەن استام ۇيىم كىرەدى. ۇيىمنىڭ جىل سايىنعى رەيتينگى MICEء-تۋريزمنىڭ دامۋ دەڭگەيىن باعالايتىن ەڭ بەدەلدى حالىقارالىق كورسەتكىشتەردىڭ ءبىرى سانالادى.
Almaty Tourism Bureau ICCA قاۋىمداستىعىنا ءۇش جىلدان بەرى مۇشە. بۇل الماتىعا حالىقارالىق كاسىبي قاۋىمداستىقپەن، كونگرەسس ۇيىمداستىرۋشىلارىمەن جانە سالانىڭ جەتەكشى سەرىكتەستەرىمەن تىكەلەي بايلانىس ورناتۋعا، سونداي-اق قالانىڭ ىسكەرلىك تۋريزمدەگى الەۋەتىن جاھاندىق دەڭگەيدە تانىتۋعا مۇمكىندىك بەرىپ كەلەدى.
«ICCA مۇشەلىگى حالىقارالىق ءىس-شارالاردى ۇيىمداستىرۋشىلارمەن تىكەلەي جۇمىس ىستەۋگە، الماتىنىڭ مۇمكىندىكتەرىن الەمدىك الاڭداردا تانىستىرۋعا جانە قالاعا جاڭا كونگرەستەر مەن كونفەرەنسيالار تارتۋعا جول اشادى. بيىلعى رەيتينگتە 10 ساتىعا جوعارىلاۋىمىز الماتىنىڭ حالىقارالىق MICE نارىعىنداعى پوزيسياسىنىڭ نىعايىپ كەلە جاتقانىنىڭ ايقىن دالەلى»، – دەدى Almaty Tourism Bureau ءتۋريزمدى دامىتۋ ءبولىمىنىڭ باسشىسى سانجار كالەشوۆ.
ICCA-نىڭ 2025 جىلعى مالىمەتىنە سايكەس، الماتىدا وتكەن حالىقارالىق ءىس-شاراعا قاتىسقان ءبىر دەلەگاتتىڭ ورتاشا شىعىنى 1 210 اقش دوللارىنا جەتتى. بۇل سوماعا قوناق ۇيدە تۇرۋ، تاماقتانۋ، كولىك جانە وزگە دە قىزمەتتەرگە جۇمسالعان قاراجات كىرەدى.
ورتا ەسەپپەن ءبىر حالىقارالىق ءىس-شارا قالا ەكونوميكاسىنا شامامەن 327 مىڭ اقش دوللارى كولەمىندە ەكونوميكالىق اسەر ەتەدى. ال 2025 جىلدىڭ قورىتىندىسى بويىنشا الماتىدا وتكەن ICCA ءىس-شارالارىنىڭ جالپى ەكونوميكالىق ۇلەسى شامامەن 2،94 ملن اقش دوللارىنا جەتتى.
بۇل كورسەتكىشتەر ICCA-نىڭ ءىس-شاراعا قاتىسۋشىلاردىڭ تىكەلەي شىعىنى مەن ولاردىڭ قابىلداۋشى قالا ەكونوميكاسىنا قوساتىن ۇلەسىن ەسكەرەتىن رەسمي ادىستەمەسى نەگىزىندە ەسەپتەلگەن.
