قازاقستان رەسپۋبليكاسى پرەزيدەنتىنىڭ جانىنداعى ۇلتتىق عىلىم اكادەمياسى مەن قازاق ۇلتتىق قىزدار پەداگوگيكالىق ۋنيۆەرسيتەتى مەملەكەت باسشىسى قاسىم-جومارت توقايەۆتىڭ قازاقستان حالقىنا ارناعان «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىن تالقىلاۋعا ارنالعان كەزدەسۋ وتكىزدى، - دەپ حابارلايدى alnews.
كەزدەسۋدىڭ تاقىرىبى – «جولداۋدىڭ باسىمدىقتارى: ۇلتتىق مەملەكەتتىلىك جانە قۇقىقتىق سانا».
ءىس-شاراعا عىلىمي قاۋىمداستىق وكىلدەرى، ۋنيۆەرسيتەتتىڭ پروفەسسور-وقىتۋشىلار قۇرامى، الماتى قالاسى اكىمدىگىنىڭ وكىلدەرى جانە QyzPU ستۋدەنتتىك قۇرىلتايىنىڭ مۇشەلەرى قاتىستى.
كەزدەسۋ بارىسىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما ءتوراعاسى – رەكتورى بەيبىتگۇل كارىموۆا جولداۋدا بەلگىلەنگەن مىندەتتەردى جۇزەگە اسىرۋ اكادەميالىق قاۋىمداستىق پەن مەملەكەتتىك ينستيتۋتتاردىڭ كۇش-جىگەرىن بىرىكتىرۋدى تالاپ ەتەتىنىن اتاپ ءوتتى. ول ۇلتتىق مەملەكەتتىلىكتىڭ تاريحي نەگىزدەرىن زەرتتەۋ، زاڭ ۇستەمدىگىن نىعايتۋ جانە جاستاردىڭ قۇقىقتىق مادەنيەتىن قالىپتاستىرۋ باعىتىنداعى بىرلەسكەن جۇمىستىڭ ماڭىزدىلىعىنا ەرەكشە توقتالدى.
پرەزيدەنت جولداۋىندا ەلىمىزدىڭ الەۋمەتتىك-ەكونوميكالىق دامۋىنا، حالىقتىڭ ءال-اۋقاتىن ارتتىرۋعا، سيفرلىق ەكونوميكانى قالىپتاستىرۋعا جانە ينفراقۇرىلىمدى جاڭعىرتۋعا باعىتتالعان ءبىرقاتار باسىم مىندەتتەر ايقىندالعان.
مەملەكەت باسشىسى 2027 جىلدى «جالپىحالىقتىق اۋقىمدى قۇرىلىس جىلى» دەپ جاريالاۋدى ۇسىنىپ، ەڭ تومەنگى جالاقى مولشەرىن 85 مىڭ تەڭگەدەن 110 مىڭ تەڭگەگە دەيىن ارتتىرۋدى تاپسىردى.
سونىمەن قاتار، اۋىل شارۋاشىلىعى ونىمدەرىن تەرەڭ وڭدەۋدى دامىتۋعا، اگرارلىق سەكتورعا جاساندى ينتەللەكت تەحنولوگيالارىن ەنگىزۋگە جانە سۋ رەسۋرستارىن ۇتىمدى پايدالانۋعا ەرەكشە نازار اۋدارىلدى.
پرەزيدەنت ءبىلىم بەرۋ سالاسىنداعى رەفورمالار مۇعالىمدەردىڭ جۇمىسىن جەڭىلدەتۋگە جانە ولاردىڭ شامادان تىس جۇكتەمەسىن ازايتۋعا باعىتتالۋى ءتيىس ەكەنىن اتاپ ءوتتى.
بۇدان بولەك، جولداۋدا شاعىن جانە ميكروبيزنەس سۋبەكتىلەرىن تەكسەرۋگە ءۇش جىلدىق موراتوريي ەنگىزۋ مۇمكىندىگىن قاراستىرۋ، سالىق زاڭناماسىنا وزگەرىستەر ازىرلەۋ، جاڭا ازاماتتىق كودەكستى قابىلداۋ جانە مەملەكەتتىك كومەكتى شىن مانىندە مۇقتاج ازاماتتارعا اتاۋلى تۇردە كورسەتۋ ماسەلەلەرى قوزعالدى.
جولداۋدا بەلگىلەنگەن مىندەتتەردى تالقىلاۋ بارىسىندا ۇلتتىق عىلىم اكادەمياسىنىڭ، عىلىمي-زەرتتەۋ ينستيتۋتتارىنىڭ، الماتى قالاسى اكىمدىگىنىڭ وكىلدەرى مەن عالىمدار ۇلتتىق مەملەكەتتىلىك، قۇرىلتاي ينستيتۋتىنىڭ تاريحي ماڭىزى، زاڭ ۇستەمدىگى جانە قوعامدىق ديالوگ ماسەلەلەرى بويىنشا پىكىر الماستى.
كەزدەسۋ اياسىندا مەملەكەت جانە قوعام قايراتكەرى ومارحان وكسىكبايەۆ پەن تۇركىتانۋشى عالىم زاريپباي ورازبايدىڭ اۆتورلىعىمەن جارىق كورگەن «قۇرىلتاي فەنومەنى» كىتابىنىڭ تانىستىرىلىمى ءوتتى.
سونداي-اق زاڭگەر، PhD دوكتورى باقىتجان ساپاروۆتىڭ «كونستيتۋسيا ساقشىلارى» اتتى تانىمدىق كوميكسى كوپشىلىك نازارىنا ۇسىنىلدى.
