الماتى قۇراماسى تارازدا وتكەن ەرلەر مەن ايەلدەر اراسىنداعى بوكستان قازاقستان چەمپيوناتىن التى چەمپيوندىق اتاقپەن جانە جالپىكوماندالىق مەدال ەسەبىندە ءبىرىنشى ورىنمەن اياقتادى. بۇل الماتىلىق بوكسشىلاردىڭ التىن مەدال سانى بويىنشا سوڭعى التى جىلداعى ەڭ تابىستى كورسەتكىشى. بۇل تۋرالى الماتى قالاسى سپورت باسقارماسىنىڭ وكىلدەرى ايتتى.
2021-2025 جىلدار ارالىعىندا قالا سپورتشىلارى قازاقستان چەمپيوناتتارى مەن ەل سپارتاكياداسىندا ءار ماۋسىمدا ەكىدەن تورتكە دەيىن التىن مەدال جەڭىپ العان. بيىل بىردەن التى الماتىلىق بوكسشى جەڭىس تۇعىرىنىڭ ەڭ بيىك ساتىسىنا كوتەرىلدى. بىلتىرعى قازاقستان چەمپيوناتىمەن سالىستىرعاندا چەمپيوندىق اتاق سانى ءۇش ەسە ارتتى.
جالپى الماتى قۇراماسىنىڭ قورجىنىندا 14 جۇلدە بار. ونىڭ التاۋى – التىن، تورتەۋى – كۇمىس، تاعى تورتەۋى – قولا مەدال.
جالپىكوماندالىق ەسەپتەگى جەڭىسكە ەرلەر مەن ايەلدەر قۇرامالارى بىردەي ۇلەس قوستى. ەكى كوماندا دا الماتى قورجىنىنا ءۇش التىن مەدالدان سالدى.
قازاقستان چەمپيوناتى تارازدا ءوتتى. جارىسقا ەلىمىزدىڭ 20 وڭىرىنەن 369 سپورتشى قاتىستى. جەڭىمپازدار مەن جۇلدەگەرلەر ەرلەر اراسىندا ون، ايەلدەر اراسىندا ون سالماق دارەجەسى بويىنشا انىقتالدى.
الماتى اتىنان قاتىسقان جەڭىمپازدار مەن جۇلدەگەرلەر
التىن مەدال: فارۋح توقتاسىنوۆ – 70 كەلىگە دەيىن، نۇربەك مۇرسال – 75 كەلىگە دەيىن، دانيار راحىمبەردينوۆ – 90 كەلىدەن جوعارى، ۆيكتوريا گرافەيەۆا – 60 كەلىگە دەيىن، باقىت سەيدىش – 70 كەلىگە دەيىن، ەلدانا ءتالىپوۆا – 80 كەلىدەن جوعارى.
كۇمىس مەدال: سۇلتانبەك ايبار ۇلى – 85 كەلىگە دەيىن، ەرسۇلتان ساپار – 90 كەلىدەن جوعارى، نازىم قىزايباي – 54 كەلىگە دەيىن، شاحناز يسايەۆا – 57 كەلىگە دەيىن.
قولا مەدال: بەكنۇر باتىربەك – 85 كەلىگە دەيىن، ەليانۇر تۇرعانوۆا – 48 كەلىگە دەيىن، دانا ديداي – 70 كەلىگە دەيىن، اسەل توقتاسىن – 80 كەلىدەن جوعارى.
