2026 جىلى العاشقى توعىز ايدا الماتى ازيا ەلدەرىندە وتكەن حالىقارالىق تۋريستىك كورمەلەردە بەس مارتە ماراپاتتالدى، - دەپ حابارلايدى alnews.
وسى ۋاقىت ارالىعىندا قالانىڭ تۋريستىك سالا وكىلدەرى شەتەلدىك سەرىكتەستەرمەن 500-دەن استام ىسكەرلىك كەزدەسۋ وتكىزىپ، كەمىندە 284 كەلىسىمگە قول جەتكىزدى. بۇل تۋرالى الماتى قالاسى تۋريزم باسقارماسىنىڭ وكىلدەرى حابارلادى.
قاڭتار مەن قىركۇيەك ارالىعىندا الماتىنىڭ تۋريستىك الەۋەتى ءۇندىستان، جۇڭگو، وڭتۇستىك كورەيا، مالايزيا جانە جاپونيادا، سونداي-اق گونكونگتا ۇيىمداستىرىلعان جەتى حالىقارالىق كورمەدە تانىستىرىلدى.
حالىقارالىق ءىس-شارالاردا الماتى ءتۇرلى اتالىم بويىنشا ۇزدىكتەر قاتارىنان كورىندى. اتاپ ايتقاندا، مۋمبايدا قالالىق ءتۋريزمدى ۇزدىك ىلگەرىلەتكەنى ءۇشىن، گۋانچجوۋدا ەڭ تانىمال مادەني باعىت رەتىندە، ال سەۋلدە كورمە ستەندىنىڭ ۇزدىك مازمۇنى ءۇشىن ماراپاتتالدى. گونكونگتا الماتى ستەندىنىڭ جۇمىسى ارنايى جۇلدەگە يە بولسا، كۋالا-لۋمپۋردا قالانىڭ مادەني باعدارلاماسى ۇزدىك دەپ تانىلدى.
كورمەلەر اياسىندا الماتىنىڭ تۋريستىك كومپانيالارى شەتەلدىك تۋروپەراتورلارمەن، اۋە تاسىمالداۋشىلارىمەن، قوناق ءۇي جەلىلەرىمەن جانە تۋريستىك قاۋىمداستىقتارمەن كەلىسسوزدەر جۇرگىزدى. كەزدەسۋلەر بارىسىندا قالانىڭ تۋريستىك مۇمكىندىكتەرىن حالىقارالىق نارىقتا ىلگەرىلەتۋ، جاڭا باعىتتار ازىرلەۋ جانە ءوزارا ىنتىماقتاستىقتى كەڭەيتۋ ماسەلەلەرى تالقىلاندى.
سونىمەن قاتار حالىقارالىق كورمەلەردە Almaty Tourism Day اتتى الماتى ءتۋريزمى كۇندەرى ۇيىمداستىرىلدى. ارنايى ءىس-شارالاردا جەرگىلىكتى كومپانيالار قىزمەتىن شەتەلدىك سەرىكتەستەرگە تانىستىرىپ، بىرلەسكەن جوبالاردى جۇزەگە اسىرۋ مۇمكىندىكتەرىن قاراستىردى.
الماتىنىڭ تۋريستىك الەۋەتىن تانىستىرۋ كەزىندە مادەني، گاسترونوميالىق، وقيعالىق جانە تاۋ تۋريزمىنە ەرەكشە نازار اۋدارىلدى. سونداي-اق قالا مەن ونىڭ اينالاسىنداعى تابيعي كورىكتى جەرلەر شەتەلدىك تۋريستىك نارىق وكىلدەرىنە ۇسىنىلدى.
الماتى قالاسى تۋريزم باسقارماسىنىڭ مالىمەتىنشە، حالىقارالىق كورمەلەرگە قاتىسۋ ازيا ەلدەرىنىڭ تۋريستىك يندۋسترياسىمەن ىسكەرلىك بايلانىستى نىعايتۋعا، جاڭا سەرىكتەستەر تارتۋعا جانە الماتىنى حالىقارالىق تۋريستىك باعىت رەتىندە كەڭىنەن تانىتۋعا مۇمكىندىك بەردى.
