الماتىدا ناۋرىز مەيرامى اياسىندا تازارۋ كۇنىنە وراي جالپىقالالىق سەنبىلىك ءوتتى. ەكولوگيالىق اكسياعا قالا اكىمى دارحان ساتىبالدى قاتىستى.
نەگىزگى ءىس-شارالار 23 ناۋرىز ناۋرىزباي اۋدانىندا — ج. جيەمبايەۆ اتىنداعى قازاق وسىمدىك قورعاۋ جانە كارانتين عىلىمي-زەرتتەۋ ينستيتۋتى ماڭىنداعى سكۆەردە ءوتتى. قالا اكىمى تۇرعىندارمەن بىرگە اۋماقتى كوركەيتۋ جۇمىستارىنا قاتىستى.
اكىمنىڭ ايتۋىنشا، بۇل باستاما مەملەكەت باسشىسىنىڭ باستاماسىمەن جۇزەگە اسىرىلىپ جاتقان «تازا قازاقستان» رەسپۋبليكالىق باعدارلاماسى اياسىندا قولعا الىنعانىن اتاپ ءوتتى. شاھار باسشىسى بۇل ناۋقان يگى داستۇرگە اينالعانىن جەتكىزدى.
«تازا قازاقستان» ارقىلى ءبىز جاستارعا ۇلگى كورسەتىپ، تازالىق مادەنيەتىن قالىپتاستىرامىز. پرەزيدەنتتىڭ باستاماسىمەن بۇل باعدارلاما ەلىمىزدىڭ بارلىق وڭىرىندە جۇزەگە اسىرىلىپ جاتىر. بۇل تەك اۋلانى تازا ۇستاۋ ەمەس، جالپى مادەنيەت دەڭگەيىن وزگەرتۋ»، — دەدى دارحان ساتىبالدى.
جالپىقالالىق سەنبىلىك الماتىنىڭ بارلىق اۋدانىن قامتىپ، 24 ورىن ءوتتى. اكسياعا 10 مىڭنان استام ادام قاتىسىپ، 2 035 بىرلىك ارنايى تەحنيكا جۇمىلدىرىلدى.
سەنبىلىكتە 2 مىڭ تەكشە مەتردەن استام قوقىس شىعارىلىپ، 2 010 اعاش پەن بۇتا ەگىلدى. سونىمەن قاتار، اۋلالار، قوعامدىق كەڭىستىكتەر، ارىق جەلىلەرى جانە ىرگەلەس اۋماقتار تازارتىلدى.
تازالىق جانە كورىكتەندىرۋ جۇمىستارى الاتاۋ اۋدانىندا — سايالى شاعىناۋدانىندا، المالى اۋدانىندا — گاندي ساياباعىندا، اۋەزوۆ اۋدانىندا — اقساي-1ا شاعىناۋدانىندا جانە سايران كولى اۋماعىندا، بوستاندىق اۋدانىندا — ۇلكەن الماتى وزەنىنىڭ جاعالاۋىندا، جەتىسۋ اۋدانىندا — جانگەلدين سكۆەرىندە، مەدەۋ اۋدانىندا — ەسەنتاي وزەنى بويىندا، تۇركسىب اۋدانىندا — قايرات شاعىناۋدانىندا جۇرگىزىلدى.
ءىس-شاراعا قالا تۇرعىندارى، ەرىكتىلەر مەن جاستار بەلسەندى قاتىستى.
تازارۋ كۇنى — ناۋرىزناما ونكۇندىگىن قورىتىندىلايتىن كۇن. ول ەكولوگيالىق مادەنيەتتى قالىپتاستىرۋعا، قورشاعان ورتاعا جاناشىرلىقپەن قاراۋعا جانە قالالىق ورتانى دامىتۋعا باعىتتالعان.
