الماتى قالاسىنىڭ اكىمى دارحان ساتىبالدى OpenAI كومپانياسىنىڭ وكىلدەرىمەن كەزدەسىپ، جاساندى ينتەللەكت، ءبىلىم بەرۋ جۇيەسىن سيفرلاندىرۋ، مامان دايارلاۋ جانە قالانىڭ تەحنولوگيالىق ەكوجۇيەسىن دامىتۋ باعىتىنداعى سەرىكتەستىك مۇمكىندىكتەرىن تالقىلادى، - دەپ حابارلايدى alnews.
OpenAI دەلەگاسياسىنىڭ قۇرامىندا كومپانيانىڭ ەۋروپا، تاياۋ شىعىس جانە افريكا وڭىرلەرى بويىنشا ءبىلىم بەرۋ باعىتىنىڭ جەتەكشىسى كارلوتتا ريەۆيلو، «ەلدەرگە ارنالعان ءبىلىم بەرۋ» حالىقارالىق باعىتىنىڭ جەتەكشىسى ۆالەري فوككە، EMEA جانە APAC وڭىرلەرىندەگى ءبىلىم بەرۋ جانە مەملەكەتتىك سەكتور بويىنشا Solutions Engineering باعىتىنىڭ جەتەكشىسى شايگ ابدۋراگيموۆ، «ەكونوميكالىق ىقپال جانە ءوزارا ءىس-قيمىل» باعىتىنىڭ جەتەكشىسى رەيچەل براۋن، Silkroad Innovation Hub باس ديرەكتورى اسەت ابدۋالييەۆ جانە Bilim Group كومپانياسىنىڭ ChatGPT Edu جوباسىنىڭ جەتەكشىسى ماعجان امانعازى بولدى.
كەزدەسۋ بارىسىندا دارحان ساتىبالدى الماتىنىڭ ەلىمىزدەگى ەڭ ءىرى تەحنولوگيالىق ءارى ءبىلىم بەرۋ ورتالىعى ەكەنىن اتاپ ءوتتى. ونىڭ ايتۋىنشا، قالادا جەتەكشى جوعارى وقۋ ورىندارى، عىلىمي ۇيىمدار، تەحنولوگيالىق كومپانيالار مەن ستارتاپتار شوعىرلانعان. سونداي-اق، قالا سيفرلىق ەكونوميكانى جۇيەلى تۇردە دامىتىپ، الەمدىك وزىق تەحنولوگيانى تارتۋعا مۇددەلى ەكەنى ايتىلدى.
تاراپتار قازاقستانداعى ChatGPT Edu جوباسىن ىسكە اسىرۋ ماسەلەسىنە ەرەكشە نازار اۋداردى. بۇگىندە الماتى بۇل پلاتفورمانى ءبىلىم بەرۋ ۇيىمدارىنا ەنگىزۋ بويىنشا كوشباسشى قالالاردىڭ ءبىرى سانالادى. جوباعا ءقازىردىڭ وزىندە 500-دەن استام ءبىلىم بەرۋ ۇيىمى قوسىلىپ، بەلسەندىرىلگەن ليسەنزيالار سانى 5 مىڭنان استى.
كەزدەسۋگە قاتىسۋشىلار جاساندى ينتەللەكت تەحنولوگياسىن ءبىلىم بەرۋ ۇدەرىسىندە، پەداگوگتەردى دايارلاۋ مەن ولاردىڭ بىلىكتىلىگىن ارتتىرۋدا، عىلىمي زەرتتەۋلەر جۇرگىزۋدە جانە مەملەكەتتىك باسقارۋ تيىمدىلىگىن كۇشەيتۋدە قولدانۋدىڭ جاڭا مۇمكىندىكتەرىن تالقىلادى.
سونىمەن قاتار الماتىداعى جاساندى ينتەللەكت ەكوجۇيەسىن دامىتۋ ماسەلەسى ءسوز بولدى. دارحان ساتىبالدى جالپى اۋماعى 75 مىڭ شارشى مەتردەن اساتىن Almaty AI Park جوباسىن جۇزەگە اسىرۋ جوسپارىمەن ءبولىستى. جوبانىڭ العاشقى كەزەڭىندە تەحنولوگيالىق كومپانيالاردى، ستارتاپتاردى، زەرتتەۋ ورتالىقتارى مەن ءبىلىم بەرۋ ۇيىمدارىن بىرىكتىرەتىن Almaty AI Hub ىسكە قوسىلادى.
بۇعان قوسا، بىرلەسكەن ءبىلىم بەرۋ جانە عىلىمي-زەرتتەۋ باعدارلامالارىن ازىرلەۋ، AI-زەرتحانالارىن اشۋ، حاكاتوندار وتكىزۋ، سونداي-اق مەملەكەتتىك قىزمەتشىلەردىڭ، وقىتۋشىلار مەن ستۋدەنتتەردىڭ بىلىكتىلىگىن ارتتىرۋ باعدارلامالارىن ىسكە اسىرۋ مۇمكىندىكتەرى قاراستىرىلدى. سونىمەن بىرگە ستارتاپتاردى قولداۋ جانە جاساندى ينتەللەكت نەگىزىندەگى شەشىمدەردى قالالىق ەكونوميكانىڭ ءتۇرلى سالالارىنا ەنگىزۋ جايى تالقىلاندى.
كەزدەسۋ سوڭىندا تاراپتار جاساندى ينتەللەكت سالاسىنداعى ىنتىماقتاستىقتى ودان ءارى دامىتۋعا جانە بىرلەسكەن جوبالاردى جۇزەگە اسىرۋعا دايىن ەكەندەرىن راستادى.
OpenAI وكىلدەرىنىڭ ساپارى قازاقستاننىڭ ءبىلىم بەرۋ جۇيەسىنە جاساندى ينتەللەكت تەحنولوگياسىن ەنگىزۋگە باعىتتالعان ۇلتتىق جوبا اياسىندا جۇزەگە اسۋدا. اتالعان باستاما اياسىندا ەلىمىز بويىنشا 165 مىڭ پەداگوگ ChatGPT Edu پلاتفورماسىنا قول جەتكىزەدى.
