الماتى ناۋرىز مەيرامىن كەڭ اۋقىمدا اتاپ وتۋدە.
بۇگىن الماتى ناعىز كوكتەم مەرەكەسىنىڭ ورتالىعىنا اينالدى – قالا ناۋرىز مەيرامىن ەرەكشە سان-سالتاناتپەن تويلاۋدا. مەرەكەلىك الاڭدار مەگاپوليستىڭ تۇكپىر-تۇكپىرىندە پايدا بولدى، ءداستۇر بويىنشا باستى كونسەرت استانا الاڭىندا وتۋدە. تاڭ سارىدەن بەرى مۇندا شاتتىققا تولى اتموسفەرا، ۇلتتىق رۋح پەن بىرلىكتىڭ ايقىن كورىنىسى سەزىلەدى.
الماتى اكىمى ەربولات دوسايەۆ سالتاناتتى شاراعا قاتىسىپ، جاڭارۋ، تاتۋلىق پەن بەرەكە سيمۆولى – ناۋرىزدىڭ ماڭىزدىلىعىن اتاپ ءوتتى. سونداي-اق، مەرەكەگە قازاقستاننىڭ ەڭبەك ەرى، حالىق ءارتيسى ءاسانالى ءاشىموۆ، حالىق قاھارمانى ءسات توقپاقبايەۆ، قازاقستاننىڭ ەڭبەك ەرى اياگۇل ميرازوۆا، قازاقستان جازۋشىلار وداعىنىڭ ءتوراعاسى مەرەكە قۇلكەنوۆ جانە كوپتەگەن زيالى قاۋىم وكىلدەرى، قالا تۇرعىندارى مەن قوناقتارى قاتىستى.
كورەرمەندەرگە «الماتى – ناۋرىز قۇشاعىندا» اتتى اۋقىمدى كونسەرت ۇسىنىلدى. وندا اڭىزعا اينالعان ونەر جۇلدىزدارى: «دوس-مۇقاسان» ءانسامبلى، مايرا مۇحامەد قىزى، جانار ايجانوۆا، ءومىرقۇل اينيازوۆ، «سازگەن سازى» فولكلورلىق-ەتنوگرافيالىق ءانسامبلى، جازيرا بايىربەكوۆا، يگور بلاگورودنىي، تولەگەن راحىمبايەۆ، «كەشYOU» توبى، دينايا، AyaFunk جانە باسقا دا تانىمال ونەرپازدار ونەر كورسەتتى.
مەرەكەلىك شارالار 23 ناۋرىزعا دەيىن جالعاسادى. كۇن سايىن ساعات 22:00-گە دەيىن قالا قوناقتارى مەن تۇرعىندارى Juldyzdy Almaty فەستيۆالى اياسىندا جارقىن كونسەرتتەردى، تەاتر قويىلىمدارىن، ۇلتتىق ويىنداردى، ءتۇرلى پەرفورمانستار مەن قولونەر جارمەڭكەلەرىن تاماشالاي الادى.
