الماتى اكىمى دارحان ساتىبالدى ۆەتنامنىڭ ROX Group ءىرى ينۆەستيسيالىق توبىنا كىرەتىن ROX Living Global ديەۆەلوپەرلىك كومپانيانىڭ وكىلدەرىمەن كەزدەستى، - دەپ حابارلايدى alnews.
كەزدەسۋدە Almaty Downtown جاڭا ىسكەرلىك اۋدانىن دامىتۋعا ROX Group كومپانياسىنىڭ قاتىسۋ مۇمكىندىكتەرى قاراستىرىلدى.
كەزدەسۋ بارىسىندا ROX Living Global كومپانياسىنىڭ باس ديرەكتورى چان تحي مي لوك باستاعان دەلەگاسيا تۇرعىن ءۇي جانە كوممەرسيالىق جىلجىمايتىن مۇلىك نىساندارىن قامتيتىن كوپفۋنكسيونالدى كەشەن سالۋ جونىندەگى ۇسىنىسىن تانىستىردى.
جوبا تۇجىرىمداماسى تۇرعىن ۇيلەرمەن قاتار كەڭسەلەردى، ساۋدا ورىندارىن، ءبىلىم بەرۋ جانە مەديسينالىق مەكەمەلەردى، سپورت نىساندارى مەن قوعامدىق كەڭىستىكتەردى قامتيدى. سونداي-اق، اۋماقتى كوگالداندىرۋعا، جۇرگىنشىلەرگە قولايلى ورتا قالىپتاستىرۋعا جانە قوعامدىق كەڭىستىكتەردى كوركەيتۋگە باسىمدىق بەرىلگەن.
دارحان ساتىبالدى الماتىنىڭ دامۋدىڭ پوليورتالىق ۇلگىسىنە كوشىپ جاتقانىن، سونىڭ اياسىندا جاڭا ىسكەرلىك ورتالىقتار قالىپتاساتىنىن اتاپ ءوتتى. سولاردىڭ ءبىرى Almaty Downtown بولماق.
«كوپفۋنكسيونالدى كەشەن سالۋ جونىندەگى باستاماڭىزدى قولدايمىز. ءوز تاراپىمىزدان اكىمدىك جوبانى جۇزەگە اسىرۋعا جان-جاقتى قولداۋ كورسەتەدى. جوبانى ءىس جۇزىندە ىسكە اسىرۋ كەزەڭىنە مۇمكىندىگىنشە تەزىرەك كوشەدى دەپ سەنەمىز»، – دەدى الماتى اكىمى.
1996 جىلى قۇرىلعان ROX Group جىلجىمايتىن مۇلىك، قارجى، ەنەرگەتيكا جانە قوناق ءۇي بيزنەسى سالالارىندا جۇمىس ىستەيدى. توپتىڭ ينۆەستيسيالىق پورتفەلىندە الەمنىڭ 12 ەلىندەگى 100-دەن استام جوبا بار. كومپانيانىڭ ورتالىق ازياداعى ءىرى جوبالارىنىڭ ءبىرى بىشكەك قالاسىندا جۇزەگە اسىرىلىپ جاتىر.
