الماتى اكىمى دارحان ساتىبالدى جۇمىس ساپارى بارىسىندا ۇلكەن الماتى كولى (ۇاك) ماڭىنداعى تۋريستىك ينفراقۇرىلىمدى دامىتۋعا باعىتتالعان جوبالارمەن تانىستى، - دەپ حابارلايدى alnews.
ساپار كەزىندە قالا باسشىسىنا «الماتى – كوسموستانسيا» اۆتوجولىن، سونداي-اق «الما-اراسان» شيپاجايىنا اپاراتىن كىرەبەرىس جولدى كۇردەلى جوندەۋ جوباسى تانىستىرىلدى. جوبا اياسىندا ۇزىندىعى 26،5 شاقىرىم جول تولىق جاڭارتىلىپ، اۆتوتۇراق سالىنادى. بۇل كولىك قوزعالىسىنىڭ قاۋىپسىزدىگىن ارتتىرىپ، اتالعان اۋماقتاعى كولىك جۇكتەمەسىن ازايتۋعا مۇمكىندىك بەرەدى.
سونىمەن قاتار اكىمگە ۇلكەن الماتى كولىنە اپاراتىن اسپالى جول ستانسياسىنىڭ تۇجىرىمداماسى كورسەتىلدى. جوبا ەكولوگيالىق تازا كولىك ءتۇرىن دامىتۋعا، شاھاردىڭ ەڭ تانىمال تۋريستىك ورىندارىنىڭ بىرىنە قولجەتىمدىلىكتى ارتتىرۋعا جانە تابيعي اۋماققا تۇسەتىن انتروپوگەندىك جۇكتەمەنى ازايتۋعا باعىتتالعان.
ساپار بارىسىندا ۇلكەن الماتى كولىنە اپاراتىن جۇرگىنشىلەر سوقپاعىن كوركەيتۋ جوباسىنا دا ەرەكشە نازار اۋدارىلدى. دارحان ساتىبالدى مارشرۋت بويىمەن ءجۇرىپ ءوتىپ، قۇرىلىس-مونتاج جۇمىستارى باستالعان ۋچاسكەنى ارالاپ كوردى.
جوبا اياسىندا ۇزىندىعى 5،3 شاقىرىم بولاتىن زاماناۋي تۋريستىك سوقپاق سالىنادى. وندا كەلۋشىلەردىڭ ءقاۋىپسىز ءارى جايلى قوزعالىسى ءۇشىن بارلىق قاجەتتى ينفراقۇرىلىم قاراستىرىلادى. مارشرۋت بويىنا باعىتتاۋشى بەلگىلەر مەن اقپاراتتىق ستەندتەر ورناتىلىپ، دەمالىس ورىندارى، شولۋ الاڭدارى، فوتوايماق، كۇردەلى ۋچاسكەلەردە باسپالداقتار مەن وتكەلدەر، سونداي-اق شاعىن ساۋلەتتىك نىساندار ورناتىلادى.
جوبانى جۇزەگە اسىرۋ تۋريستەر لەگىن رەتتەۋگە، مارشرۋتتىڭ قاۋىپسىزدىگىن قامتاماسىز ەتۋگە، تابيعي ەكوجۇيەگە تۇسەتىن سالماقتى ازايتۋعا جانە ىلە الاتاۋى مەملەكەتتىك ۇلتتىق تابيعي پاركىنىڭ اۋماعىندا زاماناۋي تۋريستىك ينفراقۇرىلىم قۇرۋعا مۇمكىندىك بەرەدى.
جۇمىس ساپارىنىڭ سوڭىندا الماتى اكىمى بارلىق جوبانى ساپالى ءارى بەلگىلەنگەن مەرزىمدە اياقتاۋدى تاپسىردى. سونداي-اق، ەكولوگيالىق تالاپتاردىڭ قاتاڭ ساقتالۋى، تابيعي لاندشافتتىڭ بۇزىلماۋى جانە تۋريستىك ينفراقۇرىلىمدى دامىتۋ بارىسىندا قاۋىپسىزدىك پەن تابيعي مۇرانى ساقتاۋ باستى باسىمدىق بولۋى كەرەكتىگىن اتاپ ءوتتى.
