الماتى اكىمى دارحان ساتىبالدىنىڭ توراعالىعىمەن الداعى جىلۋ بەرۋ ماۋسىمىنا قالالىق ينفراقۇرىلىمدى دايىنداۋ ماسەلەسى بويىنشا كەڭەس ءوتتى، - دەپ حابارلايدى alnews.
جيىن بارىسىندا جىلۋمەن، ەلەكترمەن، گازبەن جانە سۋمەن جابدىقتاۋ نىساندارىنىڭ دايىندىعى، سونداي-اق تۇرعىن ءۇي قورى مەن الەۋمەتتىك نىسانداردىڭ الداعى قىسقى كەزەڭگە ازىرلىگى قارالدى.
ەنەرگەتيكا جانە سۋمەن جابدىقتاۋ باسقارماسى وكىلدەرىنىڭ مالىمەتىنشە، قالالىق شارۋاشىلىقتىڭ جىلۋ بەرۋ ماۋسىمىنا جالپى دايىندىعى 50،5%. بارلىق جۇمىس بەكىتىلگەن كەستەگە سايكەس جۇرگىزىلۋدە. قازىرگى تاڭدا «الەس» اق نىساندارىنىڭ دايىندىعى – 52%، «اجك» اق – 46%، «الماتى سۋ» مكك – 71%، «الماتىجىلۋجايەنەرگو» ج ش س – 39%، «الماتى جىلۋ جۇيەسى» ج ش س – 38%، گاز جەلىلەرىنىڭ دايىندىعى 57% بولادى.
تۇرعىن ءۇي قورىن دايىنداۋ جايىنا ەرەكشە نازار اۋدارىلدى. الماتىدا 9 861 كوپپاتەرلى تۇرعىن ءۇي بار، ونىڭ 9 283ء-ى ورتالىقتاندىرىلعان جىلۋمەن جابدىقتاۋ جۇيەسىنە قوسىلعان. 22 ماۋسىمداعى جاعداي بويىنشا 984 تۇرعىن ءۇي دايىندىق اكتىسىن العان. جىلىتۋ جۇيەلەرىن شايۋ جانە قىسىممەن تەكسەرۋ، سونداي-اق ۇيىشىلىك ينجەنەرلىك جەلىلەردى جوندەۋ جۇمىستارى جالعاسۋدا. بۇل جۇمىستار بيىلعى جىلدىڭ 10 قىركۇيەگىنە دەيىن اياقتالۋعا ءتيىس.
سونىمەن قاتار باسقارۋ ورگاندارى جوق 230 كوپپاتەرلى تۇرعىن ءۇيدىڭ جاعدايى جەكە قارالدى. ولاردى قىسقى ماۋسىمعا دايىنداۋ ءۇشىن اۋدان اكىمدىكتەرىمەن بىرلەسىپ جىلىتۋ جۇيەلەرىن شايۋ جانە قىسىممەن تەكسەرۋ، سونداي-اق قاجەتتى ەنەرگيا ۇنەمدەۋ شارالارىن جۇرگىزۋ جوسپارلانعان. اتالعان جۇمىستاردى تامىز ايىنىڭ سوڭىنا دەيىن اياقتاۋ كوزدەلىپ وتىر.
كەڭەس بارىسىندا كوممۋنالدىق كاسىپورىنداردىڭ جوندەۋ جانە ينۆەستيسيالىق باعدارلامالاردى ىسكە اسىرۋ بارىسى تۋرالى ەسەبى تىڭدالدى. اتاپ ايتقاندا، بيىل 20 شاقىرىم جىلۋ جەلىسىن قايتا جاڭعىرتۋ، 379 شاقىرىم ەلەكتر جەلىسىن جاڭعىرتۋ، سونداي-اق جالپى ۇزىندىعى 60 شاقىرىمنان اساتىن سۋ قۇبىرى جانە كارىز جەلىلەرىن قايتا جاڭعىرتۋ جوسپارلانعان.
دارحان ساتىبالدى تۇرعىن ۇيلەردى كۇزگى-قىسقى كەزەڭگە دايىنداۋ ماسەلەسىنە ەرەكشە نازار اۋدارىپ، بۇل جۇمىستارعا باقىلاۋدى كۇشەيتۋ جونىندە باسقارمالار مەن اۋدان اكىمدەرىنە ناقتى تاپسىرمالار بەردى. سونىمەن قاتار قالا اكىمى تۇرعىن ءۇي قورىمەن قاتار بارلىق الەۋمەتتىك نىساننىڭ قىسقى ماۋسىمعا دايىندىعى ماسەلەسىن ءوزىنىڭ تۇراقتى باقىلاۋىندا ۇستايتىنىن اتاپ ءوتتى.
