الماتى قالاسىنىڭ اكىمى دارحان ساتىبالدى ناۋرىزباي اۋدانىن جۇمىس ساپارى بارىسىندا ارالاپ، «الماتى تازالىق» مكك-نىڭ جاڭارتىلعان وندىرىستىك بازاسىنا باردى، - دەپ حابارلايدى alnews.
شاھار باسشىسى ارنايى تەحنيكالاردى قاراپ، قىزمەتكەرلەردىڭ ەڭبەك جاعدايىمەن تانىسىپ، كاسىپورىن ۇجىمىمەن كەزدەستى.
اۋماعى 2 گەكتار بولاتىن وندىرىستىك بازا بايسۇلتانوۆ كوشەسىندە ورنالاسقان. مۇندا 352 ادام ەڭبەك ەتەدى جانە 66 ارنايى تەحنيكا، ونىڭ ىشىندە جولعا قىزمەت كورسەتەتىن 14 امبەباپ ماشينا بار.
كاسىپورىن اۋماعىندا 12،5 مىڭ شارشى مەتر اسفالتبەتون جابىنى توسەلىپ، كوكتايعاققا قارسى ماتەريالداردى ساقتاۋعا ارنالعان الاڭ جابدىقتالدى. سونداي-اق كوگالداندىرۋ جۇمىستارى جۇرگىزىلىپ، بازانىڭ ينفراقۇرىلىمى جاڭارتىلدى.
قىزمەتكەرلەرمەن كەزدەسۋدە دارحان ساتىبالدى كوممۋنالدىق قىزمەتتەردىڭ ساپالى جۇمىسى جۇمىسشىلاردىڭ ەڭبەك جاعدايىنا تىكەلەي بايلانىستى ەكەنىن اتاپ ءوتتى.
«قىزمەتكەرلەرگە لايىقتى ەڭبەك جاعدايىن جاساۋىمىز كەرەك. قاجەتتى جاعداي جاسالماسا، جۇمىستى ساپالى ورىنداۋدى قالاي تالاپ ەتەمىز؟ ەڭ الدىمەن، قالامىزدىڭ تازالىعىن كۇن سايىن قامتاماسىز ەتىپ جۇرگەن ادامداردىڭ ەڭبەگىن قۇرمەتتەۋىمىز قاجەت»، – دەدى قالا اكىمى.
كەزدەسۋ بارىسىندا قالا كوشەلەرىن كۇتىپ ۇستاۋ، تازالىق جۇمىستارىن ۇيىمداستىرۋ جانە كوممۋنالدىق قىزمەت كورسەتۋ ساپاسىنا ەرەكشە نازار اۋدارىلدى.
«تازالىق ءبىرىنشى ورىندا تۇرۋى كەرەك. تازالىق، ءتارتىپ پەن كوركەيتۋ قالانىڭ جالپى كەلبەتىن قالىپتاستىرادى. باسقا ەلگە نەمەسە قالاعا بارعاندا، ەڭ الدىمەن، ونىڭ قانشالىقتى تازا ەكەنىنە نازار اۋدارامىز. بۇل قورشاعان ورتانى قالاي قابىلدايتىنىمىزعا جانە وعان دەگەن كوزقاراسىمىزعا اسەر ەتەدى. تازالىق جوق جەردە ءتارتىپ تە بولمايدى. سوندىقتان بۇل جۇمىس تۇراقتى ءارى جۇيەلى تۇردە جۇرگىزىلۋى كەرەك»، – دەدى دارحان ساتىبالدى.
قالا اكىمى مەملەكەت باسشىسى الماتىنى رەتكە كەلتىرۋ مىندەتىن قويعانىن دا جەتكىزدى. وسىعان بايلانىستى قالانى كوركەيتۋ جانە تازالىق ساقتاۋ جۇمىستارى جالعاسادى. ال كوممۋنالدىق قىزمەتتەر بۇل مىندەتتەردىڭ جۇيەلى ءارى ساپالى ورىندالۋىن قامتاماسىز ەتۋگە ءتيىس.
قازىرگى تاڭدا «الماتى تازالىق» كاسىپورنىنىڭ اۆتوپاركىندە 1 017 تەحنيكا بار. قىسقى تازالىق جۇمىستارىنا 830 تەحنيكا قاراستىرىلعان. ونىڭ ىشىندە جىل بويى پايدالانىلاتىن 700 ماشينا جانە قىسقى جۇمىستارعا ارنالعان 130 ارنايى تەحنيكا بار. ال قالعان 187 تەحنيكا جاز مەزگىلىندە قولدانىلادى.
بيىل كاسىپورىن قوسىمشا 200 ارنايى تەحنيكا ساتىپ الىپ جاتىر. سونىڭ ناتيجەسىندە اۆتوپارك قۇرامىنداعى تەحنيكانىڭ جالپى سانى 1 217-گە جەتەدى.
