الماتىدا ALMA LOVE 2026 جاستار فەستيۆالى باستالدى، - دەپ حابارلايدى alnews.
فەستيۆال 2 تامىز «تازا قازاقستان» جالپىۇلتتىق باستاماسى اياسىندا ۇيىمداستىرىلعان اۋقىمدى EcoDay ەكولوگيالىق اكسياسىمەن اشىلدى. قالانىڭ ءار اۋدانىندا ءبىر مەزگىلدە وتكەن ەكولوگيالىق ءىس-شاراعا 600-دەن استام جاس قاتىستى.
فەستيۆالدىڭ العاشقى كۇنى جاستار ۇيىمدارىن، ەرىكتىلەردى، بەلسەندىلەردى جانە قالا تۇرعىندارىن ورتاق ماقساتقا – ALMA LOVE فەستيۆالىن تۋعان قالاعا جاناشىرلىق تانىتۋدان باستاۋعا جۇمىلدىردى. قاتىسۋشىلار اۋلا مەن قوعامدىق كەڭىستىكتەردى تازالاپ، ەكولوگيالىق چەللەندجتەر ۇيىمداستىردى، تۇرعىندارمەن كەزدەسىپ، قورشاعان ورتاعا ۇقىپتى قاراۋعا، تازالىق ساقتاۋعا جانە جايلى قالالىق ورتانى بىرلەسىپ قالىپتاستىرۋعا ۇندەدى.
ەكولوگيالىق اكسيا بيىل «قالا سەنەن باستالادى. گورود ناچيناەتسيا س تەبيا» اتاۋىمەن ءوتىپ جاتقان فەستيۆالدىڭ ءمان-ماڭىزىن ايقىندايتىن العاشقى ءىس-شارا بولدى. ونىڭ نەگىزگى يدەياسى – الماتىعا دەگەن سۇيىسپەنشىلىك كۇندەلىكتى قاراپايىم ارەكەتتەردەن، ياعني قورشاعان ورتاعا قۇرمەتپەن قاراۋدان، ءوزى تۇراتىن اۋلاعا، كوشەگە جانە اۋدانعا جاناشىرلىق تانىتۋدان باستالاتىنىن كورسەتۋ.
ءىس-شارا سونداي-اق قازاقستان رەسپۋبليكاسى پرەزيدەنتىنىڭ «تازا قازاقستان» جالپىۇلتتىق باستاماسىن قولداۋعا، ەكولوگيالىق مادەنيەتتى ناسيحاتتاۋعا، ەرىكتى قوزعالىسىن دامىتۋعا جانە جاستاردىڭ قورشاعان ورتانىڭ جاي-كۇيىنە دەگەن جەكە جاۋاپكەرشىلىك سەزىمىن قالىپتاستىرۋعا باعىتتالعان.
اكسياعا قاتىسۋشىلاردىڭ ءبىرى مۇنداي باستامالار جاستاردى تەك قالانى تازا ۇستاۋعا عانا ەمەس، ورتاق قۇندىلىقتار توڭىرەگىندە بىرىكتىرۋگە دە ىقپال ەتەتىنىن اتاپ ءوتتى.
«ءبىز فەستيۆالدى كونسەرتپەن ەمەس، پايدالى ىسپەن باستادىق. بۇل تۋعان قالاعا دەگەن سۇيىسپەنشىلىكتىڭ سوزبەن ەمەس، ىسپەن كورىنەتىنىنىڭ جاقسى بەلگىسى. ەگەر ءار ادام ءوزى تۇراتىن اۋلاعا نەمەسە كوشەگە قامقورلىق تانىتسا، الماتى الدەقايدا تازا، كورىكتى ءارى جايلى قالاعا اينالادى. ناعىز ازاماتتىق جاۋاپكەرشىلىك وسىنداي قاراپايىم قادامداردان باستالادى»، – دەدى ەكوبەلسەندى، بلوگەر دۋلات نابييەۆ.
EcoDay اياسىنداعى ەكولوگيالىق ءىس-شارالارعا جالپى سانى 600-دەن استام ادام قاتىستى. بۇل اكسيا 12 تامىزعا دەيىن قالا بويىنشا وتەتىن ونداعان ءبىلىم بەرۋ، مادەني، سپورتتىق، شىعارماشىلىق جانە قوعامدىق ءىس-شارالاردى بىرىكتىرەتىن ALMA LOVE 2026 جاستار فەستيۆالىنىڭ العاشقى كەزەڭى بولدى.
ايتا كەتەيىك، فەستيۆال الماتى قالاسى جاستار ساياساتى باسقارماسىنىڭ قولداۋىمەن ۇيىمداستىرىلۋدا.
