كونستيتۋسيالىق كوميسسيانىڭ ەكىنشى وتىرىسىندا ق ر ادىلەت ءمينيسترى ەرلان سارسەمبايەۆ نەگىزگى زاڭعا ءبىرقاتار نەگىزگى وزگەرىستەردى ۇسىندى. اتالعان وزگەرىستەر ازاماتتاردان، ساياسي پارتيالاردان، قوعامدىق ۇيىمدار مەن ساراپشىلاردان تۇسكەن ۇسىنىستاردى ەسكەرە وتىرىپ ازىرلەندى، - دەپ حابارلايدى alnews.
اتاپ ايتقاندا، ۇكىمەتتىڭ، كونستيتۋسيالىق سوتتىڭ، پروكۋراتۋرا جانە سوت بيلىگى ورگاندارىنىڭ جەكەلەگەن فۋنكسيالارىن، قۇقىق قورعاۋ تەتىكتەرىن، جەرگىلىكتى ءوزىن-وزى باسقارۋدى، جەكەلەگەن اۋماقتاردا ارنايى قۇقىقتىق رەجيم بەلگىلەۋ قاعيداتتارىن، سونداي-اق كونستيتۋسياعا وزگەرىستەر مەن تولىقتىرۋلار ەنگىزۋ ءتارتىبىن رەگلامەنتتەيتىن كونستيتۋسيانىڭ بولىمدەرى مەن باپتارىنا وزگەرىستەر ەنگىزۋ ۇسىنىلادى.
تۇزەتۋلەردىڭ جەكە بلوگى بولاشاق ءبىر پالاتالى پارلامەنتتىڭ – قۇرىلتايدىڭ قىزمەتىنە قاتىستى بولادى. مىسالى، ءتوراعانى تاعايىنداۋ، ونىڭ دەپۋتاتتىق كورپۋسىن قالىپتاستىرۋ ءتارتىبى جانە وزگە دە راسىمدىك جاعدايلار ايقىندالادى.
ەرلان سارسەمبايەۆتىڭ ايتۋىنشا، كونستيتۋسياعا وزگەرىستەر مەن تولىقتىرۋلار ەنگىزۋ ءتارتىبىنىڭ ماڭىزدىلىعىن ەسكەرە وتىرىپ، ءتيىستى رەگلامەنتتەۋشى نورمالاردى جەكە بولىمگە ءبولۋ ۇسىنىلادى.
ۇكىمەت فۋنكسيالارىن رەگلامەنتتەۋدى وزگەرتۋ شەڭبەرىندە مەملەكەتتىك باعدارلامالاردى بەكىتۋدى، سونداي-اق مەملەكەتتىك كوميتەتتەرگە قاتىستى وكىلەتتىكتەردى الىپ تاستاۋ ۇسىنىلادى. اتاپ ايتقاندا، ولاردىڭ قىزمەتىن باسقارۋ، اكتىلەرىنىڭ كۇشىن جويۋ جانە توقتاتا تۇرۋ.
«مەملەكەتتىك جوسپارلاۋدىڭ جاڭا جۇيەسىنە سايكەس مەملەكەتتىك باعدارلامالار اتالعان جۇيەنىڭ قۇجاتتارى بولىپ تابىلمايدى. مۇنداي باعدارلامالار قاجەتتىلىگىنە قاراي ازىرلەنىپ، بەكىتىلەتىن بولادى»، - دەپ اتاپ ءوتتى ادىلەت ءمينيسترى.
ەرلان سارسەمبايەۆ قازاقستاندا 2021 جىلدان باستاپ مامانداندىرىلعان اكىمشىلىك سوتتاردىڭ ەنگىزىلۋى قۇقىق ۇستەمدىگى قاعيداتىن نىعايتۋداعى جانە مەملەكەت پەن ازامات اراسىنداعى ناقتى تەڭگەرىمدى قامتاماسىز ەتۋدەگى ماڭىزدى قادام بولعانىن ەسكە سالدى.
«وسىعان بايلانىستى كونستيتۋسيانىڭ ءتيىستى بابىندا سوت بيلىگى اكىمشىلىك سوت ءىسىن جۇرگىزۋ ارقىلى جۇزەگە اسىرىلاتىنىن تىكەلەي كورسەتۋ ۇسىنىلادى. بۇل اكىمشىلىك سوتتارعا كونستيتۋسيالىق-قۇقىقتىق مارتەبە بەرەدى، جاريا-قۇقىقتىق داۋلاردا ازاماتتاردىڭ قۇقىقتارىن قورعاۋ كەپىلدىكتەرىن ارتتىرادى جانە قوعامنىڭ سوت بيلىگىنە سەنىمىن نىعايتادى»، - دەپ اتاپ ءوتتى مينيستر.
جالپى، ەرلان سارسەمبايەۆتىڭ ايتۋىنشا، ەنگىزىلەتىن وزگەرىستەر مەملەكەتتىك جۇيەنىڭ تيىمدىلىگىن كۇشەيتەدى، ول تەك قانا جەكە تۇلعالاردىڭ ەمەس، جاريا بيلىك ينستيتۋتتارىنىڭ ساپاسىنا بايلانىستى بولادى.
«قوعام ءۇشىن بۇل مەملەكەتتىڭ سىرتقى نەمەسە ىشكى جاعدايلارعا قاراماستان دايەكتى ءارى قۇقىقتىق تۇرعىدا ارەكەت ەتەتىنىنە بولجامدىلىق پەن سەنىمدىلىكتى بىلدىرەدى. الەۋمەتتىك مىندەتتەمەلەر ورىندالۋدا، ەكونوميكالىق پروسەستەر جالعاسۋدا، حالىقارالىق مىندەتتەمەلەر ساقتالۋدا»، - دەپ قورىتىندىلادى ادىلەت ءمينيسترى.
