الماتىدا جاستار مەن ستۋدەنتتەردى، ەرىكتىلەردى، بەلسەندى تۇرعىندار مەن 100-گە جۋىق قالالىق قاۋىمداستىقتى ءبىر الاڭعا جيناعان City Makers: JASTAR QALASY فەستيۆالى ءوتتى، - دەپ حابارلايدى alnews.
ءىس-شارانىڭ نەگىزگى ماقساتى – جاستارعا قالا ومىرىنە بەلسەندى ارالاسۋعا، قابىلەتىن دامىتۋعا جانە جاڭا باستامالاردى جۇزەگە اسىرۋعا مۇمكىندىك بەرەتىن جوبالارمەن تانىستىرۋ.
بيىل فەستيۆالدە ستۋدەنتتەرگە، اسىرەسە ءبىرىنشى كۋرسقا ەندى قابىلدانعان جانە الماتىعا ەلىمىزدىڭ باسقا وڭىرلەرىنەن كەلگەن جاستارعا ەرەكشە كوڭىل ءبولىندى. ولار جاڭا ورتا تاۋىپ، پىكىرلەس ادامدارمەن تانىسىپ، وقۋدان تىس قىزىعۋشىلىقتارىنا ساي قاۋىمداستىقتارعا قوسىلىپ، قالانىڭ قوعامدىق ومىرىنە بەلسەندى ارالاسۋعا مۇمكىندىك الدى.
قاتىسۋشىلار ەكولوگيا، تەحنولوگيا، ءبىلىم بەرۋ، كرەاتيۆتى ەكونوميكا، الەۋمەتتىك قولداۋ، سپورت، كاسىپكەرلىك جانە قالالىق ورتا سالالارىنداعى باستاماسىن تانىستىردى. فەستيۆالدىڭ نەگىزىندە «ادال ازامات»، «تازا قازاقستان» جانە «زاڭ جانە ءتارتىپ» قاعيداتتارىمەن ۇندەس جاۋاپتى ازاماتتىق، جاسامپازدىق جانە بەلسەندى قاتىسۋ قۇندىلىقتارى جاتىر.
بوستاندىق اۋدانىنداعى «وڭتۇستىك» ساياباعى قالالىق قاۋىمداستىقتاردىڭ ۇلكەن الاڭىنا اينالدى. فەستيۆالگە 5 مىڭعا جۋىق ادام قاتىستى. ءىس-شارا الماتى قالاسى جاستار ساياساتى باسقارماسىنىڭ قولداۋىمەن وتكىزىلىپ، جاستاردى قالانى دامىتۋ يدەياسى توڭىرەگىندە بىرىكتىرۋگە باعىتتالدى.
ساعات 12:00-دەن 18:00-گە دەيىن تاقىرىپتىق الاڭ جۇمىس ىستەپ، ءدارىس، شەبەردىڭ ساباقتارى، قويىلىم جانە ينتەراكتيۆتى بەلسەندىلىكتەر ءوتتى. سونداي-اق، جەرگىلىكتى برەندتەر مەن قولونەرشىلەر جارمەڭكەسى، فۋد-ايماق جانە قالالىق كۆەست ۇيىمداستىرىلدى.
«بۇگىندە قالانىڭ دامۋى تۋرالى جاي عانا ايتۋ جەتكىلىكسىز، تۇرعىنداردىڭ وزىنە وسى ۇدەرىسكە قاتىسۋعا مۇمكىندىك بەرۋ ماڭىزدى. الماتىدا ەكولوگيا، ءبىلىم بەرۋ، تەحنولوگيا، الەۋمەتتىك قولداۋ، كاسىپكەرلىك جانە قالالىق ورتانى دامىتۋ باعىتتارىندا جۇمىس ىستەيتىن كوپتەگەن بەلسەندى قاۋىمداستىق بار. City Makers ولاردى ورتاق ماقسات – الماتىنى ودان ءارى جاقسارتۋ توڭىرەگىندە بىرىكتىرەدى. ءوز قالاسىنا وسىنداي جاۋاپكەرشىلىكپەن قاراۋ «ادال ازامات»، «تازا قازاقستان» قۇندىلىقتارى مەن «زاڭ جانە ءتارتىپ» قاعيداتىن ايقىن كورسەتەدى. ادام شەت قالماي، وزگەرىستى وزىنەن جانە اينالاسىنان باستاعاندا، قالا دا وزگەرەدى»، – دەدى الماتى قالاسى اكىمىنىڭ ورىنباسارى ابزال نۇكەنوۆ.
فەستيۆال التى باعىتقا ءبولىندى: «بولاشاق قالاسى»، «ءبىلىم جانە مانساپ»، «كرەاتيۆتى ەكونوميكا»، «ەكولوگيا»، «قامقورلىق جانە قولداۋ»، «تۋريزم جانە الماتى».
فەستيۆالگە Qazaq IT Community، Women in Tech Kazakhstan، TechnoWomen، ENACTUS Kazakhstan، Almaty Creative، Impact Hub Almaty، Almaty Walking Tour، Almaty Museum، ARTBAT FEST، Almaty Marathon، الماتىنىڭ جوعارى وقۋ ورىندارى جانە باسقا دا ۇيىمدار قاتىستى. City Makers: JASTAR QALASY قالالىق باستامالار مەن جاستاردى بايلانىستىراتىن، تاجىريبە الماسىپ، جاڭا سەرىكتەستىك ورناتۋعا جانە بىرلەسكەن جوبالار باستاۋعا مۇمكىندىك بەرەتىن ورتاق الاڭعا اينالدى.
