بۇگىن اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە «تەوريادان تاجىريبەگە: بولاشاق مۇعالىمدەردىڭ پەداگوگيكالىق پراكتيكا ناتيجەلەرى» اتتى ءبىتىرۋشى كۋرس ءبىلىم الۋشىلارىنىڭ قورىتىندى كونفەرەنسياسى ءوتتى، – دەپ حابارلايدى Alnews Aikyn.kz سايتىنا سىلتەمە جاساپ.
اۋقىمدى جيىنعا پەداگوگيكالىق ماماندىقتاردىڭ ستۋدەنتتەرى، وندىرىستىك ىس-تاجىريبە جەتەكشىلەرى، ورتا ءبىلىم بەرۋ ۇيىمدارىنىڭ ديرەكتورلارى مەن مۇعالىمدەرى، سونداي-اق ۋنيۆەرسيتەتتىڭ پروفەسسور-وقىتۋشىلار قۇرامى قاتىستى. جيىندى مانساپ ورتالىعىنىڭ باسشىسى راقىمبەردى جەتىباي مودەراتور رەتىندە جۇرگىزدى.
ءىس-شارانىڭ نەگىزگى ماقساتى – 2025-2026 وقۋ جىلىنىڭ ەكى سەمەسترىن قامتىعان ۇزاقمەرزىمدى وندىرىستىك ىس-تاجىريبەنىڭ ناتيجەلەرىن سارالاۋ، بولاشاق مۇعالىمدەردىڭ كاسىبي قۇزىرەتتىلىك دەڭگەيىن انىقتاۋ جانە ۋنيۆەرسيتەت پەن مەكتەپ اراسىنداعى ستراتەگيالىق ارىپتەستىكتى نىعايتۋ. جيىن بارىسىندا اباي ۋنيۆەرسيتەتىندە پەداگوگيكالىق تاجىريبەلەردىڭ بەكىتىلگەن اكادەميالىق كۇنتىزبە نەگىزىندە جوعارى دەڭگەيدە جۇزەگە اسىرىلعانى ەرەكشە اتاپ ءوتىلدى.
ستاتيستيكالىق مالىمەتتەرگە سۇيەنسەك، 2025 جىلدىڭ قىركۇيەگىندە وتكەن پەداگوگيكالىق پراكتيكاعا 3-كۋرس ستۋدەنتتەرىنەن 2 561 ءبىلىم الۋشى قاتىسىپ، الماتى قالاسىنىڭ 94 ءبىلىم بەرۋ ۇيىمىندا تاجىريبە جيناقتاعان. وسى كەزەڭدە ستۋدەنتتەرگە باعىت-باعدار بەرگەن 1 176 مەكتەپ مۇعالىمىنە نورماتيۆتىك تالاپتارعا ساي تولەم جۇرگىزىلدى. ال 4-كۋرس ستۋدەنتتەرىنىڭ نەگىزگى وندىرىستىك ىس-تاجىريبەسى 22 اپتاعا سوزىلىپ، 2025 جىلدىڭ قازانىنان 2026 جىلدىڭ ساۋىرىنە دەيىنگى كەزەڭدى قامتىدى. بۇل ماڭىزدى كەزەڭدە بارلىق فاكۋلتەتتەن 2 215 ءبىلىم الۋشى مەكتەپتەردە كاسىبي تاجىريبەدەن ءوتتى.
تاجىريبەنىڭ گەوگرافيالىق اۋقىمى دا كەڭەيىپ كەلەدى. ماسەلەن، سوڭعى ءۇش جىلداعى ءداستۇر بويىنشا 95 ستۋدەنت ەلورداداعى 17 ءبىلىم بەرۋ ۇيىمىندا داعدىلارىن جەتىلدىرسە، الماتى قالاسىندا 1 535 ءبىلىم الۋشى 91 مەكتەپكە ءبولىندى. جالپى العاندا، پراكتيكا جۇمىستارىنا 108 ءبىلىم بەرۋ ۇيىمى جۇمىلدىرىلدى. ستۋدەنتتەر 7-8 سەمەستر ارالىعىندا 8 860 اشىق ساباق وتكىزىپ، تەوريالىق بىلىمدەرىن ناقتى وقۋ پروسەسىندە ناتيجەلى ۇشتاستىرا ءبىلدى.
2019 جىلدان بەرى اباي ۋنيۆەرسيتەتى ەنگىزگەن بۇل بىرەگەي باستامانىڭ تيىمدىلىگى مەكتەپتەر تاراپىنان جۇرگىزىلگەن ساۋالنامالارمەن راستالدى. تاجىريبەنىڭ العاشقى كەزەڭىندە ستۋدەنتتەر مەكتەپ ورتاسىنا بەيىمدەلسە، كەيىنگى ايلاردا ساباق بەرۋ ادىستەمەسىن، بجب مەن تجب قۇراستىرۋدى، سونداي-اق باعالاۋ جۇيەسىن تولىق مەڭگەرىپ شىقتى. وسىلايشا، ءۇش توقساندى قامتىعان تاجىريبە بولاشاق مۇعالىمدەردى ەڭبەك نارىعىنا دايىن، باسەكەگە قابىلەتتى مامان رەتىندە قالىپتاستىرۋعا مۇمكىندىك بەردى. پراكتيكا بازالارىنداعى جەتەكشىلەردىڭ 80 پايىزى پەداگوگ-زەرتتەۋشى، پەداگوگ-شەبەر جانە پەداگوگ-ساراپشى، 10 پايىزى پەداگوگ-مودەراتور ساناتىنداعى بىلىكتى ماماندار بولعانى ستۋدەنتتەردىڭ كاسىبي وسۋىنە وڭ ىقپال ەتتى. اتالعان ۇستازداردىڭ جەتەكشىلىگىمەن 5 000-نان استام اشىق ساباق وتكىزىلدى.
سونىمەن قاتار دۋالدى وقىتۋ جۇيەسى دە ناقتى جەمىسىن بەرۋدە. بيىلعى وقۋ جىلىندا 139 ءبىلىم الۋشى وسى جۇيە ارقىلى رەسمي جۇمىسقا قابىلدانسا، 446 ستۋدەنت سۇرانىس حات نەگىزىندە تاجىريبەدەن ءوتتى. كونفەرەنسيا سوڭىندا باسقارما توراعاسى-رەكتوردىڭ كەڭەسشىسى حايرۋللا جانبەكوۆ، دەپارتامەنت ديرەكتورى الماس نايمانبايەۆ جانە مەكتەپ ديرەكتورلارى ءسوز سويلەپ، پەداگوگ كادرلاردى دايارلاۋداعى جاڭا فورماتتىڭ ماڭىزدىلىعىن قورىتىندىلادى.
جيىن بارىسىندا كاسىبي باعدار جانە مانساپتى دامىتۋ دەپارتامەنتىنىڭ ديرەكتورى الماس نايمانبايەۆ پراكتيكانىڭ ستراتەگيالىق ماڭىزىنا توقتالىپ: «ۇزاقمەرزىمدى پەداگوگيكالىق پراكتيكا – تەك اكادەميالىق تالاپ ەمەس، بۇل – بولاشاق ماماننىڭ مەكتەپ ومىرىنە تولىققاندى ەنۋىنە مۇمكىندىك بەرەتىن كاسىبي كوپىر. ءبىزدىڭ ماقساتىمىز — ديپلوم العان تۇلەك جۇمىس ورنىندا بەيىمدەلۋگە ۋاقىت جوعالتپاي، العاشقى كۇننەن باستاپ ساپالى ءبىلىم بەرۋىنە جاعداي جاساۋ»، – دەپ اتاپ ءوتتى.
ءىس-شارا «مەنىڭ تاجىريبەدەگى ءبىر كۇنىم» بايقاۋىنىڭ جەڭىمپازدارىن ماراپاتتاۋمەن جانە «ۇزدىك تاجىريبە جەتەكشىلەرىنە» العىسحاتتار تابىستاۋمەن اياقتالدى. بۇل شارا اباي ۋنيۆەرسيتەتىنىڭ ءبىلىم مەن تاجىريبەنى ساباقتاستىرۋداعى جۇيەلى جۇمىسىنىڭ ايقىن ايعاعىنا اينالدى.
