قاراساي اۋدانىنا قاراستى اباي اۋىلىنداعى №2 ورتا مەكتەپتە مەملەكەت جانە قوعام قايراتكەرى، قازاقستان رەسپۋبليكاسى پارلامەنتى ءماجىلىسىنىڭ V شاقىرىلىمىنىڭ دەپۋتاتى، «قۇرمەت»، «پاراسات» وردەندەرىنىڭ يەسى ورازگۇل اسانعازىنىڭ قاتىسۋىمەن «اتا-انا - بالانىڭ ايناسى» تاقىرىبىندا اتا-انالارعا ارنالعان ەرەكشە فورۋم ءوتتى.
تاعىلىمدى فورۋمدا ۇلتتىق قۇندىلىقتارىمىز جايلى، ءتىل ماسەلەسى، وتباسى ينستيتۋتى مەن قوعامدا وزەكتى ماسەلەگە اينالعان شاڭىراقتاردىڭ شايقالۋى سەكىلدى وزەكتى ماسەلەلەر قوزعالدى. فورۋم بارىسىندا ورازكۇل اسانعازى قاتىسۋشىلارمەن ەركىن فورماتتا پىكىر الماسىپ، وتباسىلىق بەرەكە مەن تاتۋلىقتىڭ ماڭىزى تۋرالى ويلارىمەن ءبولىستى. سونىمەن قاتار، جاستارعا ومىرلىك تاجىريبەسىنەن مىسالدار كەلتىرىپ، ۇلتتىق تاربيە مەن رۋحاني بىرلىكتىڭ وتباسىنداعى رولىنە توقتالدى. مەكتەپ ديرەكتورى سامات سۇيىمبەك ۇلىنىڭ ۇيىتقى بولۋىمەن ۇيىمداستىرىلعان شاراعا مەكتەپ ۇجىمىنان بولەك 200-دەن استام اتا-انا قاتىستى.
فورۋم مەكتەپ وقۋشىلارىنىڭ تۋعان جەر، وتانعا ارنالعان حورىمەن باستالىپ، ودان ءارى سابەتاي سىپاتايەۆتىڭ «كوك ءبورىم كوككە ۇلىعان» پوەماسىنان كومپوزيسياسىمەن جالعاستى. بۇل كورىنىسكە ەرەكشە تولقىعان ورازگۇل اپاي: «مەن كەزدەسۋگە شاقىرعاندارىڭىزعا قاتتى قۋانىپ تۇرمىن. اسىرەسە مىنا كومپوزيسيا ەرەكشە تولقىتتى. «مەن – قازاقپىن» دەپ باستاپ، تىلەگىم تىنىشتىعىندا ەلىمنىڭ.
دۇنيەم تۇگەلدە «قوڭىرمىن».
جۇرەگىم تابيعاتپەن تامىرلاس،
يەسىمىن جەرىمنىڭ!» دەپ ءبىتىردى عوي. وسى سەرتىمىزدەن اينىماۋىمىز كەرەك. وسى جەردىڭ يەسى رەتىندە ءتىلىمىزدى، ءدىلىمىزدى ساقتاۋعا، ۇلتتىق بولمىسىمىزدان اينىماۋعا تىرىسۋىمىز كەرەك. بولاشاقتا ۇلتتىڭ جوعىن جوقتار ورازگۇل اسانعازىلار وسىلار دەپ بىلەمىن» دەپ ريزاشىلىعىن ءبىلدىردى.
سونداي-اق «2020–2024 جج. دەرەك بويىنشا قازاقستان، وكىنىشكە قاراي، الەم ەلدەرى ىشىندە اجىراسۋ دەڭگەيى بويىنشا ەكىنشى ورىندا. بۇل – ءارقايسىمىزعا وي سالاتىن اۋىر شىندىق. بۇگىنگى شارانىڭ تاقىرىبى «اتا-انا بالانىڭ ايناسى» دەپ جاقسى قويىلعان. ءدال ءقازىر وسى بالالار ۇلگى ەتىپ قارايتىن اينا، اتا-انالارىمىز اجىراسىپ، اينالار شىتىناپ جاتىر. مۇنداي جاعدايدا بالالارىمىز كىمدى ۇلگى تۇتادى، قايدان تاربيە الادى؟ مەملەكەت شاعىن وتباسىلاردان تۇرادى. وسى ماسەلەنى الدىن الۋ بويىنشا كىشكەنە بولسىن پايدام ءتيسىن دەگەن ماقساتتا “وتباسى بەرەكەسى” اتتى كىتابىم شىقتى. 52 جىل وتباسىلىق ومىرىمدە ايەل، كەلىن، ەنە، اجە رەتىندە تۇيگەنىم از ەمەس. سول ويلارىمدى كىتاپقا جيناقتادىم» دەي كەلىپ، ءار شاڭىراقتىڭ ەگەسى ەر ادامدارعا، ۇيىتقىسى بولار ايەل ادامدارعا وي سالار پىكىرلەرىمەن ءبولىستى.
ءىس شاراعا ارنايى كەلىپ قاتىسقان اۋداندىق ءبىلىم ءبولىمىنىڭ باسشىسى ەركيمبايەۆا اسەل ابلەيەۆنا دا «مۇنداي شارا اۋدانىمىزدىڭ باسقا دا مەكتەپتەرىنە كەرەك» دەي كەلىپ، ورازگۇل اسانعازىقىزىنا اۋدان بويىنشا وسىنداي «تاعىلىمدى تۋر» ۇيىمداستىرىپ بەرۋگە قولقا سالدى. ال مەكتەپ ديرەكتورى سامات سۇيىمبەك ۇلى «مەكتەپ، قوعام، وتباسى - ءۇش تاعاندى بايلانىس ورناعاندا عانا رۋحتى ۇرپاق تاربيەلەيمىز! بۇل كەزدەسۋ ءارقايسىڭىزعا وي سالسا، ماقساتىمىزدىڭ ورىندالعانى. ءبىلىم بەرىپ قانا قويماي، وتباسى قۇندىلىقتارىن دارىپتەپ، سىيلاستىق پەن ءوزارا تۇسىنىستىك مادەنيەتىن نىعايتۋ، وتباسى ينستيتۋتىنىڭ قوعامداعى ورنى، اتا-انانىڭ بالا تاربيەسىندەگى جاۋاپكەرشىلىگى جانە ۇلتتىق ءداستۇر مەن قازىرگى زامان قۇندىلىقتارىنىڭ ۇيلەسىمىن تابا بىلسەك، ءسىز بەن ءبىز بىرگە كەرەمەت ۇرپاق تاربيەلەپ شىعامىز دەگەن ويدامىز. ورازگۇل اسانعازى قىزىنىڭ ءار سوزىنەن رۋحتانىپ، كوڭىلگە كوپ وي تۇيدىك» دەدى.
اتا-انالاردىڭ دا ريزا بولىپ، رۋحتاندىرىپ سويلەگەن قوعام قايراتكەرىنىڭ سوزدەرىنە دەم بەرىپ، كەش سوڭىندا ريزاشىلىقتارىن بىلدىرگەنىن بايقادىق، سولاردىڭ ءبىرى اتا-انا سايلىبايەۆ باعاشار «ءبىزدىڭ قاتتى قارنىمىز اشىپ قالىپتى. بۇگىن كادىمگىدەي رۋحاني ازىق العانداي بولدىق. ماقساتىمىزدىڭ ايقىندالىپ، ومىرگە قۇلشىنىسىمىز ارتقانداي بولدى. اتا-انا مەن مەكتەپ بىرىككەندە عانا مىقتى ۇرپاق تاربيەلەپ شىعاتىنىمىزدىڭ دالەلى بۇگىنگى كەش. سوندىقتان الداعى ۋاقىتتى ىنتىماقتاستىعىمىز ارتا بەرسىن!» دەدى.
فورۋم سوڭىندا مەكتەپ ديرەكتورى باستاپ، مەكتەپ ۇجىمى قولداپ حورمەن رۋحتى انمەن كەشتى تۇيىندەدى.
كەش سوڭىندا ورازگۇل اسانعازىنىڭ سوزىمەن رۋحتانعان اتا-انالار قيماي قوشتاسىپ، مەملەكەت قايراتكەرىنىڭ ءار ءسوزىن قولداپ، ەستەلىك سۋرەتكە دە ءتۇستى.
