الماتىدا 2026 جىلدىڭ قاڭتار-قىركۇيەك ايلارىندا 1،97 ترلن تەڭگەنىڭ ونەركاسىپ ءونىمى ءوندىرىلدى، - دەپ حابارلايدى alnews.
بۇل وتكەن جىلدىڭ وسى كەزەڭىمەن سالىستىرعاندا 22،2%-عا ارتىق. وسىمگە نەگىزىنەن ماشينا جاساۋ، تاماق جانە فارماسيەۆتيكا سالالارىنىڭ دامۋى ىقپال ەتتى. بۇل تۋرالى قالالىق كاسىپكەرلىك جانە ينۆەستيسيالار باسقارماسىنىڭ وكىلدەرى ايتتى.
وڭدەۋ ونەركاسىبىندەگى ءوندىرىس كولەمى 1،67 ترلن تەڭگەگە جەتىپ، جالپى ونەركاسىپ ءوندىرىسىنىڭ 84،8% بولدى. وسى سالانىڭ ءوسۋ قارقىنى بويىنشا الماتى قازاقستان وڭىرلەرى اراسىندا كوش باستاپ تۇر.
ەڭ جوعارى ءوسىم ماشينا جاساۋ سالاسىندا بايقالدى. مۇندا ءوندىرىس كولەمى 66،3%-عا ارتتى. وندىرىلگەن ءونىمنىڭ ەداۋىر بولىگىن اۆتوكولىك ونىمدەرىنە تيەسىلى.
تاماق ونەركاسىبىندەگى ءوندىرىس كولەمى 9،4%-عا ءوسىپ، 261 ملرد تەڭگەگە جەتتى. فارماسيەۆتيكا سالاسىندا 20،4% ءوسىم تىركەلىپ، ءونىم كولەمى 21،8 ملرد تەڭگەگە جەتتى.
ونەركاسىپتىڭ دامۋىنا الماتىنىڭ يندۋستريالىق ايماعىندا جاڭا ءوندىرىس ورىندارىنىڭ اشىلۋى دا سەرپىن بەرىپ وتىر. جىل باسىنان بەرى مۇندا جالپى قۇنى 5،8 ملرد تەڭگە بولاتىن بەس جوبا ىسكە قوسىلىپ، 345 جاڭا جۇمىس ورنى قۇرىلدى.
ولاردىڭ قاتارىندا ALC پانەلدەرى مەن گازوبلوكتار وندىرەتىن زاۋىت، Euro Truck Service لوگيستيكالىق ورتالىعى، جىلۋ جانە سۋمەن جابدىقتاۋ جابدىقتارىن شىعاراتىن كەڭەيتىلگەن ءوندىرىس كەشەنى، سونداي-اق ەكى شاعىن ونەركاسىپتىك پارك بار.
2026 جىلدىڭ سوڭىنا دەيىن جالپى قۇنى 6،7 ملرد تەڭگە بولاتىن تاعى التى جوبانى ىسكە قوسىپ، 346 جۇمىس ورنىن اشۋ جوسپارلانىپ وتىر.
قازىرگى ۋاقىتتا يندۋستريالىق ايماقتا جالپى قۇنى 1 ترلن تەڭگەدەن اساتىن جوبالاردى جۇزەگە اسىرىپ جاتقان 163 كومپانيا جۇمىس ىستەيدى. اتالعان جوبالار اياسىندا 10 مىڭنان استام جاڭا جۇمىس ورنىن قۇرۋ كوزدەلگەن.
