الماتىدا قازاقستان رەسپۋبليكاسى جاڭا كونستيتۋسياسىنىڭ كۇشىنە ەنۋىنە وراي 2 مىڭنان استام ستۋدەنتتى، ەرىكتىنى، بەلسەندى جاستار مەن قالا تۇرعىندارىن بىرىكتىرگەن جاستاردىڭ پاتريوتتىق اكسيالارى ءوتتى، - دەپ حابارلايدى alnews.
ءىس-شارالاردى الماتى قالاسىنىڭ جاستار ساياساتى باسقارماسى ۇيىمداستىردى.
باعدارلاما «سۇڭقار» حالىقارالىق شاڭعى ترامپليندەرى كەشەنىنىڭ اۋماعىندا قازاقستان رەسپۋبليكاسىنىڭ مەملەكەتتىك تۋىن سالتاناتتى تۇردە كوتەرۋ راسىمىمەن باستالدى. سالتاناتتى راسىمگە 500-دەن استام الماتىلىق جاس قاتىسىپ، مەملەكەتتىك ءانۇراندى ورىنداپ، مەملەكەتتىك رامىزدەرگە قۇرمەت كورسەتتى.
باستى وقيعالاردىڭ ءبىرى جاڭا كونستيتۋسيانىڭ كۇشىنە ەنۋىنە ارنالعان كوركەمدىك اكسيا بولدى. ءىس-شارا اياسىندا بيىكتىگى 4 مەتر، ەنى 2،5 مەتر بولاتىن كونستيتۋسيا بەينەسىندەگى ارت-نىسان تانىستىرىلىپ، كونستيتۋسيانىڭ نەگىزگى قاعيداتتارىن – زاڭ ۇستەمدىگىن، ادام قۇقىعىن قورعاۋدى، مۇمكىندىكتەر تەڭدىگىن، ازاماتتىق جاۋاپكەرشىلىك پەن قوعامدىق كەلىسىمدى بەينەلەيتىن تاقىرىپتىق كورمە ۇيىمداستىرىلدى. سونىمەن قاتار قاتىسۋشىلار ءۇشىن ينتەراكتيۆتى الاڭدار، شىعارماشىلىق قويىلىمدار جانە مۋزىكالىق باعدارلاما ۇسىنىلدى.
مەرەكەلىك ءىس-شارالاردىڭ تاعى ءبىر الاڭى قازاقستان-بريتان تەحنيكالىق ۋنيۆەرسيتەتى بولدى. مۇندا 700-گە جۋىق ستۋدەنت، ەرىكتى جانە قوعامدىق بەلسەندى قازاقستان رەسپۋبليكاسىنىڭ مەملەكەتتىك تۋلارىمەن پاتريوتتىق فلەشموبقا قاتىستى.
اكسياعا قاتىسقان الماتىلىق جاستار جاڭا كونستيتۋسيانىڭ كۇشىنە ەنۋى ادىلەتتىلىك، زاڭ ۇستەمدىگى، ادام قۇقىعىن قۇرمەتتەۋ جانە ازاماتتىق جاۋاپكەرشىلىك قاعيداتتارىنا نەگىزدەلگەن ەل دامۋىنىڭ جاڭا كەزەڭىن باستايتىنىن اتاپ ءوتتى.
الماتى قالاسى جاستار ساياساتى باسقارماسىنىڭ مالىمەتىنشە، ەل ءۇشىن ماڭىزدى بۇل تاريحي وقيعاعا العاشقىلاردىڭ ءبىرى بولىپ جاستار ءۇن قاتىپ، ازاماتتىق ۇستانىمدارىن زاماناۋي قوعامدىق باستامالار، شىعارماشىلىق جوبالار مەن پاتريوتتىق اكسيالار ارقىلى ءبىلدىردى.
«كونستيتۋسيا – بۇل تەك قۇقىقتىق قۇجات قانا ەمەس، مەملەكەت پەن قوعام اراسىنداعى سەنىمنىڭ نەگىزى، ەلدىڭ ودان ءارى دامۋىنىڭ باستى باعدارى. بۇگىن الماتى جاستارى وزدەرىنىڭ بەلسەندى قاتىسۋى ارقىلى قازاقستاننىڭ بولاشاعىنا جاۋاپكەرشىلىكپەن قارايتىنىن، مەملەكەتتىك قۇندىلىقتاردى قۇرمەتتەيتىنىن جانە ادىلەتتى، قۋاتتى ءارى وركەندەگەن مەملەكەت قۇرۋ ىسىنە بەلسەندى اتسالىسۋعا دايىن ەكەنىن كورسەتتى»، – دەپ اتاپ ءوتتى باسقارما وكىلدەرى.
