Almatyda Memleket basshysynyń «Taza Qazaqstan» jalpyulttyq ekologıalyq bastamasy aıasynda uıymdastyrylǵan «Úzdik jasyl balabaqsha» jáne «Úzdik jasyl kolej» qalalyq baıqaýlary jeńimpazdaryn marapattaý rásimi ótti, - dep habarlaıdy alnews.
Baıqaýdy Almaty qalasynyń Bilim basqarmasy uıymdastyrdy.
Baıqaýlar bilim berý uıymdarynda ekologıalyq mádenıetti damytýǵa, balalar men jastardyń qorshaǵan ortaǵa jaýapkershilikpen qaraýyn qalyptastyrýǵa, sondaı-aq kógaldandyrý jáne ekologıalyq tárbıe salasyndaǵy praktıkalyq bastamalardy qoldaýǵa baǵyttalǵan.
«Úzdik jasyl balabaqsha» baıqaýyna Almaty qalasynyń mektepke deıingi uıymdary qatysty. Aýdandyq kezeńde bilim berý uıymdary jobalaryn tanystyryp, úzdik bastamalar qalalyq kezeńge joldama aldy.
Baıqaý jumystaryn baǵalaý kezinde aýmaqty kógaldandyrý deńgeıi, tárbıelenýshilerdiń qatysýymen ekologıalyq jobalardy júzege asyrý, sondaı-aq usynylǵan bastamalardyń praktıkalyq mańyzy eskerildi.
Baıqaý qorytyndysy boıynsha júldeli oryndar bylaı bólindi:
İ oryn — Alataý aýdanyndaǵy №31 bóbekjaı-balabaqsha;
İİ oryn — Áýezov aýdanyndaǵy №186 bóbekjaı-balabaqsha;
İİİ oryn — Medeý aýdanyndaǵy №125 bóbekjaı-balabaqsha.
Qalalyq mektepke deıingi resýrstyq ortalyqtyń basshysy Natalá Karasevanyń aıtýynsha, «Úzdik jasyl balabaqsha» baıqaýy Almatyda alǵash ret ótkizilip, ekologıalyq tárbıe salasyndaǵy praktıkalyq tájirıbe almasý alańyna aınaldy.
«Baǵalaý talaptary kóp boldy. Olardyń qatarynda balabaqshalardyń landshaftyq dızaıny da, balalarmen júrgiziletin ekologıalyq tárbıe baǵytyndaǵy jobalyq jumystar da bar», — dedi Natalá Karaseva.
Baıqaý jeńimpazdarynyń biri №31 bóbekjaı-balabaqsha. Munda «Jasyl balabaqsha» baǵdarlamasy júzege asyrylyp keledi. Ekologıalyq bastamalarǵa tárbıelenýshilermen qatar olardyń ata-analary da belsendi qatysady.
Baǵdarlama aıasynda balalar qaldyqtardy bólek jınaý qaǵıdalarymen tanysyp, sý men elektr energıasyn únemdi paıdalanýdy, ósimdikterdi kútip-baptaýdy jáne jylyjaılarda kókónis daqyldaryn ósirýdi úırenedi.
«Balalar alǵashqy kúnnen bastap ekologıa jáne qorshaǵan ortany qorǵaý baǵytyndaǵy jobalarmen jumys isteıdi. Olar qoqysty suryptaýdy úırenedi, al qaıta paıdalanýǵa bolatyn zattardy arnaıy sheberhanalarda qoldanamyz», — dedi №31 bóbekjaı-balabaqshanyń meńgerýshisi Aınur Bahtıeva.
Ekologıalyq tárbıeniń praktıkalyq bóligi baqsha men jylyjaılardy sýarý úshin tamshylatyp sýarý júıesin paıdalanýdy qamtıdy. Organıkalyq qaldyqtar organıkalyq tyńaıtqyshqa aınaldyrylady. Sonymen qatar balabaqsha aýmaǵynda jaryqtandyrýǵa paıdalanylatyn kún panelderi ornatylǵan.
Almatyda alǵash ret tehnıkalyq jáne kásiptik bilim berý uıymdarynyń basyn qosqan «Úzdik jasyl kolej» qalalyq baıqaýy da ótkizildi.
Baıqaý qorytyndysy boıynsha:
İ oryn — Almaty qazaq gýmanıtarlyq-pedagogıkalyq koleji №1;
İİ oryn — Almaty qurylys-tehnıkalyq koleji;
İİİ oryn — Almaty telekomýnıkasıa jáne mashına jasaý koleji.
Almaty qazaq gýmanıtarlyq-pedagogıkalyq koleji №1-de baıqaý aıasynda «Eko-kampýs», «Jasyl keńistik» jáne «Ekologıalyq mádenıet» jobalary júzege asyryldy. Stýdentter men oqytýshylar aýmaqty kógaldandyrýǵa, aǵash egýge jáne «Ustazdar aleıasyn» qurýǵa atsalysty. Ekologıalyq bastamaǵa kolej túlekteri de qosyldy.
Eki qalalyq baıqaýdyń jeńimpazdary men júldegerleri Almaty qalasy Bilim basqarmasynyń dıplomdarymen marapattaldy.
