Almatydaǵy Qazaq ulttyq qyzdar pedagogıkalyq ýnıversıtetinde stýdenttik ózin-ózi basqarý men jastardyń ashyq pikir almasýyna arnalǵan Stýdenttik quryltaı quryldy, - dep habarlaıdy alnews.
Onyń quramyna 40-tan astam stýdent kirdi. Alǵashqy otyrysta qatysýshylarǵa Quryltaıdyń tujyrymdamasy men tóraǵalyqqa usynylǵan kandıdattar tanystyrylyp, keıin tóraǵa saılaýy ótti.
İs-sharaǵa ýnıversıtet basshylyǵy, Almaty qalasy Jastar saıasaty basqarmasynyń basshysy Azız Kajdenbek, jastar uıymdarynyń ókilderi men stýdenttik belsendiler qatysty.
Stýdenttik quryltaı stýdentterdi tolǵandyratyn máselelerdi kóterip, usynysy men bastamasyn ortaǵa salýǵa, olardy júzege asyrýǵa atsalysýǵa jáne ýnıversıtet pen qala qurylymdarymen ashyq pikir almasýǵa jol ashady.
Almaty qalasy Jastar saıasaty basqarmasynyń basshysy Azız Kajdenbektiń aıtýynsha, stýdenttik ózin-ózi basqarýdy damytý jastarǵa ózin tolǵandyratyn túıtkilderdi kóterip qana qoımaı, olardyń sheshimin tabýǵa tikeleı atsalysýǵa múmkindik beredi.
«Búginde jastar stýdenttik ómirge qatysty sheshimderge syrttaı baqylaýshy bolyp qalmaı, belsendi aralasýy mańyzdy. Stýdenttik quryltaı – ózekti máselelerdi ashyq aıtyp, bastama kóterýge, jaýapkershilikti moıynǵa alyp, ortaq sheshim izdeýge múmkindik beretin orta. Osyndaı tetikter arqyly Almaty men elimizdiń damýyna úles qosýǵa daıyn, belsendi ári jaýapty azamattardyń jańa býyny qalyptasady», – dedi Azız Kajdenbek.
Ýnıversıtet rektory Beıbitgúl Kárimovanyń aıtýynsha, stýdentterdiń quqyqtyq saýatyn arttyrý, akademıalyq adaldyq qaǵıdalaryn saqtaý, ekologıalyq mádenıetti qalyptastyrý jáne qoǵamǵa paıda keltirýge umtylý – jastarmen júrgiziletin tárbıe jumysynyń negizgi baǵyttarynyń biri.
«Sapaly bilim, densaýlyq pen ál-aýqat, genderlik teńdik, ekologıalyq mádenıet jáne áleýmettik jaýapkershilik stýdentterdiń kúndelikti ómirimen ushtasyp, jastardyń qoǵamnyń turaqty damýyna qatysýyna múmkindik beredi. Búgingi stýdent – bolashaq maman ǵana emes, eldiń qoǵamdyq damýyna úles qosa alatyn azamat. Biz Stýdenttik quryltaıdy jastardyń únin estýge, ózekti máselelerdi ashyq talqylaýǵa jáne stýdentterdiń bastamalaryn qoldaýǵa múmkindik beretin mańyzdy dıalog alańy retinde qarastyramyz», – dedi Beıbitgúl Kárimova.
İs-shara barysynda Almatydaǵy Quryltaı saılaýyn uıymdastyrýǵa atsalysqan belsendi jastar da marapattaldy. Jastar uıymdary, qoǵamdyq birlestikter, joǵary oqý oryndary men komúnıtı ortalyqtardyń ókilderine qala ákiminiń Alǵys haty tabystaldy.
Stýdenttik quryltaı jastardy ortaq maqsat pen bastamalar tóńireginde biriktirip, olardyń kóshbasshylyq qabiletin shyńdaýyna jáne shahardyń qoǵamdyq ómirine belsendi aralasýyna jol ashatyn turaqty uıymǵa aınalmaq.
