Almaty qalasy Jastar saıasaty basqarmasy men Tótenshe jaǵdaılar departamenti birlese otyryp, jastar arasynda seısmıkalyq qaýipsizdik mádenıetin qalyptastyrýǵa baǵyttalǵan keshendi aqparattyq sharalardy júıeli túrde ótkizip keledi.
Jańa oqý jyly aıasynda joǵary oqý oryndarynyń stýdentterine jer silkinisi, tabıǵı apattar men tótenshe jaǵdaılar kezinde ózin-ózi ustaý erejeleri jáne qaýipsizdik algorıtmderi keńinen túsindirilýde. Sonymen qatar, órt qaýipsizdigi, alǵashqy medısınalyq kómek kórsetý, zardap shekkenderge psıhologıalyq qoldaý kórsetý syndy ómirlik mańyzy bar taqyryptar da qamtylýda.
Sharanyń negizgi maqsaty — jastardyń daǵdarys sátinde sabyr saqtap, durys sheshim qabyldaýyna, tıimdi áreket etýine yqpal etý. Almaty seısmıkalyq turǵydan asa kúrdeli aımaq bolǵandyqtan, árbir azamattyń, ásirese jastardyń, tótenshe jaǵdaıda óz ómirin qorǵap, ózgelerge kómek kórsete bilýi qoǵam qaýipsizdigi úshin erekshe mańyzdy.
Sharaǵa qatysqan stýdent Aıjan Bekova alǵan áserimen bólisti:
«Búgingi is-shara barysynda men kóptegen paıdaly aqparat aldym. Árbir azamat tótenshe jaǵdaı kezinde qalaı áreket etý kerektigin bilýi tıis dep oılaımyn. Mundaı oqytý jumystary taǵy uıymdastyrylsa, mindetti túrde qatysar edim», – dedi ol.
Aldaǵy ýaqytta mundaı aqparattyq baǵdarlamalar tek joǵary oqý oryndarynda ǵana emes, qalanyń barlyq komúnıtı ortalyqtarynda da ótkiziletin bolady. Jastar úshin ınteraktıvti kezdesýler, sımýlásıalyq jattyǵýlar men praktıkalyq sabaqtar uıymdastyrylyp, olardyń qaýipsizdik daǵdylaryn jetildirýge múmkindik jasalady.
Aqparattyq-aǵartý jumystary — tótenshe jaǵdaılardyń aldyn alýdyń eń tıimdi joldarynyń biri. Qaýip-qater týyndaǵan sátte ǵana emes, oǵan aldyn ala daıyn bolý — zamanaýı qoǵamnyń basty qaǵıdasy. Osy oraıda Jastar saıasaty basqarmasy men Tótenshe jaǵdaılar departamentiniń birlesken bastamasy jastardyń qaýipsizdik salasyndaǵy bilimin arttyrýǵa jáne jaýapkershiligin nyǵaıtýǵa júıeli túrde yqpal etýde.
