2026 jylǵy 5 qarashada Qazaq sport jáne týrızm akademıasynda kórnekti jazýshy, dramatýrg, qoǵam qaıratkeri Rollan Shákenuly Seısenbaevtyń 80 jyldyq mereıtoıyna oraı ádebı-tanymdyq jáne shyǵarmashylyq kezdesý ótti, - dep habarlaıdy alnews.
Rýhanı-mádenı sharanyń basty maqsaty – jas urpaq arasynda ulttyq ádebıet pen rýhanıatty dáripteý, kórnekti qalamgerdiń ómir joly men shyǵarmashylyǵyn tanystyrý, onyń qazaq ádebıeti men mádenıetine qosqan úlesin keńinen nasıhattaý.
Taǵylymdy júzdesýge Akademıanyń profesor-oqytýshylar quramy, ustazdar qaýymy men ádebıetke qyzyǵýshylyq tanytqan stýdentter qatysty. Kezdesýdiń qurmetti qonaqtarynyń qatarynda «Qazaq ádebıeti» gazetiniń bas redaktory, belgili aqyn Baýyrjan Jaqyp boldy. Ol óz sózinde Rollan Seısenbaev shyǵarmashylyǵynyń ereksheligine toqtalyp, qalamger týyndylarynyń qazaq ádebıeti men ulttyq rýhanıattaǵy aıryqsha ornyna nazar aýdardy.
Kezdesý barysynda jazýshy óziniń shyǵarmashylyq joly, ádebıet pen qoǵamnyń baılanysy, ulttyq qundylyqtar men rýhanı sabaqtastyq jóninde oı bólisti. Qatysýshylar qalamgerge kókeılerindegi suraqtaryn qoıyp, erkin pikir almasty. Júzdesý mazmundy áńgime men taǵylymdy oılarǵa toly boldy.
Sharanyń erekshe sátteriniń biri – Qazaq sport jáne týrızm akademıasynyń Prezıdenti Qaırat Qaırollauly Zakıránovtyń mereıtoı ıesine kórsetken qurmeti boldy.
Akademıanyń Ǵylymı keńesiniń sheshimimen Rollan Shákenuly Seısenbaevqa qazaq ádebıeti men mádenıetin damytýǵa qosqan eleýli úlesi, kóp jylǵy jemisti eńbegi men joǵary kásibı jetistikteri úshin «Qazaq sport jáne týrızm akademıasynyń Qurmetti profesory» ataǵy berildi.
Sonymen qatar, «Uly dalanyń uly esimderi» halyqaralyq assambleıasynyń atynan Uly Dala halqynyń rýhanı murasyn jańǵyrtýǵa qosqan aıryqsha úlesi úshin qalamger «Uly Dalanyń Kentavry» ordenimen marapattaldy.
Bul marapattar – mereıtoı ıesiniń shyǵarmashylyq eńbegine, ulttyq ádebıet pen mádenıetke sińirgen qyzmetine kórsetilgen zor qurmettiń belgisi.
80 jyldyq mereıtoı aıasyndaǵy mazmundy kezdesý joǵary deńgeıde ótip, qatysýshylarǵa erekshe rýhanı áser syılady. Mundaı taǵylymdy júzdesýler jas urpaqtyń dúnıetanymyn keńeıtip, ádebıet pen ónerge qurmetin arttyryp, ult rýhanıatynyń sabaqtastyǵyn nyǵaıta túsedi.
Qazaq sport jáne týrızm akademıasy bilim men sportty ǵana emes, ulttyq mádenıet pen rýhanı qundylyqtardy dáripteýdi de óziniń mańyzdy baǵyttarynyń biri sanaıdy.
